|
||||||
| اجتماعيات طالب قسم خاص بالطلاب للتعارف و تبادل المعارف و الحلول للمشكلات التعليمية |
 |
|
|
أدوات الموضوع | انواع عرض الموضوع |
|
#1
05-09-2016, 11:51 AM
|
||||
|
||||
ازاي تذاكر مواد الثانوية العامة نصائح البشمهندس لدفعة 2017
بسم الله الرحمن الرحيم اول حاجة هتكلم عنها قبل ما ابدا في المواد الدراسية انا ببارك للناس كلها الي حققت احلامها في الثانوية والي منهم انا وكل صحابي وكدا وبقول للناس الي مقدرتش تحقق حلمها متزعلش جايز ربنا كاتبلك خير في كلية احسن وبعدين يعني سبحان الله احنا دفعة النحس صراحة ايوة النحس 2016 دي  :D عارفين ليه لاني تسريب وتاجيل وضغط واعصاب وصيام وحر وتسريب نتيجة وخوف وسهر ورمضان وظلم واكتر ناس صراحة اتظلمت علمي رياضة خصوصا لما عادوا امتحان الديناميكا مرتين بس ربنا كرمنا والتنسيق نزل ل 92.7 حد ادني علمي رياضة يعني هندسة كانت 92.9 وعلمي علوم برضو اتظلموا مننساش في رفع التنسيق لاول مرة في التاريخ يوصل الحد الادني ل 96.6 حد ادني عارفين يعني ايه الكلام ده يعني صيدلة كانت السنة دي من 97.3 يعني الي جايب 97.2 ملحقش صيدلة للاسف وده كله بسبب شاومينج والتسريب والوزارة الفاشلة والحافز الرياضي اما بتوع ادبي فدول حبايبي بصو الي جاب في في ادبي 70% زي الي جاب 80% زي الي جاب 90% بس عن نفسي صراحة الامتحانات كلها جات ساهلة اوي وفي مستوي الطالب المتوسط خالص عدا امتحان التفاضل والتكامل كان فيها شوية خوازيق شوية الي محتار بقي مش عارف يدخل علوم ولا رياضة فانا بقوله عليك وعلي الاستخارة صليها + انت شوف ميولك هتنفع في ايه من وجهة نظري علمي رياضة كويس ليه لاني التنسيق بينزل بتاع هندسة ويقدر الواحد يدخل منه كليات كويسة وحتي لو ملحقتش في خاص والخاص بيكون سعره قليل خالص بيتراوح من 9 الالاف الي 15 الف ودي حاجة كويسة اما علمي علوم فده مجال للفرص فيه فرص كتيير بس للي يستغلها والله يعني مثلا اعلي كلية ف علوم هيا طب بشري تليها اسنان ثم صيدلة ثم علاج طبيعي وبيطري وعلوم طبية يعني قدامك فرص كتييييييييييير في المجال ده نيجي بقي لحكاية الظلم الي حصلت سواء في التصحيح او في اللجنة حد يسالني يقولي هل حصل ظلم للناس في الدرجات اقوله نعم ناس كتييييييييير راحو التظلم وشافوا اسئلة متصححتش اصلا والله وللاسف محدش خد ولا درجة انتو في مصر يا جماعة ايوة مصر الي هيا المركز الاخير تعليماً حالياً احنا الاخير في كل حاجة لكي الله يا مصر  اجي بقي اتكلم علي نفسي شوية انا الحمد لله ربنا كرمني بكلية بحبها وحُلم يعني وناس كتييييييير قالولي مدخلتش هندسة ليه قولتلهم انا بحب المجال بتاع الحاسبات والتصميم والبرمجة والهارد وير والسوفت وير وليها مستقبل يعني ثم اني مفيش فرق اصلا برضو لانها هندسة برضو اسمها هندسة حاسبات وبتدرس مواد هندسة وكدا بس عايز اوصل حاجة للناس اني مش حد مثلا كان نفسه يدخل طب اسنان وميوله اسنان ويجي لما يشوف نتيجته يلاقي درجته عالية ويقول طالما درجتي عالية يبقي ادخل طب بشري للاسف ده دمار ادام انت عندك حلم لحاجة يبقي هتوصلها المهم انا مش عايز اطول عليكم بالتوفيق لكم جميعاً وإن شاء الله الموضوع ده متجدد وهبدأ من النهاردة اتكلم علي اول مادة عندنا الا وهي لغة القران الكريم (العربية) تابعوا معانا 
|
|
#2
05-09-2016, 12:37 PM
|
|||
|
|||
|
الله عليك
استمر يا باشمهندس
|
|
#3
05-09-2016, 02:20 PM
|
|||
|
|||
|
في الاول الف مبروك ليك تحقيق حلمك
والله انا كنت مستني حد ينزل موضوع زي دا وهطلب من طلب رخم شوية لو تعرف تكتب باقي الموضوع بدري عشان نبدأ بدري مذاكرة صح ولو تشوفلنا واحد صاحبك كان علمي علوم تفيدنا في الجيولوجيا والأحياء . ولو مثلا جدول مذاكرة متقسم كويس نمشي عليه لحد ايام المراجعة والف شكر يا دوق تيفا
|
|
#5
05-09-2016, 02:40 PM
|
||||
|
||||
|
اقتباس:
ومتقلقش في كتييييير علمي علوم هيفيدك اما بخصوص جدول المذاكرة ٩٩٪ محدش بيمشي عليه ولو انت حابب يبقي تعمل واحد لنفسك تنظم فيه الدروس وكدا وربنا معاك
|
|
#7
05-09-2016, 04:10 PM
|
|||
|
|||
|
اقتباس:
انا عايز جدول عشان اذاكر كل المواد مش اذكر مادة كتير واهمل التانية خالص انا ماشي كويس في كلوا وبعدين اكتشفت اني مهمل العربي والفيزياء خالص بعد امتخانات الدروس نقصت فيهم كتير وشكرا مرة كمان
|
|
#8
05-09-2016, 05:36 PM
|
||||
|
||||
|
اقتباس:
المهم انت حاول تعمله بنفسك الجدول وهتلاقي ع البوابة حد كان منزل جدول لعلمي علوم
|
|
#10
05-09-2016, 05:57 PM
|
||||
|
||||
|
بالنسبة للعربي انا بنصح بكتب الاضواء والامتحان الاضواء شرح والامتحان حل لو عايز تجيب الرسالة هاتو بس ف المراجعة بعد ما تخلص الاضواء والامتحان
كدا العربي ده من 80 درجة تخيلوا 80 درجة  يعني عليه حوالي 20% العربي ده هنبدأ في اهم جزء فيه الي هو التعبير التعبير ده عليه 14 درجة في ورقة الامتحان وبينقسم لحاجتين تعبير وظيفي وتعبير ابداعي الوظيفي ده الي هو برقية لافتة اعلان تلخيص .... الخ وده عليه 4 درجات الابداعي ده بيكون موضوعين وتختار موضوع واحد وده عليه 10 درجات التعبير عاملة لازم يكون فيه خط جميييل وكبير واضح للمراقب طيب عشان تجيب النهائية في التعبير تعمل ايه اولاً لازم تعمل عناصر وافكار لموضوعك حوالي 6 عناصر وكدا هتقولي طيب اجيب العناصر من فين اقوله القطعة الي بيدهالك في الامتحان الي فيها الموضوع ممكن تاخد منها كام عنصر علي كام عنصر من عندك يبقي ظبطت الدنيا بعد العناصر تبدأ تكتب موضوع وياريت اديني بنبه اهو بلاش المقدمات المحفوظة دي الي هيا مما لا شك فيه والكلام ده والله الي بيصحح لو شافها هيديك صفر ع طول اومال تعمل ايه حاول تعمل مقدمة من خلال سياق الموضوع بنفسك وتبدا بالموضوع وتحاول تهتم بالتشكيل والخط واستخدم الاساليب النحوية كتيييييير زي اسلوب المدح والزم والاختصاص والكلام ده طيب ناس بتسالني كتييير اكتب كام صفحة اقولهم والله انا عن نفسي كتبت صفحتين بس مزنق سطور وخدت النهائية بس كان خطي واضح وكبير المهم انت ممكن تكتب 3 او 4 بس تراعي الوقت لاني لسة معاك فرووع تاني في الورقة وكدا بعد ما تخلص موضوعك تبدأ بقي تجيب خاتمة للموضوع وبرضو من خلال سياق الموضوع نفسه وقولت مية مرة بلاش الحاجات المحفوظة دي وبعد ما تكتب موضوع زي ده اضمنلك النهائية في التعبييييير وبكدا خلصنا فرع التعبير اي استفسار !!!! ندخل بقي علي القصة
|
|
#11
05-09-2016, 06:06 PM
|
||||
|
||||
|
القصة بقي المقررة الا وهي الايام لطه حسين
القصة ممتعة جدا عبارة عن سؤالين في الامتحان وتختار واحد وعليها 7 درجات المهم القصة دي بتتكون من جزئين الجزء الاول 11 فصل الجزء التاني 11 فصل الجزء الاول بقي اسهل طبعاً هتاخد فيها من ساعة ما كان صبي لحد ما يبتدي يسافر للأزهر اما الجزء التاني فده رخم شوية لاني في حاجات هبلة كتير وحاجات اصلاً مش موضع امتحان بس اهو بتاخدها كدا زيادة معلومة مش اكتر المهم ميجيش واحد يقولي انا هذاكر الجزء الاول بس ومش هذاكر الجزء التاني لاني كدا كدا هما سؤالين في الامتحان والسؤالين هيكون واحد جزء اول والتاني جزء تاني اقوله لا يا حبيبي ممكن يجيب السؤالين في الامتحان من الجزء التاني عادي خالص ويجيب معاهم اسئلة من الجزء الاول والي عايز يتاكد من كلامي يشوف امتحان 2015 دور اول جايب الفقرتين جزء تاني المهم القصة نذاكرها ازاي انا عن نفسي كنت بذاكرها من كتاب الاضواء فقط وبحل عليها من الاضواء وكتاب الامتحان والدليل في المراجعة والرسالة وكدا القصة سهلة خالص ومعانيها حلوة بس تذاكرها اول باول وهتلاقي فصول طويلة زي الفصل 11 في الجزء التاني ده من اطول الفصول الي هتشوفها حاول متذاكرش القصة من مذكرة مستر سؤال وجواب وشغل العيال ده لا ده لازم الاول تقرأ الفصل كويس من الاضواء وبعدين ابقي بص في مذكرة المستر وكدا وانت بتقرأ الفصل تخيله قدامك عشان تعرف تحفظه وتفهمه وبكدا تكون حصلت علي 7 درجات قصة كاملة وبكدا خلصنا فرع القصة اي استفسار !! ندخل علي القراءة
|
|
#12
05-09-2016, 10:32 PM
|
||||
|
||||
|
بالنسبة للقراءة دي عليها 7 درجات ومن السهل جدا تضمنهم خالص
لاني القراءة من اسهل الفروع في العربي عندك 6 موضوعات قراءة هم: قيم إنسانية والعلم في اللإسلام وأسلوب واسلوب والأرقام ولمحات من حيات العقاد دول علي حسب ما خدناهم السنة الي فاتت المهم هتذاكروا القراءة من كتاب الاضواء انا كنت بفضل وتحفظوا المعاني ولازم لازم لازم تقروا الدرس كامل من الملخص والله متعتمدوش علي مذكرة وس وج وتركزوا علي الي بين السطوووووووور وتابعوا امتحان 2013 دور اول لو في جزيئة معرفتش تحفظها او تفهما يبقي تجيب ورقة وقلم وتسمع لنفسك ودي افضل طريقة للمذاكرة بعد ما تقرأ الدرس تحل عليه هتلاقي شوية اسئلة في الاضواء تحلهم + تحل اسئلة كتاب المدرسة لانها بتكون اسئلة صعبة وياريت تستشير مدرسك في الاسئلة دي او تشوف اجاباتها في الاضواء وبعد كدا تحل الدرس من كتاب الامتحان وهتلاقي برضو اسئلة الامتحانات السابقة علي الدرس حلها عشان تطمن انا كنت بعمل زي كدا والله يعني من السهل اني اي حد يقفل القراءة ايوة وبكدا تكون خدت ال 7 درجات كاملة  ندخل بقي علي الأدب تابعووووووووووا
|
|
#13
05-09-2016, 10:51 PM
|
||||
|
||||
|
الأدب بقي عليه 6 درجات ولازم تاخدهم كاملين
بالذوق بالعافية هتاخدهم غصبن عنك  بس عشان تاخدهم لازم تبصلي كدا الادب كله حفظ حفظ حفظ مفيهوش فهم يعني خااااااااااااالص لازم تحفظوا وكل سنة بيبقي في تغييييييير بسيط الادب عندكوا هتدرسوا المدارس الشعرية امثال مدرسة الاحياء والبعث والاتجاه الوجداني الي بينقسم الي 3 مدارس هم مدرسة الديوان وابولو والمهاجر واخر مدرسة هيا المدرسة بتاعة الشعر الحر او شعر التفعيلة او الشعر الجديد دي المدارس الشعرية ودي الي درسناها السنة الي فاتت مش عارف السنة دي ايه نظامهم بس اكيد هتدرسهم ندخل بقي علي النثر عندكم رواية وقصة قصيرة ومسرحية وركزوا علي المسرحية جامد عشان من 2013 ماجتش في اي امتحان المهم الادب هيتذاكر من كتاب المدرسة فقط فقط فقط يعني محدش يقولي لا انا هذاكره من مذكرة او كتاب الاضواء او كتاب تاني اقسم بالله لو عايز تجيب ال 6 درجات بتوع الادب لازم تذاكره من كتاب المدرسة فقط نيجي بقي هنذاكر الادب ازاي زي القصة والقراءة بس من كتاب المدرسة تذاكروا قراية سريعة وبعد كدا تبدأ تجيب ورقة وقلم وتكتب كل كلمة تقابلك في الكتاب لاني اسالته بتيجي ساعات من وسط السطور تابعوا امتحان 2013 دور اول وامتحان السودان 2015 دور اول جابو من وسط السطور والله يبقي لازم تذاكر كلمة كلمة وتحفظها وتكتبها تحفظ اي حاجة في الادب المدارس الشعرية تذاكر سبب تسمية المدرسة كويس واهم شعرائها وملكش دعوة بتواريخ الميلاد بتاعتهم وسمات المدرسة وكدا وفي حاجة مهمة الناس بطنشها التمثيل واحد يقولي يعني ايه اقوله في اي سمة في اي مدرسة بيكون جايب شطرة بيت شعر ده لازم تحفظه والله بتاجي في الامتحانات يعني اي بيت شعري في الادب يتحفظ عوامل التجديد والمحافظة تذاكرها برضو وهتقابلك في النصوص برضو نيجي للمسرحية ودي اطول وارخم حاجة في الادب بس للأسف طلعت سهلة اوي لدرجة اني زعلنا اني مجتلناش في امتحان 2016 المهم تذاكرها ازاي تحاول تمثل المسرحية قدامك وتتخيل الاحداث + انك بتكتب في ورق كل حاجة وتحفظه وتذاكر بالذات المسرحية دي من وسط السطوور بعد ما ذاكرت الادب من كتاب المدرسة حل برضو اسئلة كتاب المدرسة ودي هتلاقيها متجاوبة في الاضواء وتركزوا عليها عشان سنة 2012 اقسم بالله جاب سؤال بالظبط من كتاب المدرسة وتحاول برضو تستشير مدرسك في اجابات كتاب المدرسة وكدا وتحل اسئلة كتاب الامتحان برضو واسئلة الاعوام السابقة مهمة جداً بعد ده كله والله اضمنلك النهائية في الادب انا عارف اول ما تشوفوا الادب هتقولوا رخم وصعب لكن انتو معاكم سنة كاملة والله هتحفظوا فيه الادب خالص الناس بقي الي مش عارفة تحفظ بعض الجزيئات في الادب او سمات مدرسة معينة يبقي تعمل الطريقة دي تسجل لنفسها وتسمع التسجيل علي طول وتخلي التسجيل علي الفون وتشغله علي طول وهتحفظه والله انا كنت بعمل كدا في الادب وحفظ النصوص اي استفسار في الادب   :006 et4:
|
|
#14
05-09-2016, 11:03 PM
|
||||
|
||||
|
البلاغة دي حبيبتي بقي بحبها يمكن عشان انا بكتب شعر وكدا
البلاغة عليها 6 درجات زي الادب مش هنتكلم عليها كتييييير دي بتذاكرها من مذكرة المستر وخلصنا لانها هيا سهلة سؤالها في الامتحان عبارة عن شرح للابيات بين عاطفة الشاعر سواء كان حزين او فرحان ولون بياني وسعات بيزود سؤال حلو كدا بيتكلم علي الوحدة العضوية تحققت ولا لا مع التعليل وسؤال برضو بيجبه سعات يقولك ايهما افضل وكدا المهم انت لازم تكون مراجع علي بلاغة سنة 3 ث هتلاقي كتاب الاضواء والامتحان جايبهم ذاكرهم منه وزي الفل علي كدا وكتاب الامتحان موضحلك ازاي تستخرج وكدا وازاي اصلاً تحل بلاغة هتلاقي الاضواء جايب شوية اسئلة البلاغة بتاعة الامتحانات السابقة حلها وكتاب الامتحان جايبهم برضو ومزود حاجات حلهم برضو هتلاقي الرسالة جايب اسئلة برضو بس صعبة شوية فمنصحكش بالرسالة دلوقتي خليه في الاخر بعد ما تتعود عليها وزي ما قولنا ابيات شعرية ويقولك اشرح او مش هيجبهالك صريحة كدا ويقولك اشرح فانت تفهم هو عايز ايه الاول ؟! بعد كدا استخرج لون بياني وبين نوعه وقيمته الفنية اللون البياني ده اما تشبيه او كناية او استعارة سواء مكنية او تصريحية او مجاز مرسل من الاخر كدا مش هيقولك استخرج وليه كذا سنة بيعمل الحتة دي بيجبلك كلمة من الابيات او جملة ويقولك حدد النوع البياني هنا فانت تشوفه واحدة واحدة ولما يقولك هل تحققت الوحدة الفنية اول لا فلازم انت تقراء الابيات كويسة وتشوف عاطفة الشاعر ومن خلالها هتحدد الوحدة الفنية لو تحققت بتقوله نعم تحققت وتقوله لاني الموضوع واحد ....... وعاطفة الشاعر ....... والجو النفسي ........ انما ميجيش واحد يقول علي طول نعم تحققت لا غلط تابع امتحان 2010 دول اول وانت تفهم قصدي وبكدا تجيب النهائية في البلاغة اي استفسار
|
|
#15
05-09-2016, 11:33 PM
|
||||
|
||||
|
ندخل علي النصوص بقي
النصوص عليها 20 درجة ايوة 20 10 للنص الاجباري الي هو النثر 10 للنص الشعري الاختياري نبدأ بالنصوص النثرية ودي عليها 10 درجات عندنا 3 نصوص نثرية علي حسب ما درسنا السنة الي فاتت هم الصغيران ونظرة وسيد قرارك انا سمعت السنة دي في تغيرات في النصوص المهم ما علينا النصوص النثرية دي اجباري في الامتحان ركز علي نص الصغيران ده لانه اطول وارخم واحد فيهم وجيه في كل الامتحانات بتاعة الثانوية عدا 2009 و 2011 و2016 ده لو موجود السنة دي يبقي هياجي وخلي بالك لاني في حتة حفظ نيجي بقي دلوقتي ذاكرته من الاضواء وحفظت المعاني وتمام التمام يبقي مش باقي غير التعليق التعليق من كتاب المدرسة تذاكروا زي الادب بالظبط بس هنزود حتة هنا لازم بعد ما تذاكره من كتاب المدرسة تذاكره تاني من الاضواء لاني في امتحان 2013 دور اول و2008 دور اول و 2014 دور تاني خرج عن كتاب المدرسة وجاب اسئلة تعليق من الاضواء اقسم بالله فلازم تذكروهم تاني من الاضواء بعد كتاب المدرسة بعد كدا النصوص الشعرية كل نص بمدرسته بقي مثلا مدرسة الاحياء والبعث نصها اسمه غربة وحنين لاحمد شوقي وده حفظ 15 بيت ونص حلو وهيعجبكم اوي بس انا سمعت انه اتحذف السنة او هغيروه بس الله اعلم ما علينا والاتجاه الوجداني نصه اسمه " المساء" لخليل مطران دراسة ومدرسة ابوللو نصها " اسمه صخرة الملتقي" دراسة ومدرسة الديوان نصها اسمه " الشاعر وصورة الكمال" لعبد الرحمن شكري 10 ابيات وحفظ وسهل جداً ومدرسة المهاجر نصها اسمه " كم تشتكي " لايليا ابو ماضي 10 ابيات حفظ وسهل خالص مدرسة الواقعية نصها اسمه النسور لمحمد ابو سنة وده دراسة بس اخر مقطعين حفظ وكدا دي كل النصوص الي خدناها السنة الي فاتت بس مش عارف السنة دي اتغيرت ولا لسة فانت بتذاكر النصوص عادي من كتاب الاضواء والتعليق تذاكره من كتاب المدرسة ثم الاضواء وتحل بعد كدا علي النصوص من كتاب الامتحان أفضل نيجي بقي لحتة الحفظ محدش يطنشها لانها جات سنة 2014 و 2015 اكتب مما حفظت والله يبقي لازم تحفظ النصوص الي هما حفظ انا من كتر التكرار وحبي للشعر كنب حافظ النصوص الدراسة طيب تحفظها ازاي ؟! في طريقتين اول طريقة تكتب شطر شطر في ورقة وتكرره لحد ما تحفظه وهكذا تكتب الشطر التاني لحد ما تحفظه كاملاً وتكتبه بعد كدا النص كاملا بعد ما تحفظه الطريقة التانية ودي الي كنت ماشي بيها اني كنت بسجل النص واحفظه مع نفسي وكنت بحفظه بسرعة وخلي بالك اي حد يقدر يقفل النصوص والله حرام 20 درجة تضيعها اي استفسار في النصوص
|
|
| العلامات المرجعية |
«
الموضوع السابق
|
الموضوع التالي
»
العرض العادي
|
|
جميع الأوقات بتوقيت GMT +2. الساعة الآن 12:41 PM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
