#حلمك

فن المذاكرة · #1 07-08-2017, 07:55 PM

كل واحد فينا عند حلم نفسه يحققه وعنده هدف عايز يوصله
طيب. حد من الناس اللى هنا نفسها تحقق حلمها ؟
اها سامع واحد رد اهو ؟؟ اكيد بتمني احقق حلمي 😍
طيب يابن الناس انت عملت ايه عشان تحقق حلمك ؟..
امممممم معملتش حاجه قاعد حاطط ايدي ع خدي وقاعد 😌
طيب أنت هتزعل لو محققتش حلمك دا ؟
هزعل ايه يا عم انت دا انا هموت 😭
طب مش المفروض انك تذاكر وتجتهد ومتضيعش وقت عشان تحقق حلمك ومترجعش تندم ؟
والله المفروض كدا بس للاسف مش عارف اذاكر 😔
ليه يا عم... والله عندي ظروف ومشاكل ماثره ع حالتي النفسيه ومش عارف اذاكر
ظروف ومشاكل زي ايه.. مشاكل ف البيت والجو ف البيت وضغط اهلي عليا جامد... دول عاوزني طول الوقت بذاكر ولو سبت الكتاب شويه يهزقوني وكمان المدرسين ببعاملوني وحش وكل شوية انت مش نافع انت فاشل والكلام دا 😓......... ومن ناحية تانيه صحابي كل يوم نسهر ونهرب من الدروس.. وكمان ف بنت بحبها اوي بس أهلها ف مشاكل ومش هيوافقوا عليا... والاسباب دي ماثره ع نفسيتي وتعباني جامد 😓
بص يا ابن الناس بالنسبه لاهلك فهما بيعملوا كدا عشان مصلحتك يمكن طريقتهم مش صح شوية.... بس مفيش حد بيحبك وبيخااف عليك اكتر من اهلك... اهلك عايزينك احسن واحد ف الدنيا... وبعدين مينفعش تلومهم عشان كدا لان دا ف مصلحتك.. انت متقدرش تزعل منهم الا ف حاله واحده لما تكون عاوز درس مثلا ويقولولك لأ ومعتقدش ان ف حد اهله بيعملوا كدا لان كل واحد فينا اهله عاوزينه احسن واحد. ف الدنيا 😍
بالنسبه للمدرسين مش هقعد احكي بس هقولك صاحبك الشاطر ال عارف مصلحته وبيذاكر المدرسين بيعاملوه ازاي اسال نفسك هما ليه بيعاملوه كويس وبيعاملوك وحش... جاوب نفسك.. وحاول تبقي زيه بدل ما تقعد تلوم فى نفسك عالفاضى
صحابك بقي بص ياباشا صاحبك ال بجد هو ال عاوز مصلحتك هو ال يشجعك للخير ولمصلحتك مش ال ياخد بايدك للشر او يضرك.. وانت متعرفش .. ما صاحبك ممكن يكون بيذاكر من وراك بدليل انه بيجاوب مع المستر وانت قاعد مش عارف حاجه.. هتقولي لا ياعم انا وصحابي مبنبقاش عارفين حاجه زي بعض.. طب ماصاحبك ممكن يكون عارف انه هيدخل خاص وانت ممكن ظروفك ماتسمحش وهيبقي كدا احسن منك.. فانت اتجدعن وشوف مصلحتك وصاحبك اللى يضرك فكك منه وتاكد أن اللى يضرك او يضيعلك وقتك مينفعش تصاحبه
وحكاية الحب دي مش هقول غير كلمتين بس
تفكيرك هيتغير وهتضحك على الحب ده كمان سنه من دلوقتي .. ولو مزنوق اوى وعايز تحب بلاش تضيع وقت كتير
فانت اتجدعن وشوف مستبقلك احسنلك عشان محدش هيفرحلك قدك وبردو انت اكتر واحد هتزعل ع نفسك وانت ال هتدايق لما تلاقي واحد ظروفه اصعب منك ومش عايش عيشتك وبقي احسن. منك
قوم شوف مصلحتك ومستقبلك وانا قولتلك قبل كدا لسه قدامك فرص كتير غيرك بيتمناها ولو ظروفك فعلا صعبه... طيب بص تخيل نفسك كدا وانت محقق حلمك برغم ظروفك دي..
ها.. شايف نفسك ازاي ؟ زي ال عمل انجاز كبير صح ؟ . عليت ف. نظر نفسك والكل بقي بيحترمك صح ؟... طب ماتعمل كدا فعلا وتحقق الانجاز واتحدي الظروف دي واغلبها وهقولك حاجه ...... طعمم النجاح بيبقي دايما احلي كل ما التحدي بيبقي اصعب.. 😍
ولازم النجاح يبقي صعب عشان اللى يستاهله بس هو اللى يوصله وانت مش اقل من اللى قبلك فى حاجة 💪
ربنا معاكو يا حبايبى ويحققلكو كل اللى نفسكو فيه ويفرحكو ويفرح اهلكو بيكو والسنه الجاية تبقو فى المكان اللى بتتمنوه
قوم يلا ذاكر و وعد منى هدعيلك ونفسي انت كمان تدعيلى وتوصل البوست ده لكل اللى فى ثانوية