حوار بين الحق والزور

[شريف ابوالنصر]

الحق والزور

الحق والزور ولاد عم. عشان كده كانو يقولو فى المثل: "انت عاوز الحق والا ابن عمه؟" وكانو دايما مع بعض؛ عشان مافيش حق من غير زور، ولا زور من غير حق. وكنت لما تسأل أى حد: "الحق اللى يمشى والا الزور اللى يمشى؟" يجاوب من غير مايفكر: "طبعا الحق اللى يمشى."

فى يوم من الأيام ماشيين من بلد لبلد، الزور قال للحق:
"بدل ماحنا لاتنين ماشيين؛ ماتيجى كل واحد يركب على التانى شوية."
الحق قال:
"ماشى."
الزور قال:
"أنا اللى أركب الأول."
الحق قال:
"زى بعضه، ماهو حاييجى على الدور برضه وأركب شوية أنا كمان."

الزور ركب فوق الحق، والحق فضل ماشى لغاية ماتعب. قال للزور:
"إنزل انت بقى عشان أركب أنا شوية."
الزور قال:
"هوه انت لحقت تتعب، امشى كمان شويه."
مشى الحق كمان شويه، وبعدين قال للزور:
"كفاية كدة بقى، ومش هاركب عليك أكتر مانت ركبت عليه"
الزور قال:
"بس شويه كمان لغاية الشجرة اللى هناك دى"
وكل شوية يطلع له بحجة لغاية مالحق فطس من التعب، راح قاعد فى الأرض، وما رضيش يمشى تانى غير لما الزور ينزل وهوه يركب.
الزور قال له:
"يعنى احنا اختلفنا؟"
الحق فال:
"طبعا اختلفنا."
الزور قال:
"طيب؛ تحكم الناس بينا، واللى يقولوه يمشى."
الحق قال:
"زى بعضه."

فى فوتة ناس طيبين زى حالات السامعين؛ الزور نادى عليهم:
"لو سمحتو يارجاله، احنا اختلفنا مع بعض وراضيين بحكمكوا؛ الحق اللى يمشى؟ واللا الزور اللى يمشى؟"
قالو فى نفس واحد:
"طبعا الحق اللى يمشى!"

ومن يومها والدنيا على دى الحال؛ الحق ماشى، والزور راكب، والناس الطيبين بيحكمو بينهم.

[ولاء البحيرى]

ههههههههههههههههههههههههههههههههه
بجد اكثر من رائعة

[احمد رضا]

في الركن الادبي سيادتك
شكرا ع الموضوع