رجاء دخول جميع طلبة حاسبات كل الجامعات للأهمية

[badnamef4]

بسم الله الرحمن الرحيم
السلام عليكم و رحمة الله و بركاته
أولاً الموضوع ده مش عشان أقول مين أحسن من مين ولا عشان أغيظ حد لكن عشان نتنافس في الخير و ندي لبعض أفكار ممكن نعملها
فأنا هنا هقول شوية حاجات عاملها طلبة حاسبات القاهرة
عاملين حاجة اسمها new stage و ده عبارة عن نشاط من 6 أيام للطلبة اللي رايحة أولى عشان تعرفهم بالكلية و بالمشاكل اللي هتواجهنا و إزاي نحلها و بخبرات اللي قبلنا و إزاي نتعامل مع الدكاترة و المعيدين و إيه نظام الدرجات و عشان يعرفونا على بعض و يخلوا فيه جو أخوية ما بيننا و عاملين شوية لعب كده في الأيام دي و دورات بلاي ستيشن و احتمال يعملوا دورات بينج بونج كمان - أيوة احنا عندنا ترابيزة بينج مع العلم إننا عندنا مشكلة كبيرة جداً في المكان-
و عاملين حاجة اسمها fci city - محتاجة وحد واخد دكتوراه طبعاً في ترجمتها D: - مدينة كلية الحاسبات. و دي عبارة عن مكان كان عبارة عن صحراء هما جابوا طوب و بنشات و شمسيات و نجيلة صناعية و نت وايرلس يغطي كل المكان ده و كولدير و فيشات كهرباء طبعاً عشان احنا طلبة حاسبات. يعني من الآخر شافوا إيه كل اللي طالب حاسبات ممكن يحتاجه و عملوه و كل ده على حد علمي من جيبهم الشخصي و مبادرتهم الشخصية و معرفش لو الكلية مساعدة في الكلام ده ولا لأ
الدكاترة طبعاً فيهم الكويس و فيهم اللي كويس بس مش أوي - عشان ماروحش في داهية- بهزر طبعاً. بجد أغلبية الدكاترة اللي شفناهم لحد دلوقتي ناس متفاهمة و متعاونة و شعارهم: " احنا هنا عشان نقدم لكم خدمة تعليمية" و المعيدين أنا ماقابلتش غير معيد واحد لكن عامة بجد إنسان رائع
طلبة حاسبات القاهرة عندنا عاملين فيديوهات كده زي أفلام عشان يعرفونا بالقسم و أهميته في الحياة العملية
و لحد دلوقتي رفعوا بتاع قسم ds و قسم is بس و الباقي المفروض في الطريق إن شاء الله


طب أنا بقول الكلام ده ليه؟ عشان أغيظكم؟ عشان أقول إننا أحسن؟ عشان ناقص حسد مثلاً؟؟
لا أبداً الموضوع كله إني نفسي أشوف ده في كل كليات حاسبات و مش ده و بس أنا نفسي أشوفها في كل الكليات بجد. و الطلبة دول ماستنوش الإدارة و لا الدكاترة يعملوا لهم الجوارات دي هما بادروا و عملوها بنفسهم و بجد لو حد فيكم سامعني ربنا يبارك لكم
فيلا يا طلبة الكليات التانية قولوا لنا على الأفكار اللي انتو عاملينها في كلياتكم عشان نعمل زيكم و أحسن منكم و نتنافس كلنا في الخير يا رب إن شاء الله
ملحوظة : أنا ممكن أبقى بخست الإدارة و الدكاترة و المعيدين حقهم في الموضوع ده أنا عارف بس أنا قصدي أبعت رسالة إنك مش محتاج تستنى حد عشان تقوم و تتحرك و تحول الأحلام و الأقوال لأفعال
و آخر حاجة: قولوا ما شاء الله لا قوة إلا بالله!! ههههههه
السلام عليكم و رحمة الله و بركاته

[badnamef4]

أنا آسف يا جماعة بس أنا مضطر أحذف الموضوغ
أنا كنت مستني إن الطلبة من كل كلية تقول اللي عندها عشان نتنافس في الخير و كده لكن الظاهر كده إني مبعرفش أعمل مواضيع كويسة أو الموضوع مش مهم بالنسبة للناس اللي قرته
و لذا أطلب من الإدارة حذف الموضوع

[badnamef4]

طب سيبيكو من حوار الحذف ده طالما مش ناويين تحذفوا
أنا حاسس إني بأدن في مالطة
طب حد يدخل يقول لي إيه اللي أنا عملته غلط في الموضوغ ده؟ يقول على الأقل إن الموضوع كده كله على بعضه مش عاجبه عشان أرتاح نفسياً؟
أصلي و أنا بكتب الموضوع كان نفسي بجد إن حوار new stage يبقى في كل الكليات و نبتدي بحاسبات عين شمس و حلوان اللي قريبين منا مكاناً
و كان نفسي إن طلبة حاسبات اسكندرية و أسيوط و الجي يو سي و أي حاسبات في الدنيا تطلع تقول احنا عندنا كذا و كذا و كذا مميز فنحاول احنا بتوع القاهرة نعمل زيكم و نطور أفكاركم و نعلا بكليتنا و نقعد نتنافس
أنا حاسس إني الوحيد المهتم بالفكرة دي أو إن الفكرة فيها حاجة غلط. طب لو حد تاني مهتم بالفكرة دي يا ريت يعمل هو الموضوع و يثبته و أنا هشارك فيه

[Neno0o]

موضوع جامد ع فكرة
بس بالنسبة لى حكاية الاقسام لسه التخصص من سنة 3 يعنى موش لازم الاستعجال عليها اوى يعنى

[badnamef4]

الحمد لله أنا فرحان جداً أخيراً حد رد
شكراً جداً على ردك
هو الإيفنت مش عن الأقسام بس هو الإيفنت بيعرفك على كل حاجة في الكلية اللي ليك و اللي عليك و عشان هما عارفين إن طلبة كتير هيحبوا يسألوا على الأقسام في سنة أولى عشان كده عرفونا بيها مش أكتر و كانوا دايماً يقولولنا إن لسه بدري أوي على اختيار الأقسام
و كمان بيعملولنا لعب و جو أخوي أسري إيجابي يساعدنا على دخول الكلية و حاجات تانية كتير
أنا بس حطيت الفيديوهات بتاعة الأقسام عشان هي دي الإسكيتشات اللي هما عاملينها و رافعينها على النت
بس بشكرك برده على ردك و لو ينفع تقول لي ليه الموضوغ مفيش عليه إقبال؟ أصلي بجد كان نفسي إني أشوف إيه اللي كل كلية حاسبات في مصر عاملاه و لو كويس أحاول أعمل زيه
السلام عليكم و رحمة الله و بركاته

[amkmm]

اولا ومن غير مجاملة الموضوع حلو جدا
ثانيا معظم كليات القمة بتعمل الموضوع ده وهو التعريف بالكلية وهيئة التدريس
كان نفسي كليتي يبقي فيها ده بس لاسف هي ناقصة كتير
انا كان ممكن احول منها بس قولت لا وهاكمل فيها
انا من الاسكندرية وفي حاسبات المنيا
وممكن اقولك انا كل الكليات او معظم الكليات مفيهاش الموضوع ده
فالشاف الموضوع اكتفي بالحسرة
وشكرا انك اثبت ان الحاسبات من كليات القمة

[badnamef4]

العفو مع إني مش شايف إن فيه حاجة اسمها كلية قمة و كلية مش قمة أنا شايف إن الكلية اللي انتا فيها طالما إنك كويس فيها تبقى هي كلية القمة بتاعتك
ممكن تقول لي هما بيعملوا إيه؟ أصل عندنا ألعاب و نقاشات و حاجات لذيذة جداً بجانب التعريف بالكلية و أقسامها و مبانيها و الناس اللي فيها من دكاترة و معيدين و إداريين لمدة 6 أيام و بجد بيعملوا جو أخوي جداً
فبجد لو ينفع تقول لي هما بيعملوا إيه في الكليات دي عشان لو فيه حاجة نقصانا نعملها احنا كمان؟
و بالنسبة لحتة إن الموضوع ده مش موجود في كليتك أنا زعلان بجد بس هما جابوا واحد من مؤسسي 180 درجة ( الأسرة اللي عاملة النيو ستايج ده ) و قال إن الموضوع كله بدأ باتنين. بعد كده بقوا أربعة بعد كده لما اشتغلوا بدأوا يزيدوا و يزيدوا لحد ما وصلوا للي هما فيه دلوقتي فيا ريت بجد تحاول تنشر الفكرة في كليتك و تصر عليها و تخلي كل الناس تشارك و تشوف مين بيعرف ينظم و كده و ماتستناش دكتور ولا إداري يعمل لك اللي انتا عايزه. نصيحة بجد. و ربنا يوفقك و يوفق الكل.
معلش أنا طولت حبتين بس أكيد فيه حاجات مميزة برده في كليتك ينفع تقول لي عليها عشان أحاول أبقى أحسن منك؟

[ya so]

انا بعت رد من فتره بس المنتدى هنج عندى ف كسلت اكتب تانى بصراحه

المهم احنا عندنا كده كمان ف حلوان بس مش عندنا موضوع الاسر ده بس ف اتحاد الطليه و رعايه الشباب و متطوعين

عملوا حاجات كتير

يعنى ف بدايه الدراسه بيقوم العميد و نخبه من دكاتره الكليه من كل قسم - يعنى ع الاقل واحد من كل قسم - و رئيس اتحاد الشباب و دول بيعملوا ويلكم داى و ده عباره عن محاضره صغيره كده بيشرحوا فيها الدراسه و نظامها و كل دكتور بيتكلم عن قسمه و بوضحه و كده

و طبعا علشان اختلاف نظره الطالب عن الدكنور ف الدراسه و الكليه ف علشان كده بيتعمل عندنا ف بدايه كل سنه ويلكم بارتى و دى حفله صغير بتتزين فيها الكليه و بتوزع حلويات و كده - حفله ع الضيق يعنى - بس دى بيقوم بيها مجموعه من الطلبه بيكونوا متطوعين علشان يفهموا اى حد من الدفعه الجديده اى حاجه محتاجينها و كده و الدراسه و نظامها و هكذا

احنا عندنا ويرليس ف الكليه كلها من زمان بس كان عندنا مشكله بس ف سيرفير الكليه و لما وصل كذه حد للمسئولين اننا بنعانى منه ساعات و كده ف قالوا هيغيروه بس معرفش ايه حصل بقى

عندنا متطوعين برضه قدموا طلب للعميد ان ف ناس من المدينه الجامعيه مش عندهم لاب توبس و ف حاجات محتاجين ينزلوها علشان المشاريع و كده و استجابت الاداره و فتحوا معملين للطلبه بحيث ان لو حد احتاج ينزل حاجه و كده و تطوع مجموعه انهم يحموا المعملين دول طول م هما مفتوحين و كده

و كمان عندنا مشاكل ف بعض الكمبيوترز ف اتشكل فريق برئاسه معيدين و كده و الفريق ده من الطلبه عادى بس ف ناس بتعرف ف النتورك كويس و السيت اب و كده و ظبطوا كل المعامل و نزلوا ويندوز جدبده و ابونتوا و كده

عندنا بتقوم ف الكليه انشطه كتير و دورات شطرنج و كده و عندنا ف الدور الارضى صاله بينج بونج و اى حد بيلعب فيها عادى و بتقوم مسابقات عادى برضه و فى مسابقات غنا و تمثيل و شعر

عندنا المعيدين و الدكاتره كويسين جدا و فوق الممتازين - الا ما قل يعنى - و بيساعدوا الطلبه ف اى وقت و طول السنه
يعنى بيعملوا انشطه ف الكليه ف الاجازه تفيدنا و كده و الاجازه دى عملوا سيرش لاب و كده

بيقوم عندنا سيشنز من ميكروسوفت و اى تريبل اى و شركات سوفت كتير
و بيجلنا ناس متخرجين يساعدونا ف المواد اللى عندنا و ناس برضه اشتغلت و يعملوا سيشنز بموافقه العميد طبعا و يشرحولنا سوق العمل و اللى حصل فيه ايه و كده

ف طلبه متطوعين بيعملوا اون لاين سيشنز بتساعدنا ف الدراسه برضه او بيشرحوا اى حاجاه جديده تساعدنا بعدين و كده

عندنا موديل بنرفع عليه الاسيمنتس و كوبى من البروجيكتز و هكذا و بينزل عليه المطلوب مننا بعد كده و كده

اتعمل برضه ذى موديل او سيت عليه بيان حاله ل كل طالب و ناقصله قد ايه و ياخد قد ايه و المفروض تسجيل المواد يكون عليه بس للاسف لسه بيعدلوا فيه و كده

لسه متركب عندنا ف الكليه شاشات ال سى دى علشان يعرضوا فيها اى جديد او اى بيان من العميد و غيره

و بيقوم ايفتنز ف الكليه كتير و لو ف ابفينت بره ف ساعات بيطلعوا اتوبيسات توصل الناس و كده لو المكان بعيد - حتى لو ف الاجازه -

المعيدين بصراحه ف غايه الاحترام و المساعده و معانا طول السنه و لحد اخر لحظه بيشرحوا و بيساعدنوا لو حتى اون لين
يعنى ممكن معيد يبقى فاتح اون لاين الفجر مثلا قبل امتحان معين و نسالوا عن حاجه و يشرحهالنا و كده

ف انشطه و حاجات كتير بيعملوها بجد بس دول اللى انا فكراهم و لو افتكرت تانى اكيد هقول علشان الكل يستفاد و الاحسن دايما نطبقوا ف كل كليه

و الموضوع كويس فعلا بس لو هيبقى ف تنفيذ للافكار اللى بتحصل ف كل كليه

[yami677]

المشاركة الأصلية كتبت بواسطة ya so

انا بعت رد من فتره بس المنتدى هنج عندى ف كسلت اكتب تانى بصراحه

المهم احنا عندنا كده كمان ف حلوان بس مش عندنا موضوع الاسر ده بس ف اتحاد الطليه و رعايه الشباب و متطوعين

عملوا حاجات كتير

يعنى ف بدايه الدراسه بيقوم العميد و نخبه من دكاتره الكليه من كل قسم - يعنى ع الاقل واحد من كل قسم - و رئيس اتحاد الشباب و دول بيعملوا ويلكم داى و ده عباره عن محاضره صغيره كده بيشرحوا فيها الدراسه و نظامها و كل دكتور بيتكلم عن قسمه و بوضحه و كده

و طبعا علشان اختلاف نظره الطالب عن الدكنور ف الدراسه و الكليه ف علشان كده بيتعمل عندنا ف بدايه كل سنه ويلكم بارتى و دى حفله صغير بتتزين فيها الكليه و بتوزع حلويات و كده - حفله ع الضيق يعنى - بس دى بيقوم بيها مجموعه من الطلبه بيكونوا متطوعين علشان يفهموا اى حد من الدفعه الجديده اى حاجه محتاجينها و كده و الدراسه و نظامها و هكذا

احنا عندنا ويرليس ف الكليه كلها من زمان بس كان عندنا مشكله بس ف سيرفير الكليه و لما وصل كذه حد للمسئولين اننا بنعانى منه ساعات و كده ف قالوا هيغيروه بس معرفش ايه حصل بقى

عندنا متطوعين برضه قدموا طلب للعميد ان ف ناس من المدينه الجامعيه مش عندهم لاب توبس و ف حاجات محتاجين ينزلوها علشان المشاريع و كده و استجابت الاداره و فتحوا معملين للطلبه بحيث ان لو حد احتاج ينزل حاجه و كده و تطوع مجموعه انهم يحموا المعملين دول طول م هما مفتوحين و كده

و كمان عندنا مشاكل ف بعض الكمبيوترز ف اتشكل فريق برئاسه معيدين و كده و الفريق ده من الطلبه عادى بس ف ناس بتعرف ف النتورك كويس و السيت اب و كده و ظبطوا كل المعامل و نزلوا ويندوز جدبده و ابونتوا و كده

عندنا بتقوم ف الكليه انشطه كتير و دورات شطرنج و كده و عندنا ف الدور الارضى صاله بينج بونج و اى حد بيلعب فيها عادى و بتقوم مسابقات عادى برضه و فى مسابقات غنا و تمثيل و شعر

عندنا المعيدين و الدكاتره كويسين جدا و فوق الممتازين - الا ما قل يعنى - و بيساعدوا الطلبه ف اى وقت و طول السنه
يعنى بيعملوا انشطه ف الكليه ف الاجازه تفيدنا و كده و الاجازه دى عملوا سيرش لاب و كده

بيقوم عندنا سيشنز من ميكروسوفت و اى تريبل اى و شركات سوفت كتير
و بيجلنا ناس متخرجين يساعدونا ف المواد اللى عندنا و ناس برضه اشتغلت و يعملوا سيشنز بموافقه العميد طبعا و يشرحولنا سوق العمل و اللى حصل فيه ايه و كده

ف طلبه متطوعين بيعملوا اون لاين سيشنز بتساعدنا ف الدراسه برضه او بيشرحوا اى حاجاه جديده تساعدنا بعدين و كده

عندنا موديل بنرفع عليه الاسيمنتس و كوبى من البروجيكتز و هكذا و بينزل عليه المطلوب مننا بعد كده و كده

اتعمل برضه ذى موديل او سيت عليه بيان حاله ل كل طالب و ناقصله قد ايه و ياخد قد ايه و المفروض تسجيل المواد يكون عليه بس للاسف لسه بيعدلوا فيه و كده

لسه متركب عندنا ف الكليه شاشات ال سى دى علشان يعرضوا فيها اى جديد او اى بيان من العميد و غيره

و بيقوم ايفتنز ف الكليه كتير و لو ف ابفينت بره ف ساعات بيطلعوا اتوبيسات توصل الناس و كده لو المكان بعيد - حتى لو ف الاجازه -

المعيدين بصراحه ف غايه الاحترام و المساعده و معانا طول السنه و لحد اخر لحظه بيشرحوا و بيساعدنوا لو حتى اون لين
يعنى ممكن معيد يبقى فاتح اون لاين الفجر مثلا قبل امتحان معين و نسالوا عن حاجه و يشرحهالنا و كده

ف انشطه و حاجات كتير بيعملوها بجد بس دول اللى انا فكراهم و لو افتكرت تانى اكيد هقول علشان الكل يستفاد و الاحسن دايما نطبقوا ف كل كليه

و الموضوع كويس فعلا بس لو هيبقى ف تنفيذ للافكار اللى بتحصل ف كل كليه

كل ده عندنا في حلوان
واوووووووووووووووووووووووووووووووووووووووووووو:022 yb4:

[ya so]

المشاركة الأصلية كتبت بواسطة yami677

كل ده عندنا في حلوان
واوووووووووووووووووووووووووووووووووووووووووووو:022 yb4:

ايوه و اكتر من كده بس مش هتحسى اوى ب اللى بيحصل غير ف تانيه او ع الاقل الترم تانى ف اولى علشان ف بدايه سنه اولى بتبقى الدفعه تايهه و مش فاهمه حاجه

بس متقلقيش يعنى اول م تبتدى المشاريع و الشغل بجد هتعرفى قد ايه هناك بيساعدوا و لو سألتى اى حد اكبر منك مش هتلاقى حد بيبخل و ساعات ناس بتعمل سيكشنز تشرح اى ماده هما فاهمينها و ف دفعه مش فاهماهم كويس و كده

ده غير ان فى تدريب صيفى تبع مركز الحساب العلمى ف الصيف و كده

ان شاء الله هتستمتعى ف الكليه

[badnamef4]

شكراً شكراً شكرأً بجد اللي انتي عملتيه هو اللي كنت بحلم بيه
أنا أكتر حاجات عجبتني احتمال ماتبقاش موجودة عندنا هي حوار المدينة الجامعية للأسف فعلاً معرفش إيه أخبار الطلبة فيها محتاجين إيه و كده
و برده موضوع الأون لاين سيشنز ده احنا محتاجين نطور نفسنا فيه. احنا عندنا طلبة متطوعين بتشرح لبعض لكن إنه يكون أون لاين إن شاء الله لازم نحسن نفسنا فيه و شكراً إنك نبهتينا لحاجة زي كده
و الباقي احنا كمان عندنا تقريباً أغلب الحاجات ( كنت فاكر إننا الوحيدين اللي عندنا الحاجات دي بس الحمد لله أنا فرحان و إن شاء الله يبقى في كل حتة الكلام ده)
و خدوا عندكم الفكرة دي لو حبيتو تنفذوها عندكم. احنا ( أو الطلبة الأقدم منا و الخريجين بصراحة ) معلقين سبورات بيضة في مكان كده عاملينه اسمه fci city بحيث إن لو أي حد جات له أي فكرة يكتبها على طول قبل ما تروح و لو ناس عايزة توضح حاجات لبعض و ليها استخدامات كتيرة يعني. و الفكرة دي الصراحة واخدينها من شركة جوجل
مش عيب إننا لما نشوف حد أحسن منا نحاول نتعلم منه و نبقى أحسن منه كمان بس اللي يشوف اللي شفناه من شكرات زي جوجل و مايكروسوفت يحس إنه مستحيل إنه يعوز يروح أبداً من المكان اللي هناك، تحس إن المكان ده بتاعك و المكان ده هو مكان راحتك مش نظام هاعصرك و الكلام ده. فمش عيب إننا إن شاء الله نشوف إيه اللي يناسبنا من الكلام ده و نعمل أحسن منه عندنا
أنا طولت أوي عامة شكراً أوي ya so و yami667 على ردكم الكريم

[ya so]

المشاركة الأصلية كتبت بواسطة badnamef4

شكراً شكراً شكرأً بجد اللي انتي عملتيه هو اللي كنت بحلم بيه
أنا أكتر حاجات عجبتني احتمال ماتبقاش موجودة عندنا هي حوار المدينة الجامعية للأسف فعلاً معرفش إيه أخبار الطلبة فيها محتاجين إيه و كده
و برده موضوع الأون لاين سيشنز ده احنا محتاجين نطور نفسنا فيه. احنا عندنا طلبة متطوعين بتشرح لبعض لكن إنه يكون أون لاين إن شاء الله لازم نحسن نفسنا فيه و شكراً إنك نبهتينا لحاجة زي كده
و الباقي احنا كمان عندنا تقريباً أغلب الحاجات ( كنت فاكر إننا الوحيدين اللي عندنا الحاجات دي بس الحمد لله أنا فرحان و إن شاء الله يبقى في كل حتة الكلام ده)
و خدوا عندكم الفكرة دي لو حبيتو تنفذوها عندكم. احنا ( أو الطلبة الأقدم منا و الخريجين بصراحة ) معلقين سبورات بيضة في مكان كده عاملينه اسمه fci city بحيث إن لو أي حد جات له أي فكرة يكتبها على طول قبل ما تروح و لو ناس عايزة توضح حاجات لبعض و ليها استخدامات كتيرة يعني. و الفكرة دي الصراحة واخدينها من شركة جوجل
مش عيب إننا لما نشوف حد أحسن منا نحاول نتعلم منه و نبقى أحسن منه كمان بس اللي يشوف اللي شفناه من شكرات زي جوجل و مايكروسوفت يحس إنه مستحيل إنه يعوز يروح أبداً من المكان اللي هناك، تحس إن المكان ده بتاعك و المكان ده هو مكان راحتك مش نظام هاعصرك و الكلام ده. فمش عيب إننا إن شاء الله نشوف إيه اللي يناسبنا من الكلام ده و نعمل أحسن منه عندنا
أنا طولت أوي عامة شكراً أوي ya so و yami667 على ردكم الكريم

ايوه موضوع البورد ده اتناقش و جابوا سمارت بوردز - الى هيا سبورات الكترونيه كده ذى الكمبيوتر بس سبورات- و المفروض كانوا حطوها من السنه اللى فاتت بس علشان جايبين كميه كبيره منها و كده و احنا مش متعوجين عليها ف خايفين تحصل حاجه او استخدام غلطط ف ف مشروع انهم يدربونا عليها قبل م ينزلوها

هى موجوده ف الكليه فعلا بس لسه مش اتحطت

و ف ناس فكروا انهم ينزلوا البورد البيضه دى و كده بس قالوا بم ان كده كده عندنا السمارت ف ليه نضيع مصاريف ع حاجه مؤقته و هنشيلها تانى و كده

و بالنسبه لموضوع fci city ف الكليه كلها جناين اصلا و الويرليس بيلقط بره فيها ساعات ف اعتقد مش محتاجين نعملها عندنا و كده

و انا سعيده فعلا بتبادل الثقافات ده

و يارب كلنا نستفاد من بعض للى ف مصلحتنا دايما

و عموما الكلام ده كان السنه اللى فاتت ف ان شاء الله لما تيجى الدراسه هشوف ايه الجديد علشان بيقولوا ف تغيريات و كده و لو عرفت هبقى اقولكوا باذن الله

[yami677]

المشاركة الأصلية كتبت بواسطة ya so

و بالنسبه لموضوع fci city ف الكليه كلها جناين اصلا

مش كلها كلها يعني
صح

[badnamef4]

آآآآه ما شاء الله.
لا الصراحة احنا معندناش سمارت بوردز و الوايرلس مابيوصلش في كل حتة لكنه بيوصل في fci city كلها
الصراحة احنا عندنا مشكلة كبيرة أوي في إمكانيات الكلية ذات نفسها يعني الأماكن عندنا قليلة جداً جداً جداً و دي مشكلة كبير جداً عندنا
لكن الحمد لله نقطة قوتنا الناس - الموارد البشرية ما شاء الله و اللي بتعمله
أنا عارف آه إن حلوان اتجددت قريب فبقت تحفة
مش مشكلة إن شاء الله هنبقى مش زيكم و بس لا هنبقى أحسن منكم كمان حتى لو ماتوفرلناش أي إمكانيات خارجية و الإمكانيات هي إمكانياتنا بس و ربنا يوفقنا
خلاص هدف من الأهداف اللي هابقى أحطها في بالي إني أحاول أعمله في كليتي في السنين الجاية إن شاء الله إننا نبقى أجمل من حاسبات حلوان

[ya so]

ع فكره احنا عندنا امين اتحاد الطلبه بيقول انه بيدفع من معاه هو و اللى معاه و كده علشان يساهموا انهم يطوروها

عندنا برضه مشكله ف الامكانيات و ف م]رجات ف الكليه - مش مدرجات الجامعه انا قصدى اللى جوه الكليه - مش فيها ولا تكييف ولا بروزيكتورز بس بدأوا الى حد ما يظبطوا و يصلحوا التكييفات و المراوح و كده بس بعد طلوع الروح لان ف الاول و الاخر حلوان او القاهره او غيره كليات حكوميه و الروتين اللى ف الحكومه عمره م هيتغير

ده حتى المصلى بتاع البنات و الولاد احنا جمعنا من بعضنا و جددناهم و حطينا فيها حاجات و كده

و ان شاء الله كلنا نتافس ف الخير ذى م انت بتقول و ف الاول و ف الاخر ده ف مصلحتنا كلنا و ربنا يقدم اللى فيه الخير