اهلا بيكم اخوتى الاعضاء
موضوعى انهاردة ان انا فى الفترة الاخيرة الخوف بدأ يتسلل لقلبى بطريقة فظيعة وده عرض لأجابة السؤال :ليه انا خايف؟
خايف لانى حاسس بضعف فى الثقة بالنفس وان الثانوية العامة مش للى زيى
خايف لأنى كان ليا حلم وحاسس دلوقتى انه تقريبا طار منى
خايف لان دفعتى بالذات وخاصة فى مدرستى فيها عدد كبير من العباقرة عددهم يزيد عن 60 طالب وكلهم عاوزين يدخلوا طب وكلهم مستواهم يدخلهم طب...فأنا اروح فين بين الناس دى؟
خايف كمان لأنى حاسس انى معملتش اللى عليا رغم انى كنت بذاكر ومقطع نفسى واحيانا مكنتش بنام بس القضية انى مش بعرف انظم وقتى لو كنت بحل تمارين ممكن اسئلة كتير تقف قدامى وعلشان افكر فيها ممكن تمر 3 ساعات فجأة من غير مااحس بيها فمش بلحق اوريها كلها للاستاذ بسبب وقت الحصة
خايف لأنى وعلى الرغم انى بحل مش محلتش زى ماحل الطلبة اللى ذكرتهم قبل كده ...
واهم نقطة فيهم كلهم:
خايف لأن انا مش ذكى زيهم ولو جاب فى الامتحان افكار ذكية ...غالبا مش حقدر اجيبها وعلشان احقق حلمى المفروض اكون عبقرى
بأختصار كان نفسى ادخل كلية طب ... بس حاسس ان التحصيل اللى انا عملته طول السنة مش حيخلينى احقق نص حلمى