4 طرق مفتكسة.. للحصول على فراخ مشويّة بنكهات جديدة

[المستعصم بالله]

فراخ مشويّة بنكهة الروزماري والثوم والليمون




ما فيش حد فينا ما بيحبش الفراخ المشويّة، بس ساعات بنزهق من طعمها، علشان كده إحنا النهارده جبنا لكم أكتر من طريقة جديدة تقدروا بيها تعملوا أحلى وألذ وجبة فراخ مشوية بطعم جديد غير اللي متعوّدين عليه.. يلّا بينا ندخل المطبخ مع بعض ونشوف إزاي....

فراخ مشويّة بنكهة الروزماري والثوم والليمون
المقادير:

• فرخة كاملة
• 2 ملعقة كبيرة زيت زيتون
• 2 ملعقة صغيرة روزماري طازجة "مفرومة"
• 3 فصوص ثوم مفرومين
• ملح وفلفل أسود
• 1/2 ليمونة مبشورة بالقشر
• 1/4 فنجان عصير ليمون
• أوراق روزماري "للتزيين"
• شرائح ليمون "للتزيين"

الطريقة:
1- اخلطي ملعقة كبيرة من زيت الزيتون مع الروزماري المفروم، والثوم، والليمون المبشور، والملح، والفلفل الأسود، وعصير الليمون، وقلّبيهم كلهم مع بعض كويس.

2- أحضري الفرخة واغسليها كويس، وابدئي في عمل تجويف باستخدام أصابعك بين الجلد واللحم في جميع أجزاء الفراخ.

3- أحضري الخليط السابق وابدئي في توزيعه بشكل متساوي بين الجلد واللحم وداخل الفرخة، مع عمل شقوق باستخدام السكينة في منطقة الصدر والأوراك، وسيبي الفرخة لمدة ساعتين علشان تتبل كويس بالخليط.

4- بعد كده شغلي الفرن على درجة حرارة متوسطة، وحطي الفرخة على صينية، ودخليها الفرن لمدة ساعة ونص أو لغاية ما تلاقيها أحمرت من جميع الجوانب.

5- بعد كده خرجيها من الفرن وحطيها في طبق التقديم، وزيّني الطبق بشرائح الليمون وأوراق الروزماري.. وبألف هنا وشفا.

****************

فراخ مشوية بالتوابل المغربية




فراخ مشوية بالتوابل المغربية
المقادير:

• فرخة كاملة
• ملعقة كبيرة كمون مطحون
• 2 ملعقة صغيرة كاري
• ملعقة صغيرة زنجبيل
• 1/2 ملعقة صغيرة ملح
• 1/4 ملعقة صغيرة فلفل أسود
• ملعقة كبيرة زيت زيتون
• أوراق كزبرة طازجة

الطريقة:
1- أحضري الفرخة واغسليها كويس، وسيبيها لمدة ربع ساعة في مصفاة، علشان تصفّي أي مية فيها.

2- أحضري طبق صغير، واخلطي فيه كل المكونات اللي عندك، وامسكي الفرخة وابدئي في عمل تجويف بين الجلد واللحم في جميع أجزاء الفرخة، مع عمل شقوق باستخدام السكينة في منطقة الصدر والأوراك.

3- أحضري الخليط اللي عندك وابدئي في توزيعه بين الجلد واللحم وداخل الفرخة، وسيبيها لمدة ساعتين علشان تتبل كويس بالخليط.

4- بعد كده شغلي الفرن على درجة حرارة متوسطة، وحطي الفرخة في صينية، ودخليها الفرن لمدة ساعتين أو لغاية ما تلاقي أنها احمرت من جميع الجهات.

5- بعد كده خرّجيها من الفرن، وحطيها في طبق التقديم.. وبألف هنا وشفا.

****************

فراخ مشوية بالخل البلسمك والمكسرات والزبيب




فراخ مشوية بالخل البلسمك والمكسرات والزبيب
المقادير:

• فرخة
• 1/4 كوب خل بلسمك "متوافر في السوبر ماركت"
• ملعقة كبيرة زيت زيتون
• ملح وفلفل أسود
• ملعقة صغيرة زبيب
• 3 ملاعق كبيرة صنوبر وجوز محمصين "اختياري"

الطريقة:
1- أحضري الفرخة واغسليها كويس، وسيبيها لمدة ربع ساعة في مصفاة علشان تصفي أي مية فيها.

2- أحضري طبق صغير واخلطي فيه الملح والفلفل والخل البلسمك وزيت الزيتون كويس، وأحضري الفرخة وابدئي في عمل تجويف باستخدام أصابعك بين الجلد واللحم في جميع أجزاء الفرخة، مع عمل شقوق باستخدام سكينة في منطقة الصدر والأوراك، ووزعي الخليط اللي عندك كويس بين الجلد واللحم وداخل الفرخة نفسها.

3- سيبي الفرخة لمدة ساعتين علشان تتبل كويس، وبعد كده دخليها الفرن على درجة حرارة متوسّطة وسيبيها لغاية ما تستوي.

4- بعد ما تستوي خرّجيها وحطيها في طبق التقديم، وزيّني الطبق بالصنوبر والجوز والزبيب.. وبألف هنا وشفا.

****************

فراخ مشوية بالبرتقال




فراخ مشوية بالبرتقال
المقادير:

• 2 ملعقة صغيرة زيت زيتون
• 2 ملعقة صغيرة برتقال مبشور
• 2 ملعقة صغيرة توابل
• ملعقة صغيرة زنجبيل
• 1/4 ملعقة صغيرة فلفل أسود
• ملعقة صغيرة ملح
• 2 ملعقة صغيرة عسل أسود
• 1/2 برتقالة مقسومة نصفين

الطريقة:
1- أحضري طبق صغير واخلطي فيه المكوّنات الآتية: الزيت وبشر البرتقال والزنجبيل والفلفل والملح والعسل.

2- أحضري الفرخة واغسليها كويس، وسيبيها لمدة ربع ساعة في مصفاة علشان تصفي أي مية فيها.

3- بعد كده أحضري الفرخة وابدئي في عمل تجويف باستخدام أصابعك بين الجلد واللحم في جميع أجزاء الفرخة، مع عمل شقوق باستخدام السكينة في منطقة الصدر والأوراك، ووزّعي الخليط اللي عندك كويس بين الجلد واللحم وداخل الفرخة، بالإضافة أنك داخل الفرخة هتحطي البرتقالة المقسومة نصفين.

4- سيبي الفرخة لمدة ساعتين علشان تتبل كويس، وبعد كده دخليها الفرن على درجة حرارة متوسطة وسيبيها لغاية ما تستوي.

5- بعد ما تستوي خرّجيها وحطيها في طبق التقديم.. وبألف هنا وشفا.

[أمل الحياه]

جميله ولكن هى ايه روزماري

[حنان حلوة]

طرق جميلة وشهية وشكرا

[مدرسة الانجلش]

سلمت يداك مجهود رائع

[حنان حلوة]

[أميرة 90]

[مخلصة]

طرق جديدة جزاك الله خيرا

[روكا دودو]

طرق رائعة وسهلة شكرااااااااااااااا لحضرتك

[صوت العقل]

[sahar2012]

[entsar99]

thanssssssssssssssssssssssssss

[manalawad]

انا عايزة اعرف ايه هو الرزمارى

[ام علاء]

المشاركة الأصلية كتبت بواسطة m****awad

انا عايزة اعرف ايه هو الرزمارى

هو ورق اللورووو

[طائر الرحمة]

شكرررررا على الطرف الرائعة المميزة

[.fatima]