هنا دمنهور .. ثورة المعلموين أمام مديرية التربية والتعليم

[احمد سعيد11]

تجمع اليوم الأربعاء 7/9/2011 الآلاف من المعلمين أمام مديرية التربية والتعليم بدمنهور مطالبين باقالة وزير التربية والتعليم وكذلك حوافز الإثابة الـ200% كاملة دون أى خصومات وعدة مطالب أخرى وأجمع المعلمون أنهم مصرون على تنفيذ مطالبهم وأن هذه الوقفة هى البداية وتم الاتفاق بين الجميع على حضور مليونية المعلم يوم السبت القادم أمام مجلس الوزراء وفى حال لم تنفذ المطالب يكون هناك اضراب شامل عن العمل من اول ايام الدراسة وحتى تنفيذ تلك المطالب وتم ترديد الهتافات : "يامشير يامشير يسقط يسقط الوزير" ، "اهتف اهتف على الصوت اللى بيهتف مش هيموت" ، "كادر ايه بيقولوا عليه كيلوا الرز بستة جنيه" ، "ياعدالة فينك فينك الحكومة بينا وبينك" ، "وزير السياسات باطل " وغير ذلك من الهتافات
واعتلى المنصة الكثير من الخطباء من المعلمين لن أذكر اسماء منهم حتى لا تكون دعاية لأى منهم ، ولكن من أبرز من تحدث على المنصة الأستاذة بشرى فاضل فقد شدت بهذه الكلمات أتمنى أن تعجب حضراتكم فقد اعجبت بهذه الكلمات واستاذنتها فى النشر ...........................قالت:
يا كدر كدرتنا وحلمنا بيك صاحييـــــــــــــن
ولما جيت اتهرينا من الغلا والديــــــــــــــن
واللى استلف واندين ولسه العيال عاوزين
وان جات مكافأة ومرتب معروف للفين رايحين
حال المعلم عدم وكلكم عارفيـــــــــــــن
وبيحسدوه ع الهدمة اللى لبسها سنيـــــن
وبيخصموا م المرتب ضريبة ويقبضوه ملاليم
يا خلق هوو الحقونا احنا مش عايشين
سنين بندى وندى واخرتها مرض وانين
وان زودونا جنيه اللحمة تزيد عشريــــن
واللى يدوه للمعلم بايمين اهو بالشمال ضايعين
حال المعلم عدم وللا انتو مش شايفين؟
يا اهل الكلام والعلوم انتوا ليه ساكتين؟
دول صوروكم فى البرامج بمطاوى وبسكاكين
فين الكرامة ؟... دى المهانة بقت لكم عناوين
ضيعتوا هيبة المعلم وكرامته بقت فى الطين
ما دمتوا على حالكو كده عن حقكم ساكتين
قابلونى لو جالكو يوم تعيشوا مرتاحيـــــــن

[وا إسلاماه]

مشكور على الخبر
بس احنا مكناش عارفين بذا التجمع؟؟؟؟؟

[fatata]

لو اتحدنا كلنا هنغير الحكومه مش الوزير

[أيوب11]

أحي معلمي البحيرة علي هذه للوقفة وللحق اللي نظمها ورتب لها الاخوان عموما الشكر موصول لكل من ساهم والمهم في الوقفة الكبري يوم 10 / 9

[ammhhe]

لا تقلقو وااكد لكم انها ستكون اكبر وقفه فى تاريخ مصر للمعلمين
وسيكون نتيجتها هائله
وغير متوقعة

[newir_1f]

المهم وقفة 10/9

[هيما2011]

ان شاء الله هننجح يوم السبت الجاااااااااي أمام مجلس الوزراء

[عبدالنبي الحداد]

مشكور على الخبر

[احمد سعيد11]

المشاركة الأصلية كتبت بواسطة أيوب11

أحي معلمي البحيرة علي هذه للوقفة وللحق اللي نظمها ورتب لها الاخوان عموما الشكر موصول لكل من ساهم والمهم في الوقفة الكبري يوم 10 / 9

أشكرك على الرد والتحية لكننا مش حابين نقسمها اخوان وغير اخوان لاننا كلنا اخوان فى القضية والمطالب مشتركة ،
أرجو لمن يقرأ الموضوع التعليق على كلمات الزميلة كاتبة الزجل

[محمد إسماعيل داود]

هكذا أثبت معلمو الإخوان أنهم يحبون مصر وذاب كل من يحقد عليهم

[sobhy333]

الاخوان ملهمشى دور فى هذه الوقفه واكبر دليل انهم مش هيكونوا فى التحرير يوم الجمعه ولا امام مجلس الوزاراء يوم السبت 10/9 وهم يقولوا لنا بقى عن الاتفاق اللى تحت الترابيزه وعلشان مندخلشى فى مهاترات ونرد على بعض لو حزب الحريه معانا يبين لنا نفسه يوم 10/9 امام مجلس الوزراء وده يبقى ابلغ رد

[saadhebala]

كلام كبير ومؤثر وواقعى .... موعدنا 10/9 ... استعدى يا قاهرة لاستقبال معلمى البحيرة ومعلمى مصر من اسوان لاسكندرية ومن سيناء لمطروح .. وأكتب يا تاريخ ان معلمى مصر لن يرضوا الهوان لاتفسهم بعد اليوم.. كفانا هوان ومذلة فنحن ورثة الانبياء وأصحاب اسمى رسالة .