العلاج بالتيارات الكهربية Electrical Currents

[DPT-Blue Phoenix]

‫#‏العلاج_الكهربى‬
‫#‏العلاج_يالتيارات_الكهربية‬
‪#‎Electrotherapy‬
‪#‎Electrical_Currents‬
‪#‎Electrical_Stimulation‬

- ‏‎devil‎‏ رمز تعبيري ‏‎devil‎‏ رمز تعبيري ‏‎devil‎‏ رمز تعبيري المرة دى بقى هنتكلم عن العلاج بالكهرباء يعنى هتكهرب المريض و حاجات كتير كدا .. مصطلح العلاج الكهربى ممكن نسخدمه كمصطلح عام للاجهزة فى العلاج الطبيعى لكن احنا هنا هنتكلم عن العلاج بالطاقة الكهربية ..

- ايه بقى حكاية العلاج الكهربى دى ؟! هل فعلا زى ما احنا متخيلين ان المريض قاعد يتعذب طول الجلسة كدا و خلاص ؟! طيب اكيد الاجهزة المرة دى ليها كابلات طيب هل الكابلات الصغيرة دى او الالكترودات Electrodes بتتحط فى اى مكان فى الجسم ولا اماكن معينة ؟! و ايه الحالات الى تخلينى استخدم الكهرباء فى العلاج ؟! و الى اى مدى الكهرباء فعالة فى علاج الامراض ؟! و هل ليها انواع ؟! و استخدامتها مداها محدود ولا واسع ؟! و ايه دورنا احنا فى دا ؟!

- ‫#‏العلاج_بالتيارات_الكهربية‬ : هو استخدام الطاقة الكهربية فى العلاج عن طريق امرار التيار الكهربى فى الانسجة سواء الانسجة دى قابلة للاستثارة زى الاعصاب و العضلات او الانسجة دى غير قابلة للاستثارة زى باقى انسجة الجسم .. وسائل العلاج بالكهرباء تعتبر من اقدم وسائل العلاج فى العلاج الطبيعى و تعتبر من اكتر الوسائل اتساعا تقريبا تستخدم فى علاج معظم الامراض فى العلاج الطبيعى ..

- العلاج بالتيارات الكهربية متنوع جدااااااا لانه بيتعمد على حاجات كتير منها نوع التيار نفسه اذا كان تيار كهربى مباشر Direct Current و دا تيار احادى الاتجاه ليه قطب موجب و قطب سالب ثابتين يعنى اتجاه التيار واحد .. او تيار متردد Alternating Current و دا تيار بيحصله انعكاس دائما عبارة عن قمة و قاع ..

- ممكن التيارات دى تكون مستمرة يعنى التيار شغال على طول Continuous او ممكن يكون تيار متقطع يعنى يشتغل شوية و يقف شوية Interrupted or pulsed ..

- التردد ممكن يكون تردد التيار عالى او متوسط او منخفض و دا بياثر جااااامد جدا فى طريقة عمل التيار الكهربى فمثلا التيارات المنخفضة التردد Low Frequency Current دى بتعمل استثارة و تنبيه للاعصاب الحسية و الحركية Sensory And Motor Nerves .. و دى بتكون من 1 - 1000 Hz
ممكن يكون تردد متوسط Medium Frequency Current و دا مش بيعمل استثارة بشكل مباشر لا هما بيكونوا اكتر من تيار نقول بيحصل بينهم زى تداخل كدا و التيار الناتج هو الى يدى تاثير و دى ليها فوائد كتير هنبقى نقولها بعد كدا يعنى بيعمل استثارة للاعصاب بعد التعديل و التداخل بين التيارات Stimulate Sensory and Motor nerves after modulation ..
ممكن يكون التيار دا عالى التردد High Frequency Current .. و دا بقى بيستعمل لتوليد موجات الانفاذ الحرارى الى هى Shortwave and Microwave Diathermy .. و دى بقى ولا بتعمل استثارة لاصعاب حسية و لا حركية ..

- غير عندنا بقى شكل الموجة نفسه اذا كانت عريضة او قصيرة او طويلة او غيرها بياثر شدة التيار نفسه بتاثر و الشدة الى بنستعملها فى العلاج بتكون بالميللى امبير غالبا الا بعض التيارات بتكون بالميكرو امبير .. و الميللى واحد على الف و الميكرو واحد على مليون من الامبير .. و الامبير وحدة قياس الشدة الكهربية Intensity تخيل ؟! يعنى مش زى ما انت فاكر دا شدة بسيطة جدا مش هتموت المريض يعنى ..

- ‫#‏ملاحظة_مهمة‬ : لازم دائما دكتور العلاج الطبيعى يغير فى الشدة و يغير فى العوامل الى عنده عشان بيحصل خاصية اسمها التاقلم او التعود Accommodation or Adaptation يعنى الانسجة الى بيحصلها استثارة دى تتعود على الشدة او الجرعة الى انت بتديهالها فمعدتش تعمل تاثير عشان كدا لازم دائما نغير سواء بقى من الشدة او التردد او شكل الموجة او غيره ..
غير كدا ناخد بالنا ان التيارات المستمرة و المتصلة دى بتعمل Accumulation Of charge تخيل كدا انت عمال تشحن الانسجة بشحنات سالبة بدون تقوف فيحصل تجمع للشحنات السالبة و دا يعمل مشاكل جامدة فلازم تكون فى فترات راحة لو هتستعمل انواع التيارات دى ..

- ‫#‏الالكترودات‬ او الكابلات دى بيختلف عددها ممكن يكون الكترود واحد بس بيطلع كهرباء يعنى سالب و التانى موجب و دا اسمه Monopolar technique ممكن يكون كابلين بيطلعوا كهرباء مع بعض و دا اسمه Bipolar technique ممكن يكون 4 كابلات بيطلعوا كهرباء و دا اسمه Quadripolar technique و طبعا احنا بنختار على حسب حجم المنطقة الى عايزين نعالجها و حالة المريض ..

- يبقى لحد دلوقت المريض ولا قاعد بيتعذب ولا حاجة و التيارات دى فيها تنوع كبير جدا جدا جدا و بيختلف تاثيرها باختلاف الشدة و التردد و غيره ؟! دلوقت هل انا اقدر احط الالكترودات دى فى اى مكان فى الجسم ؟!
لاااااااااا طبعا دى ليها نقط محددة فى الجسم بحطها عندها فى انواع نقط كتير فى نقاط الوخر بالابر او الطب الصينى و دى ليها تاثيرات على طاقة الجسم Acupuncture Points فى مثلا النقاط الحفازة و دى اماكن بتبقى اكتر اماكن متركز فيها الالم Trigger points و فى كتير جدا و غالبا احنا بنستعمل نوع من النقط اسمه نقاط الحركة Motor Points و دى اماكن اتصال عصبى عضلى يعنى اماكن اتصال العصب بالعضلة Neuro-muscular ...

- ‫#‏مستويات_الاحساس‬ ‪#‎Sensation_Levels‬ : المستويات دى هى مستويات انا بشتغل عليها لما اضبط شدة التيار و التردد بتاعى فمثلا
1- لما استخدم ‫#‏تردد_عالى_مع_شدة_قليلة‬ انا بشتغل على مستوى اسمه Sensory Level و المستوى دا استخدامه الاساسى اننا نقلل الالم Decrease Pain
2- Motor Level المستوى دا بستعمل فيه شدة عالية و تردد قليل و دا بستعمله بشكل اساسى عشان اعمل انقباض فى العضلات و اقويها .. Muscular Contraction
و فى حاجات تانية كتير ..

- ‫#‏آثار_التيار_الكهربى_على_الجسم‬ : آثاره كتييييييييير جداااااااا جدا جدا بس هنقولها بشكل ملخص بيعمل تقوية للعضلات Muscle Strengthening لانى لما بعمل تيار يخلى العضلة تنقبض تبدا العضلة يحلصها تقوية بيقلل الشد فى العضلات لما ببدا اشتغل على ممرات الالم و اقفلها و غير كدا ان التيارات دى بتنبه الجهاز العصبى السمبثاوى و دا يخلى الدورة الدموية تزيد و كمان بيؤدى لافراز مواد كيميائية تعمل على زيادة الدورة الدموية و كمان نتيجة نقباض العضلات دا يعمل حركة ضخ للدم و برده يزود الدورة الدموية .. بيقلل ال Edema و دا من خلال حركة انقباض العضلات الى بتعمل صرف لتجمع السوائل دى و توديها على الطريق الوريدى و الليمفاوى و نتخلص منها .. بتعمل على تشفى الانسجة Tissue Healing لاننا بنقدر نعمل جذب كهربى سواء بالقطب الموجب او السالب لانواع معينة من الخلايا الى تقدر تصلح من الجسم و بدون آثار جانبية و من نفس المنطق نقدر نستعملها فى التئام الكسور و الجروح و نقدر نستعملها مع العضلات الى العصب بتاعها اتقطع Denervated Muscle لان العصب اتقطع العضلة مش بتنقبض فلو دا استمر العضلة يحصلها ضمور و تموت Muscle Atrophy فاحنا بنقدر نعمل انقباض للعضلة على ما العصب يلتئم و بالتالى مش هتموت العضلة ..

-- و ليه موانع استعمال برده زى الاورام الخبيثة او السرطان يعنى لانه هيزود نشاطها مينفعش اعمل على شرائح و مسامير لانها هتعمل صدمة كهربائية للعيان و حاجات تانية كتير ..

-- ‫#‏الاستعمالات_المتعددة‬ : بنقدر من خلال جهاز مثلا اسمه Faradic اننا نقوى العضلات اننا لو عصب اتقطع و مش بيوصل اشارات كويس نمرر فيه تيارات كهربية و نخليه يوصل تانى كويس فى عمليات زراعة عضلات او اوتار نستخدمه عشان العضلة تشتغل كويس .. نقدر نستعمل اجهزة زى Diadynamic لعلاج مشاكل المفاصل زى مفصل الركبة مثلا .. نقدر بجهاز زى HVPS دا نوصل للاعصاب العميقة فى الجسم و نعالجها بدون فتح و عمليات و كلام من دا .. نقدر بجهاز زى Microcurrent نستعمله فى مشاكل الكسور فى العظام الى غير ملتئمة و الجروح .. نقدر باجهزة زى Interfrential Current اننا نعالج كتير من مشاكل العظام زى خشونة المفاصل و الكتف المتجمد و لين الغضاريف و نقدر نستعمله مع مشاكل النساء و التوليد زى السلس البولى Stress Continence و انقطاع البول و مشاكل الحوض نقدر نستعمله فى مشاكل الاعصاب زى عرق النسا Sciatica و غيرها ..
-نقدر بجهاز زى TENS اننا نقلل الالم باكتر من طريقة مثلا : نبعت تيارات كهربية فى عكس اتجاه تيارات الالم فتقوم تلغى بعضها Antidromic Activation نقدر مثلا ننبه تتابع من المواد الكيميائية فى الجسم الى بتسكن الالم و دا الجسم بيعملها بنفسه بدون تدخل احنا بس بنعملها استثارة Endogenous Opioid Mechanism نقدر نبعت اشارات كهربية تسد طريق و ممرات الالم Gate Control Mechanism نقدر نشحن اعصاب الالم نفسها بترددات اعلى من قدرة تحملها فتتعب بمتقدرش تشيل اشارات و بالتالى الالم يخف و دى الجلسات الى بيكون فيها نسبة وجع ..

- و طبعا كل حاجة ليها وقتها و الحالة الى استخدمها معاها و انت من خلال معرفتك و دراستك للتيارات الكهربية و النقط الى فى الجسم و الاجهزة تقدر تحدد كل حالة هستعمل معاها ايه و امتى و ازاى ؟! مش بس كدا انت هنا كل الى بتعمله انك بتنشط حاجات معينة فى الجسم و الجسم بيعالج نفسه بنفسه و بدون اى آثار جانبية الجسم ربنا خلقه اعظم من اى دواء و اى جراحة و هى دى عظمة العلاج الطبيعى افتخر بمجالك ..

العلاج الطبيعى العلاج بالتيارات الكهربائية ..

[yoyo caty]

السلام عليكم
بجد انا مش عارفة اشكر حضرتك ازاى كان لازم اكتب الكومنت ده من بدرى كأقل شكر لحضرتك ... انا زميلة لحضرتك فالفرقة الاولى علاج طبيعى القاهرة
بجد المواضيع اللى بتنزلها كانت سبب رئيسى انى اقتنع انى ادخل الكلية ... و مازلت بتابع كل المواضيع الجديدة لحضرتك . قد ايه بنبهر بمجال العلاج الطبيعى و انه مجال فعلا متشعب
جزاك الله خيرا ربنا يجعله في ميزان حسناتك ان شاء الله و انا بجد بشجع التوعية اللى حضرتك بتعملها عن الكلية و فعلا مع مرور الوقت هيتغير كل المفاهيم الخاطئة عند بعض الناس

[DPT-Blue Phoenix]

المشاركة الأصلية كتبت بواسطة yoyo caty

السلام عليكم
بجد انا مش عارفة اشكر حضرتك ازاى كان لازم اكتب الكومنت ده من بدرى كأقل شكر لحضرتك ... انا زميلة لحضرتك فالفرقة الاولى علاج طبيعى القاهرة
بجد المواضيع اللى بتنزلها كانت سبب رئيسى انى اقتنع انى ادخل الكلية ... و مازلت بتابع كل المواضيع الجد[size="4"[/size]يدة لحضرتك . قد ايه بنبهر بمجال العلاج الطبيعى و انه مجال فعلا متشعب
جزاك الله خيرا ربنا يجعله في ميزان حسناتك ان شاء الله و انا بجد بشجع التوعية اللى حضرتك بتعملها عن الكلية و فعلا مع مرور الوقت هيتغير كل المفاهيم الخاطئة عند بعض الناس

و جزاكم الله مثله ..
الله يخليكى و اهلا بحضرتك يا دكتور .
الحمد لله هو فعلا مجالنا متشعب و عظيم و دا واجبنا كلنا اتجاه مجالنا ..
و ان شاء الله محالنا مش مقتصر او هيقتصر بس على مواقع التواصل او المنتديات لا الحقيقة كمان ..

و ربنا معانا جميعا و يوفقنا ..
و شكرا جدا جدا على كلام حضرتك ..