حنيت

[الأستاذة ام فيصل]

المشاركة الأصلية كتبت بواسطة هاوى إبداع

حنيت لوقت ما كنت عيل
كنت عايش مش بفكر
ومش مضطر اخد قرار
حنيت لضحكة صافية بيني
وبين صحابي ف الهزار
لسهرة طول الليل معاهم
وانام قتيل طول النهار
حنيت لوقت كانت فيه
اكبر همومي ازاي
ما اروحش المدرسة
واكبر مخاوفي إزاي هزعّل
امي لو مجموعي
مجابش طب و هندسة
وازاي هلم المادة .. ليلة الامتحان
وازاي مشاعري تحسها بنت الجيران
وازاي مخفش واقولها كل القوايل
كانت همومي في طقم عيد
وساعة روشة ونوع موبايل
مكنش لسة القلب داق
طعم الوجع والاشتياق
مكنش فيه غياب وموت
وحرقة قلب على الفراق
حنيت لوقت ماكنت اخاف
من حقنة في روشتة علاج
وقت مش مميز فيه
يعني ايه الصحة تاج
الصحة كانت مش أهم من المزاج
كبرت ليه ؟!!
وليه حياتي اتغيرت واتطورت واتكدرت
والمفاهيم الثابتة عندي اتكسرت
بقيت بخاف على ناس معايا ان يسيبوني
بقيت بخاف من القدر من البشر من الزمان
بقيت بخاف الناس يلوموا ويعيبوني
بقيت جماد من جوا .. واللقب انسان

يمر الزمان أسرع مما نتوقع ولكل فترة أحلام وأمنيات تتغير مع الوقت
اتمنى للجميع ان يحقق الله لهم كل مايتمنوه . 🙏🏻