ياللا ننزل كلنا لاسقاط الوزير ... بس بشرط

[zatoon]

لا أعلم لماذا تحذفون موضوعاتي...هل لأنها تخالف الرأي العام في منتداكم -اللي هو في الحقيقة منتدانا -
الآن أعيد نشر هذا الموضوع من جديد لكن لو حذفتوه قولولي بس ايه السبب؟


ممكن نتكلم شوية بهدوء؟.....صلوا ع النبي

الاخوة - الأعزاء - اللي بيدعوا لمظاهرات اسقاط الوزير ممكن لو سمحتم تسمعوا رأيي و تردوا عليا لأني لو اقتنعت بردودكم هنزل معاكم لاسقاط الوزير

اولا انتم وصفتم الوزير ده بأقبح الصفات وشتمتوه بألفاظ مش من الادب اني اعيدها تاني...طيب انا شخصيا شايف في الوزير ده مميزات مش موجودة في غيره ممن تولوا الوزارة وحتى مش موجودة في كل اللي بيشتموه

أولا هو احد المقاتلين في حرب اكتوبر...يمكن دي تقولوا عليها متخصناش....بس اللي اعرفه انه في يوم من الايام راح عشان يموت من اجل بلاده مش طلع يهتف في وقت الهتاف اصبح ببلاش

ثانيا : لما نقارن الوزير ده باللي قبله تفتكروا مين يكسب المقارنة؟هذا الوزير لم يأخذ معلما بالشبهة...لم ينقل مدرسا او يجازيه دون تحقيق...فماذا فعل من سبقه؟احمد زكي بدر عمل فيها المفتش كولمبو ونزل زيارات اعلامية كل هدفها اهانة المعلمين(ع فكرة : محدش من اخواننا اياهم طلع مظاهرة ايامها لاسترداد كرامة المعلم)...يسري الجمل اشترك في خطة خداع لتشويه قانون الكادر...حسين كامل بهاء الدين عمل مرة مسابقة للطلبة بجايزة 10 جنيه فورية لمن يبلغ عن معلم مدخن( حبذا لو قفشه من قفاه وسلمه للقسم )

ثالثا هذا الوزير هو اول من يعترف بان المعلم لا يحصل على ما يستحق حتى بوجود الكادر(ع فكرة هو اول من دعا لقانون الكادر لكن القانون اتعمل بعد اقالته)

رابعا: هذا الوزير هو اول من اقترح تدبير الاموال اللازمة للحد الادنى للمعلم من خلال رفع الدعم عن الوقود للمشروعات الاستثمارية وتحويل الفروق لاجور المعلمين

خامسا : بالله عليكم هل يملك الوزير صلاحيات رفع او خفض الاجور ؟...الموازنة لها محددات وهو لا يملك الا العرض الامين في ضوء الموارد وعجز الموازنة ومعدل التضخم

سادسا : هذا الوزير اول من تحدث عن حق المعلم في عدم القيام باعمال غير التدريس زي الامن او الوظائف الادارية مثلا(اعرف ان البعض لازال يقوم بهذه الاعمال لكن من حقه يعترض ومحدش يقدر يجازيه)

سابعا: المطالبات باقالة الوزير معرفش ممكن تعود علينا كمعلمين بايه بالظبط ؟ (قوليلي لو سمحتم)

ثامنا : لو وضعنا المطالبات دي زائد النزعة الثورة(المتتطرفة قوي والمضحكة قوي للبعض) زائد الهجوم الشديد على الاخوان(الناجحين في النقابة) تجد ان المسألة كدة رايحة في سكة المصالح(يعني المسألة ان المستقلة بتعرف تزعّق فتبقى اجدع من الاخوان)

اخيرا : تفتكروا عشان احصل على اعجابكم وردودكم اللذيذة كنت ممكن اكتب موضوع زي ده؟

طبعا انا منتظر منكم الويل والثبور وعظائم الامور لكن اهي كلمة حق واجري على الله

وسلامو عليكم

[محمد_لاشين]

انا معاك في كلامك..وبالعكس انا موافقك انه لاذم نعطي الوزير فرصه

لكن ليه الوزير ده واللي حضرتك بتقول انه مختلف عن اللي قبله

1- محاولش انه يتقرب من المدرسين او اللي ليهم مطالب ولو فئويه علشان يوضح موقفه وقدرته

2- ليه قصاد المطالبات والمظاهرات مطلعش قال انا مش قادر علي تنفيذها لانها مش في ايدي

3- ليه معملش خطه زمنيه لتحقيق المطالب بحيث انه لو استمر فيها خير وبركه ولو مشي فا اللي يجي بعده يمشي علي الاتفاق

4- يعرف ايه عن المدرس والتدريس علشان يقدر قيمه معاناته كل يوم طول السنه


ذي ما كلامك بيوضح تعاطفك الكامل نحو وزيرنا الحالي


فأمام مطالبنا المشروعه فتعاطفك لوحده مش كفايه


خطه زمنيه وخارطه طريق للمتطلبات المشروعه للمعلم و التعليم

واول واحد هيقف مع الوزير (المعلم) ذي ما وقف معاه وقت الثورة والدراسه استمرت

تقبل كلماتي بود