[DPT-Blue Phoenix]

المشاركة الأصلية كتبت بواسطة golden_man

تمام ... معلش علي تعبك
بس بم ان الموضوع استخدام ظواهر فيزيائية وتقنيات وكده ايه اللي يميز دكتور علاج طبيعي من دكتور علاج طبيعي تاني ؟

هوا الموضوع فيه تشويق كمان بس هل انا لو فتحت عياده هيكون صعب اني اجهز عيادته باجهزه بتستخدم التقنيات دي مش كده ولا ايه ؟

-اولا موضوع العيادة دا مش صعب لأن فى اجهزة رخيصة و اجهزة غالية و مش هتفرق كتير اوى يعنى المهم مهارتك انت ...

فى 3 اساليب للعلاج فى العلاج الطبيعى : 1- دا يعتبر الاهم (( التمارين العلاجية therapeutic exercises)) دى مش تمارين رياضية لأ دى تمارين علاجية الفرق اننا فى علاج طبيعى بندرس مادة اسمها الميكانيكا الحيوية ((Biomechanics)) المادة دى بنطبق بيها قوانين الميكانيكا على الجسم بمعنى بعرف حركات الجسم المختلفة و القوة و ذراع القوة و المقاومة و حاجات كدا يعنى بالتالى بقدر اعرف الخلل فى حركة العضو ((و دى بشرى مش بيدرسوها)) و طبعا من خلال دراسة مادة ((التشريح)) و بتبقى انت عارف اتجاه العضلات و هى راحة فين و جاية منين بتقدر تعالج الضو دا من خلال تمارين معينة .... لأن فى امراض بتبقى جاية نتيجة حاجة اسمها الالتصاق او غيره من الامراض و التمارين بتقضى على الحاجات دى و من غير اثار جانية فالتمارين بتحتاج منك ممارسة جامدة و فهم تشريح و ميكانيكا صح و الا هيكون ملهاش لزمة..


2-مادة العلاج الكهربى ((Electrotherapy)): فى بعض التمارين بتكون مؤلمة او المريض جاى مش قادر يحرك طرف من اطرافه من كتر الوجع احنا مش بنستعمل بقى مسكنات ادوية لأ ... احنا عندنا نظريات للألم و هى زى ما انت اخدت فى الاحياء و هتاخد بالتفصيل لو دخلت علاج طبيعى ان الالم دا اشارات او سيال عصبى ليها ممرات داخل النخاع الشوكى و المخ ... انا بقى باجى على نقط من الجسم بتعرفها و بقطع طريق الاشارات دى من خلال انى ببعت اشارات كهربة فى الاعصاب تقفل طريق اشارات الالم و بالتالى المخ مش بيدرك الالم و مش بيحس .. او طرق تانية كتير عندنا من الاجهزة دى جهاز مثلا اسمه الTENS .. طيب مثلا فى مريض عمل عملية جراحية لأن العصب بتاعه كان اتقطع فالجراح خيط العصب هو فعلا خيطه بس العصب لسه ملحمش او يعنى ملتأمش فمش بيوصل اشارات كويس عشان كدا العضلات بتتشل لأن الى بيحرك العضلات هى الاعصاب ... طيب لو العضلة دى فضلت مثلا سنة مش بتتحرك هيحصلها ضمور او موت الخلايا و بالتالى يحصل شلل فى الجزء دا لأ بقى انا (بالعلاج الطبيعى و بموجات الكهرباء) بقدر اخلى العضلة تنقبض من غير عصب و ميحصلهاش ضمور او ابدأ ازود باجهزة تانية سرعة التئام العصب و ازود توصيل العصب يعنى زى ما اكون ببعت اشارات كهربية للمخ و اقوله ركز العصب دا لسه بينقل فيبدأ المخ يدرك دا ...

مثلا فى واحد عمل حادثة و كان فى عضلات يتعمل ثنى للذراع فالجراح اضطر انه يحط عضلة من الى بتعمل فرد للذراع مكان عضلة من الى بتعمل انثناء كدا بتلاقى المريض مش عارف يحرك العضلة دى لأن المخ مادركش الحركة الجديدة فبرده انا بنبه المخ و بعمل انقباض للعضلة عشان تبدأ الذراع تتحرك...


3- فى العلاج المائى ((Hydrotherapy)) : مثلا انا فى واحد مشلول و انا عملت برنامج علاج كهربى و تمارين و بدأ الشلل يقل يعنى بأ يحرك اطرافه بدرجة بسيطة بس مش قادر كدا بلجأ للعلاج المائى ... مثلا بنزله فى حوض سبحاة و بستغل قوة دفع الماء عشان تقلل من وزنه طبقا لقاعدة ارشميدس مثلا بخلى الماء تغمر لحد كتفه فبيقل وزنه 90% مثلا لو وزنه 100 كيلوا هيبقى كأنه 10 كيلو بس فى الماء!!!! و بالتالى لما هيجى يحرك اطراف جسم فى الماء هتتحرك بسهولة و اقدر اعمله برنامج التامرين فى الماء و كمان مع العلاج الكهربى لحد ما الشلل يروح ....


و هكمل لسه بس انت اقتنعت بالحاجات الى فوق دا انا عارف انها غريبة بس ممتعة مش اى حد بيمارس العلاج الطبيعى صح هو المجال لسه جديد بس بس هيتشهر قريب