مش عارف،

[Mohamed_Hamza]

الهمة ياجماعة باقي من الزمن شهر وكام يوم، هانت اوي

خلي تفكيرك كله فمصلحتك واللي ينفعك بس
الحديث دا كنت معلقه في اوضتي وكان بيديني طاقة ايجابية رهيبة كل ما اشوفه :
"احرص على ما ينفعك واستعن بالله ولا تعجز وإن أصابك شيء فلا تقل: لو أني فعلت كان كذا وكذا، ولكن قل: قدر الله وما شاء فعل، فإن لو تفتح عمل الشيطان" وافتكر كنت عامل سمايلي فيس تحته بردو.

ماتشغلش بالك بغيرك او بحاجة تانية الحاجة دي او الحد دا مش هينفعك لو مجبتش مجموع كويس، انت لوحدك اللي هتتضر مش غيرك، ومش تدي لنفسك فرصة انها تنشغل بحاجة كدا ولا كدا، دايما اسبق انت واشغلها بطاعة ربنا والمذاكرة. (يعني مش تخلي عندك وقت فراغ)، عشان لو لقيت عندك وقت فراغ اتأكد ان المشاكل هتحصل "نفسك إن لم تشغلها بالحق شغلتك بالباطل"

هقولك لو انت فكرك مشغول بحد -ودا مأثر اكيد على مذاكرتك- ان دا مجرد اعجاب ملوش اساس من الصحة، وكمان شوية هتبعدوا وتنسوا بعض خالص (دا لو مكنش من طرف واحد اصلا)، فمتخليش مستقبلك وعمرك تمن لشوية مشاعر مؤقتة.

مش تقارن نفسك بحد ابدا، انت الخسران في الحالتين (لو شايفه اقل منك هتتغر وهتفشل، ولو شايفه احسن منك هتُحبَط وهتفشل بردو )

خليك واثق فنفسك وانك هتقدر توصل للي انت عايزه، مفيش حاجة بعيدة على ربنا، طالما فيه حد جاب 410 قبل كدا يبقى انت بإمكانك تجيب المجموع دا بس انت اللي بتستعبط وسايب الشيطان يلعب فدماغك وماليها سلبية.

تفاءل وابرد

اعمل خطة للشهر الباقي دا ظبط بيها نفسك بئا,
واهتم بحل الامتحانات الفترة دي جدا
انهاردا نفرض انه اول خمسة
من اول انهاردا لحد 25/5 تعملوا الحاجات دي في كل مادة:
1-تراجعوا المنهج كله من مصدر المذاكرة مش من تلخيص والكلام الفاضي دا.
2-تحلوا كتاب اسئلة بس يكون مليان اسئلة.
3-تحلوا امتحانات السنين اللي فاتت، واللي حل يحل تاني او يجيب امتحانات ازهر او امتحانات من النت.

ال25 يوم دول لازم تخلصوا فيهم كل دا، تقسموا المنهج اللي عندكم كويس عليهم وتكتبوا الكم للي هتذاكروه خلال ال25 يوم كاملين، يعني مثلا
*الاحد 1/5*
-حل امتحانين على مادة (س)
-مراجعة باب (سوسو) من مادة (ص)
-حل امتحانين من مادة (ع)
-مراجعة باب (فوفو) من مادة (س)
-حل اسئلة مكثفة ع الباب (سوسو) من المادة (ص)
-مراجعة باب (بوبو) من مادة (ع)
-حل اسئلة مكثفة ع الباب (فوفو) من المادة (س)
-حل امتحانين على مادة (ص)
-حل اسئلة مكثفة على باب (بوبو) من مادة (ع)

الابواب دي هتحددوها على حسب مانتوا قسمتوا منهج كل مادة ع ال25 يوم. يعني في مادة 7 ابواب يبقى في الاسبوع هتعملولها يومين يوم لدا ويوم للتاني، ولو في باب كبير فسموه على يومين وكدا.
ولازم تفصلوا وتبعدوا بين الحاجات زي مانا كاتب كدا، مش تكتبوا مثلا حل امتحانات ومراجعة باب وحل اسئلته في مادة معينة ورا بعض، وبعدهم نفس الكلام في مادة تانية، كدا هتزهقوا منها، او تفتحوا فيها وهتلاقوا اخر اليوم انكوا مذاكرتوش غيرها.

مش تكتبوا حاجات فوق طاقتكم عشان تقدروا تنفذوها، عشان عارف لو مش نفذتوها ممكن تحبَطوا، ودا مش عايزيينه يحصل خالص.

الزموا نفسكم باللي هتكتبوه وبالعافية، يعني مش تنام غير لما تخلص اللي عليك، ولو خلصت كافئ نفسك، ولو مخلصتش عاقب نفسك انك تصوم اليوم اللي بعده مثلا، اهو ومنها تتعلم الصبر بردو.. او اي عقاب.
بص التأجيل دا مصيبة سودة الصراحة وهو من اكبر اسباب فشل الذين فشلوا، يقعدوا يقولوا هذاكر كذا النهاردا بالليل ويجي الليل ويقولوا بكرا الصبح ويجي ويجي بعده وبعده و"كذا" دا لسه مخلصش... لحد ماتيجي ليلة الامتحان تلاقيه يعيط ويولول.
وخد بالك التأجيل بيجيب تأجيل، وكل ما تأجل حاجة اكتر كل ما تنفيذها يكون صعب اكتر، اسمع مني انا مجرب كل حاجة.

ابدأ مذاكرة من الصبح.

اللي عنده كذا كتاب مراجعة، يرميهم كلهم ويسيب معاه واحد بس يحل فيه ينقي اشمل واحد فيهم ويسيب الباقي خالص، مش شطارة والله انك تقعد تجمع في كتب من هنا ومن هنا وتنزل اي ملزمة تظهر ع النت وفاكر نفسك هتخلص دا كله، وفي الاخر هتلاقي نفسك محاط بكوم كتب متراكم عليك ومش عارف تبدأ بدا ولا دا طيب دا احسن ولا دا ومش هتعمل حاجة في الاخر وهتفشل، خلي الكتب الكتير دي تنفعك بئا.

ومن 26/5 ل30/5 تراجعوا ع المواد كلها ع السريع قراية فقط، عشان يكون المنهج حاضر فدماغكوا ايام الامتحانات.
من 31/5 تبدأوا في مراجعة العربي، وبتنظيم وخطة بردو اهم حاجة.

خد راحة خمس دقايق بين كل ساعة والتانية مثلا.

الحسد يا جماعة، مش تتفشخر اوي قدام الناس لتتحسد ولا حاجة، سيدنا يعقوب كان خايف على ابنه "قَالَ يَا بُنَيَّ لَا تَقْصُصْ رُؤْيَاكَ عَلَىٰ إِخْوَتِكَ فَيَكِيدُوا لَكَ كَيْدًا" دا نبي كمان وكان خايف من الحسد مابالك احنا بئا.
وفنفس الوقت مش تخلي احساس انك محسود يسيطر عليك ويمنعك عن المذاكرة، حاجة كدا زي ابعد عن الشر وغنيله مش فاهم يعني ايه المثل دا بس دا اللي جه فبالي.

تفاءل وابرد

مش ترهق نفسك بالتفكير في اللي حصلك في الماضي ليجيلك اكتئاب، الماضي دا راح خلاص و مش هيرجع تاني.
ولا ترهق نفسك بالتفكير في اللي جاي، ليجيلك توتر واعصابك تبوظ، ودا بتاع ربنا بردو.
خليك في الحاضر واعمل احسن حاجة ممكن تعملها دلوقتي.



احساس انك ناسي دا مجرد احساس، والله في اللجنة لتفتكر كل حاجة حتى لو قبل ماتدخل كنت مفكر نفسك ناسي كله، لما تبدأ حل الامتحان، المنهج كله هيحضر فدماغك واللي ذاكرته قبل كدا كله هتلاقيه متصور قدامك كدا.

الامتحان هيجي من اللي انت بتذاكره وتحله دا مش من الفضاء ولا من تخاريف المخرفين، فمش تقلق خالص، ومش تتعب نفسك بمساءل صعبة جدا وافكارها معقدة وتقعد قدام المسألة بالساعة والساعتين وفي الاخر متحلهاش وتعقد نفسك بنفسك، لا يعم مش تعمل كدا فنفسك عشان خاطر طنط، خليك في المفيد، المفيد دا اللي هو امتحانات السنين اللي فاتت وكتاب الوزارة وكتاب خارجي زي الامتحان مثلا غير كدا هري مدرسين حله براحتك بس ماتتعبش نفسك اوي بيه، او اتعب نفسك براحتك بردو بس متوصلش لانك تعقد نفسك وتيأس لو معرفتش تحل حاجة منه مثلا.

تفاءل وابرد.

بلاش تضييع وقت، بلاش فيس، بلاش البرنامج اللي بيجي فيه فلان فلان دا مش هينفعك دا بيديك على قفاك وبياخد فلوس على كدا، بلاش كلام مع اخواتك واصحابك (ممكن لو صاحبك متفائل كدا وحاسه هيطمنك كلمه وخد منه شوية امل، اما لو متشائم دا سيبك منه وماتعبروش خالص، عشان هيكرهك في عيشتك)، بلاش تحملوا نفسكوا فوق طاقتها، بلاش تفكير كتير في مستقبلك دا بإيد ربنا، بلاش سلبية، بلاش النفس اللوامة.

ذاكر ويكأن الامتحان بكرا، يعني راجع بجد وبتركيز مش ماسك الكتاب سرحان وعامل نفسك بتراجع، يا فرحتي، انت تذاكر 3 ساعات في اليوم بس بتركيز احسن ما تذاكر 12 كدا.

تفاءل وابرد.

لو فيه حاجة بتنساها كتير او اي حاجة مش عايز تنساها بعد كدا، (غير تكرارها طبعا دا لازم) ممكن بعد ما تقرأها تقفل الكتاب تسمعها او تشرحها لنفسك، او تتخيل ان قدامك طفل ومطلوب منك تشرح الحاجة دي ليه باسلوبك انت (خد بالك انت هتشرحها لطفل يعني عقله صغير ولازم تشرح كويس عشان يفهم) واتعامل بئا، لو غلطت ارجع اشرح من الاول لحد ما تقرب جدا من الموجود في الكتاب، ان شاء الله مش هتنسى كدا.. مع التكرار.

اهدى وبلاش قلق من الامتحانات وخوف زايد عن الحد، هو الخوف من اي حاجة علاجها التعرض للحاجة دي فعلم النفس، وانك طول مانت بعيد عن الحاجة دي هتخاف منها اكتر، قصدي من الرغي دا انك تحل امتحانات، وتهتم بحلها عشان خوفك منها يقل بدرجة كبيرة، بس مهما كنت قوي وحاولت تقاوم القلق لازم يكون فيه نسبة قلق بردو ولو حتى قليلة، دا بئا قلق طبيعي وكويس، مفروض انه اللي بيشجعك تذاكر، فحاول تتعايش معاه يعني عشان هو حلو.

وبردو اللي عامل الامتحان دا بشر زيك وزيي مش واحد جاي من المريخ، اكيد هيجيب اسئلة من الامتحانات اللي فاتت او من كتاب الوزارة يعني حاجات مهروشة كويس، هيجيب منين يعني؟ الاسئلة اللي هتيجي هتكون عدت عليك قبل كدا مرة واتنين وتلاتة خايف من ايه بئا؟
الفيزيا ياسيدي في اسوأ الظروف لو جت مسألة فيها فكرة رخمة محلتش زيها قبل كدا هتكون في سؤال واحد بس من الخمسة مش فسؤالين متخافش، معدوش بيجيبوا مسألتين بالشكل دا في نفس الامتحان، فانت هتسيب السؤال دا وتحل الاربعة الباقيين كويس وقفله، شايف بسيطة ازاي.



خليك متفاءل، تخيل نفسك وانت حققت حلمك خلاص، وشوف احساسك هتكون فرحان ازاي، وتخيل نفسك بردو وانت مش محقق حلمك وشوف هتكون متدايق ازاي.

تفاءل وابرد

إياك تخلي اهتمامكم بالمذاكرة يقصر على العبادة اللي هي سبب وجودك في الدنيا، إياك تقصر في الصلاة:
((يُصبحُ الرجلُ مؤمِناً ويُمْسِي كافِراً، ويُمسِي مُؤمِناً ويُصبْحُ كافِراً ، يَبيعُ دِينَهُ بِعَرَضِ من الدُّنْيا قليل))
الناس اللي فاكرة انها لما تذاكر كتير انهم كدا تمام بس بيفوتوا الصلاة عشان بتعطلهم عن المذاكرة، لأ راجعوا نفسكوا يا حبايبي وشوفوا اولوياتكم ايه.

ماتقلقش من اللي جاي اوي ولا تزعل ع اللي فات
" ما أصابك لم يكن ليخطئك، وما أخطأك لم يكن ليصيبك"
في كل حاجة حصلتلك او هتحصلك، احمد ربنا من قلبك واتأكد ان الخير جايلك مفيش شك فكدا، وان ربنا عمل كدا لحكمة، رحمةً بيك، ودا اختبار لايمانك مش اكتر، افتكر ان كل حاجة متحددة من يوم ما اتولدت، انت مجرد مشاهد لفيلم مكتوب واتمثل وحصله اخراج وبيتعرض قدامك مش اكتر

الامتحان مش نهاية الحياة، والحياة مش نهايتها الامتحان، فيه ناس كتير عايشة حياتها كويس اوي وسعيدة جدا من غير لا تقفيل امتحانات ولا طب ولا هندسة ولا بتاع.
مش هقولك مارك ومش عارف مين، جارنا اهو اقرب مثال، من غير مايدخل ثانوية اصلا، كون نفسه وسافر وهو مش حيلته حاجة ودلوقتي بئا معاه فلوس ماشاء الله اكتر من 100 دكتور ومهندس (لو هنشوف السعادة كدا يعني) و بيدفع لابنه (من بين خمس ولاد) مليون الا ربع في السنة عشان يدرس الطيران في اوربا دا مصاريف الدراسة بس.
وواحدة تانية صاحبة اختي، جالها طب بشري اللي كانت بتحلم بيه، بس وهيا رايحة تشتري هدوم للكلية العربية اتقلبت بيهم وماتت هي وابوها وامها في نفس اللحظة.

مش عايز احبطك ولا اقلل عزيمتك، بس ماتعصبش نفسك اوي اصل انت كدا كدا ميت في الآخر، فبص مفيش حاجة مستاهلة تحرق فدماغك واعصابك عشانها الاحلام الوردية اللي فدماغك وخططك العملاقة دي هتتبخر ومصيرك تربة هتتغطى فيها بشوية تراب والناس هتروح وتسيبك، اقرب الناس ليك هيروح ويسيبك، فبتهيألي اليوم دا اولى انك تخاف منه امتحانات ايه اللي انت خايف منها دي.

"لاتخشى من تدابير البشر فأقصى ما يستطيعون فعله هو تنفيذ إراده الله"
طيب طالما الامتحان من تدبير البشر.... يبقى دا تنفيذ ارادة ربنا... وربنا بيقولك " فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ"... وانت خايف من الامتحان... اظن الرسالة وصلت
لازم تقربله وتدعيه عشان الهم والغم اللي انت فيه دا يروح.

مش تتوكل ع الاسباب وتنسى مسبب الاسباب، هتعتمد على شطارتك وذكاءك بس وتتغر فنفسك وتتفكر انك كدا هتوصل لا ربنا مش هيوفقك وهتاخد خزوء، اما لو لقاك بتدعيه وتقربله وتتوكل عليه مع الاخذ بالاسباب بردو، كدا ربنا هيكون معاك هيعينك ويوفقك.

ربنا معاكوا.

[ElSayed Fekry]

حلوة الحتة بتاعة خزوء دى وشكراً على الكلام الجميل ده ربنا يرزقك تفاؤل و أمل و سعادة

[سوسوكاتى]

جزاك الله كل خير فعلا موضوع جاى فى وقته

ربنا يباركلك وينفع بيك الاسلام والمسلمين

[Duke Tefa]

وهي دي الاونطة يا دوك
جزاك الله كل خير

[رفيقة الامل]

عااااااااااااااااااااااااااااااااااااااااااااااااا ااش
يادكتور
ربنا يباركلك ويوفقك
هنرووووووووووح نموت نفسنا ونعتكف ف الاوضة وهنكهرب الباب عشان منطلهش من الاوضة ومحدش يجى عندنا

[رفيقة الامل]

طيب يادكتور انا فهمت ان هنذاكر 3 مواد
طيب نقسم ازاى السبعة