السلام عليكم ورحمة الله وبركاته
اهلا وسهلا بيكم
اعذروني ان كنت هتكلم بالعامية
لكن مش مشكلة الأسلوب
المهم المضمون يوصل
لان اهم حاجة في الدين ( التقبل والمُتعه )
وانا عايز اتكلم علي حاجة يمكن تكون وجهه نظر في الدين ومن رأيي مفروض تبقي أساس الدعوة وبدايتها
ألا وهى المُتعه في الدين ,,,
ليه احنا لما بنصلي مش بنحس بالمتعه – مُعظمنا – ؟
ليه زمان هما كانوا قادرين يصلوا بالخمس ست ساعات ومش حاسس بالتعب ؟
بداية حل المشكلة - ياجماعه - هو إدراك المشكلة ذات نفسها
لما نيجي نربط ( نقارن ) بين اي عمل مُمتع – في الظاهر – والدين ؟
يعني مثلا لو قعدنا قدام ماتش كوره بما إن اغلبكم بيحب كره القدم – ثقافتكم النووية تساوي ثقافتي فيها – هنلاقي ان احنا ممكن نسمع اربع خمس ماتشات ورا بعض وعادي خالص قاعد مستمتع .. مع انك بتبذل مجهود بردو ( ذهني / انفعالي / يمكن جسمي كمان ).. بس الفرق المتعه ياجماعه .. نيجي للدين وتكليفاته
هنلاقي المشكلة في اننا بنتعب ونمل من التكليفات عشان إحساسنا بإنها تكليفات وأوامر صارمه
والله ياجماعة لو حسينا بجد ان التكليفات دي مُتعه روحية وعقليه وجسمية ونفسية
هنفضل نصلي ونعبد ربنا بس طول حياتنا ( نعبد لفظ مقصود يشمل العمل والتعليم وتعمير الأرض ..إلخ)
عايزين نحب ربنا ياجماعه .. لو سألت اي انسان كويس هيقولك انا بحب ربنا وحتي اللي مش كويس هيقولك بردو بحب ربنا .. بس عملت ايه عشان حُبك ؟ عملت ايه عشان تثبت لله عزوجل حبك - جلّ وعلا -.. والله ياجماعه الإنسان بطبيعته عاقل والنفس العاقله دايما بتشكر اللي احسن إليها ولو حتي إحسان بسيط .. ما بالك اللي مديلك عيونك اللي بتقرا بيها كلامي دلوقتي ؟ مابالك اللي مدي لوالدك مال يشتري الكمبيوتر ده او يديلك فلوس تروح تقعد في سايبر - بجد عشان الإنسان يعرف هو مقدار عقليته اد ايه ؟ يشوف بيحب ربنا اد ايه
" أرجحكم عقلا ً اكثركم لله حبا ً " ورد في الاثر
وبعد حب الله هيكون حب رسولنا الكريم
حاجة منطقيه اوي بعد حب الله
قال تعالي
( قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُوَيَغْفِرْ لَكُمْ ذُنُوبَكُمْ وَاللَّهُ غَفُورٌ رَحِيمٌ)
حبك لربك هيولد حبك لرسولك والاخذ بما آتانا به والنفور مما نهانا عنه
" وما آتاكم الرسول فخذوه ومانهاكم عنه فانتهوا "
وتعالي اتدرج معايا بالمنطق بقى
ممكن واحد يسأل انت ليه خلطت بين حب الله ورسوله والمتعه في الدين
عايزك تكون مثال في عقلك
لو انت بتاخد أوامر وطلبات من حد بتحبه اوي اوي ؟ هتنفذها وانت متضرر ولا وانت راضي كل الرضا وتبقي عايز أوامر كمان ؟ صح ؟
لازم يكون صح
احنا بطبيعتنا كدا .. لما بنحب اوي .. بنبقي عايزين نرضي حبيبنا – ولله المثل الاعلي –
تخيل بقي لما تحب ربنا وتبقي متشوق انك تعمل أوامره ؟
اتمني اكون اثرت فيكمـ واتمني اكون افدتكم بحاجة ولو صغيره .. واعذروني ان كنت اثرت في حق اي جزئية بس طبعا انا مبحبش الاسهاب ( التطويل في الكلام ) عشان الملل
جزاكم الله خيرا
ربنا يحفظكم حفظ كتابه
السلام عليكم ورحمة الله وبركاته