القوة الناعمة واحدة من أهم ثروات مصر وأسلحتها.. القوة الناعمة بكل أشكالها فنانين، مبدعين، شعراء، رسامين، وعشرات المجالات.. الأغنية المصرية والفيلم المصري والمسرحية المصرية حاجات عمرها أبدي، وخرجت من إطار كونها عمل ترفيهي لأداة مُلهمة بتشكل ثقافة وعقول شعوب تانية كتير..
عشان كده واستمرارًا للدور اللي بتقوم بيه مصر كأرض خصبة راعية للمواهب؛ بعد أسابيع بسيطة هينطلق برنامج "الدوم" وهو أول برنامج لاكتشاف المواهب بيجمع بين التمثيل والغناء وتقديم البرامج في الشرق الأوسط في موسمه الأول واللي هيتم عرضه حصريا على شاشة قناة on.. البرنامج من إنتاج الشركة المتحدة للخدمات الإعلامية بالتعاون مع وزارة الثقافة وزارة الشباب والرياضة ومن إشراف وتنفيذ شركة "ميديا هب – سعدي جوهر"..
ليه البرنامج يعتبر من أكبر البرامج في اكتشاف المواهب؟.. لإن هيتم إجراء الاختيار من بين 15 ألف شاب مصري موهوب، وهيكون تحت إدارة لجنة تحكيم بتضم في عضويتها المخرج المسرحي الكبير "خالد جلال"، و"ميرفت أبوعوف"..
فيه 8 شروط لازم توافرهم في المشتركين اللي هيحبوا يكونوا جزء من البرنامج:
1 - أ عمار المشتركين بين الذكور والإناث هتكون بين 16 و 28 سنة للغناء والتمثيل، أما التقديم التليفزيوني هيكون من 21 لـ 28 سنة.
2 - الاشتراك في المسابقة للمصريين فقط ولازم إدراج رقم البطاقة الشخصية.
3 - الأولوية في الاختبارات هتكون للمشتركين المتقدمين من خلال الموقع الرسمي "الدوم" مش بأسبقية الحضور.
4 - لازم تصوير فيديو حديث مصور تحديداً للمسابقة.
5 - المشترك لازم يكون على استعداد للسفر والإقامة في القاهرة خلال فترة المسابقة إذا تم قبوله في المرحلة القادمة.
6 - المشترك لازم يحتفظ برقمه اللي هيظهر بعد التسجيل.
7 - إذا تم اختيار المشترك بعد التقديم على الموقع الرسمي هيتم الاتصال بيه لأداء الاختبارات أمام لجنة البرنامج في المحافظة التابع ليها.
8 - المشترك لازم يبلغ البرنامج بأى مشاكل صحية أو أمراض مزمنة عند الحضور للمسابقة في حالة وصوله لمرحلة الاختبارات.
القيمة الحقيقية لينا كمصريين هتلاقيها في ناس مبدعة.. ناس الموهبة بتجري في عروقهم.. بيبقى الفيصل دايماً وجزء مهم من اكتمال المعادلة هو وجود العين اللي ترصد المواهب دي وتديها فرصة العُمر وده اللي هيحصل من خلال برنامج "الدوم"..
مصر صوتها عالي ودائم، وقوتها الناعمة قوة غير قابلة للهزيمة.. مصر قدمت للوطن العربي نماذج ملهمة وعبقرية في كل المجالات.. ولسه بتقدم وهتقدم.
#بالعامية_المصرية
__________________
ابتسم ... كن متفائلا ... وقل الحمد لله 
|