 السلام عليكم و رحمة الله
اهلاااااااا بسنة اولى علوم
او زى ماهستمعوها كتير
طلبة المستوى الأول
طبعا انتو عرفتو ان نظام الكلية
"الساعات المعتمدة"
ايه بقى نظام الساعات المعتمدة؟؟
هو معناه ببساطة جدا
ان لكل طالب عدد ساعات معينة ما يتخرجش من الكلية الا لما يكون درسهم
فى كل تيرم المفروض يبقو 18 ساعة مش هيكترو عن كده ولا هيقلو
الا اذا كان الطالب معدله التراكمى اقل من واحد طبعا ده بيبان من النتيجة .. و ع فكرة المعدل التراكمى ده اللى بيحدد مين الاول ع القسم و مين التانى و هكذاااا
تعالو بقى نحاول نفهم الموضوع من الاول
دلوقتى المفروض هيكون فى مقابلة ليكم مع وكيل الكلية
المقابلة دى للى مش راح
بيعرفوكم فيها بنظام الساعات المعتمدة .. و المقررات.. و الاقسام و هكذا
و بيدوكو ورقة فيها الاقسام عشان تختارو القسم بتاعكو
بالنسبة لطلبة علمى علوم الاقسام اللى هيختارو منها دى
علم الحيوان-الجيولوجيا-النبات-الكيميا-الميكروبيولوجى-البيوتكنولوجى و البيئة البحرية
بالنسبة لطلبة علمى رياضة
الكيميا-الفيزيا-رياضيات-علوم الحاسب-الجيوفيزيا التطبيقية-الجيولوجيا
بعد الاقسام هتلاقو مكان ل 3 رغبات تكتبوها
فانتو هتكتبو الاقسام اللى عازوزينها حسب ترتيبها بالنسبة لكم
يعنى مثلا
انا عاوزة كيميا لو مش كيميا بيقى ميكرو لو مش ميكرو يبقى بيوتكنولوجى
هتكتبوهم بترتيبهم .. و ادارة الكلية هتقسمكم حسب رغباتكم
الا اذا كان فى قسم مثلا عدد كبير من الدفعة عاوزه و باقى الاقسام مش فيها طلبة
فهيخلو للقسم اللى الكل عاوزه ده(قسم الكيميا بمعنى اصح) عدد معين من الطلبة يدخلوه حسب درجتهم فى الكيميا فى الثانوية العامة
و يقسمو الباقى بقى حسب رغباتهم و ترتيبها
بالنسبة للى ممكن يدخلو قسم هما مش عاوزينه
فى حاجة اسمها تغيير مسار
تقدرو تغيرو قسمكم من بعد نتيجة اوى تيرم لو تحبو
و طبعا بتدرسو المواد الاختيارية بتاعت القسم .. تمام؟؟
اخترتو القسم كده
نيجى بقى للمقررات
بدءا من دلوقتى لحد اخر يوم فى اول اسبوع فى الدراسة ده وقت تسجيل المقررات .. كل واحد هيروح للمرشد الاكاديمى بتاعه و يختار المقررات بتاعته
فى المستوى الاول مش هيبقى اختيار اوى
لان فيزيا و كيميا و رياضة مفروضة ع الكل بلا استثناء لان دى متطلبات اجبارية من الكلية
بعدين بقى كل قسم هيبقى ليه مقررين او ممكن 3 مختلفين عن باقى الاقسام
بالنسبة لكيميا كان التيرم الاول بارا و احصا
اللى مش عارفين المرشد الاكاديمى بتاعهم
بيبقى فى ورق متعلق فى اسامى الطلبة مع مين من المرشدين الاكاديميين
و اللى مش عارف برده ممكن يسال الشئون و هما هيقولوله مين المرشد بتاعه
طبعا يا جماعة المرشد الاكاديمى ده بيبقى دكتور و غالبا بيبقو دكاترة كبار ..
كده اخترنا المقررات بتاعتنا
نكتب الجدول بتاعنا طبعا بيبقى متعلق .. كل واحد حسب المجموعة اللى فيها
اخدنا الجدول و ظبطنا المقررات
من اول يوم فى تانى اسبوع نبدأ جد بقى
محاضرات و عملى
طبعا فى الاول مش هيبقى فى كتب لكذا اسبوع
اللى يقدر يكتب كلام الدكتور ياريت هيساعده اكيد باذن الله
و لازم لازم تركزو فى المحاضرات ..
حاولو تبقو تروحو المكتبة و تدورو ع الحاجات اللى الدكتور قالها فى الكتب .. و ذاكروها
لما تيجى الكتب هتلاقو معظم اللى قريتوه فى المنهج
فى نص التيرم
يعنى فى الاسبوع السابع باذن الله
هتبدأ امتحانات الميد تيرم
امتحان بسيط جدا لانه امسكيو بتحلوه فى المحاضرة غالبا بتبقى مدته 10 دقايق و بعدين تكملو المحاضرة عادى
نسبة الميد تيرم بقى 10% من ال40% بتاعت العملى
فحاولو مش تضيعوها
المفروض انه يبقى ميد تيرم واحد فى التيرم .. بس فى دكاترة بيخلوهم 2 و ياخدو المتوسط
بعد الميد تيرم هتكملو دراسة عادى
بعدين امتحانات العملى بقى ..
و بعدها النظرى ..
و بعدين النتيجة
و بعدين بقى هتيجو فى المنتدى نعملكم موضوع
و نقولكم الف مبروووووووووووووووووووووووك ع تفوقكم
فى حاجات متعلقة بالدراسة ماقلتهاش بس انا قاصدة ده .. بس لو عندكم اى استفسار قولوه و هجاوبكم عليه باذن الله
فى حاجة بقى عاوزة اقولها بعيدا عن نظام الكلية
الكلية نفسها
بجد يا جماعة
علوم كلية ممتعة لابعد ابعد الحدود .. و طبعا اهميتها متهيالى عارفينها
بالنسبة لى هيا و هندسة افضل كليتين ..
ماتسمعوش كلام حد .. لا مجتمع و لا اصحاب ولا حتى زمايل
و بلاش تدخلو نفسكم متاهة ان المجتمع بيبص لكلية كذا انها احلى من علوم و بالتالى انت ترد لا علوم احلى
ركز انت عاوز ايه بالضبط و ماتسمعش كلام حد
سيب اللى يتكلم يتكلم
و عشان تكونو عارفين
نظرة المجتمع لعلوم -حاليا- انها لا شئ
متفقون؟؟
المهم
نظرتك انت ليها ايه
و هدفك منها ايه
اقولكم فكرة حلوة اوى
لما حد يتكلم معاك ان علوم مش حلوة
خليه يتكلم
و انت جواك قول لنفسك انك مقتنع بيها .. انت ليها .. هو مش ليها دى حاجة ترجعله كل واحد حر
او الافضل تقولهم مايتكلموش معاك فى الموضوع ده ..
بالتوفيق يارب
منقوول
__________________
We create what other Applicate
We are Scientists
|