[تامر الطويل]

صحيت من النوم الصبح

الجزء الثالث

الحلقه التاسعه

ويقعد امير واخوه والشاب الثورى منتظرين المعلم دمومه لمده 3 ساعات لحد ماينامو كلهم ، يدخل المعلم دومه وأول ما يدخل يقول لخشبه
المعلم دومه / هاتلى الواد اللى قلى ياجعر
خشبه / حاضر ياسيد المعلمين
ويروح خشبه يجيب امير يلقيه نايم فيضربه برجله ويقوله اصح ياحيلتها المعلم عايزك وشكله نويلك على نيه سوده زيى وشك ، يصحى امير ويقوله بغضب وهو بيدعك عنيه
امير / فى ايه ياعم انت هو الواحد مايعرفش ينام شويه ، فين عصابات زمان وخطف زمان كانوا بيدو للمخطوف حقه فى الخطفه ، من اكل لنوم لحتى بريك فاست
خشبه / بريك ايه
امير / بريك فاست ياحمار يعنى عصير جوافه
خشبه / قوم فز ياله كلم المعلم
وفعلا يقوم امير وقدام المعلم واول ما يشوفه امير يوطى على دماغه ويبوسها وهو بيقوله
امير / هات دماغك الكريمه ابوسها ياسيد المعلمين ، والله يامعلم ومالك عليا حلفان انا كنت قاعد بدعى عليك ، قصدى بدعيلك ان ربنا يوفقك وتعرف تهرب من الجيش ، حتى اسال الواد خشبه
ويبص امير لخشبه ويغمزله بعنيه ويقوله صح ياخشبه ياحبيبى ، فينظر خشبه لامير بغباء ويقوله
خشبه / مال عنيك ياله ، انت بتغمزلى كده ليه ، هو انت فاكرنى ايه من العيال السيس، ولا بلاش السيس احسن نتفهم غلط ونروح وراء الشمس انا مش ناقص ،،،نمسح السيس ونخليها من العيال الكورك ياكورك
ينظر امير الى خشبه والى المعلم ويقول له
امير / صدقتنى ياسيد المعلمين
يقوم المعلم من على كرسيه ويضرب خشبه كف على وشه يوقعه على الارض ، ويبص لأمير بغضب ويقوله ، انت تخرص خالص لسه دورك ماجاش ، اما انت بقه ياخشبه الكلب ، فهتشوف معايه ايام سوده
فيقوم خشبه وهو ماسك وشه ويقوله
خشبه فى ايه بس يامعلم ،هو انا عملت ايه ؟
المعلم / المصيبه انك معملتش ياجعر ، انا جاى وفاكر الواد ده اتظبط وانى سايب ورايه رجاله هتخدلى حقى ، بقه اجى الاقى الواد اللى شتمنى نايم ولسه بصحته ، ليه سايب معاه مادونه
فينظر امير لخشبه بغضب ويضربه بالقلم على وجهه ويقوله
امير / مزعل سيد الناس ليه ياضى ، هو مين الجعر اللى شتم سيد الناس وانا اكله بسنانى
ويبص امير للمعلم ويقوله ، شورلى عليه بس ياسيد الناس ومش هيطلع عليه نور ( وفرصه والنور ديما بيقطع
يقوم المعلم ويشد امير من قميصه ويقوله

المعلم / حركاتك دى متنفعش معايه
امير / بص ياسيد الناس ، لو عايز القميص خده مايغلاش عليك بس ده عليه اقساط لسه مااندفعتش سيبه لحد ما اخلص اقساطه واوعدك بعدها اجيبهولك بلفه هديه ، بس بالله عليك سيبه ده القميص اللى حيلتى ، وبعدين ياسيد الناس احنا بلطجيه زى بعض ومايصحش نعمل كده فى بعض

المعلم / بلطجيه زى بعض مرة واحده ، طيب هعدهالك ، وانت بقه بلطجى فى ايه
امير / تعرف المعلم سنجه معلم مدينه نصر
المعلم / طبعا اعرفه ده صحبى واجل رجوله ، ده مقفل لوحده حاره ، ده لسه حتى من اسبوع ضارب عيل سيس فى شارع الفتح
امير / انا بقه العيل السيس ده
المعلم / هو انت الله يخرب بيتك ده مستحلفلك وموصى معلمين البلد اننا لو شوفناك نجيبك ليه ، انت عملتله ايه ياض ، ده كان زى المجنون
امير / والله يامعلم ماكنت اقصد هى اللى رشقت على قفاه ، وبعدين ما هو برضو اللى كان وقف غلط ، شايفنى عمال اضبش بإديا يقف فى وشى ، اهو خد القلم على قفاه
المعلم / الله يخرب بيتك بقه تضرب المعلم سنجه على قفاه ، دى عمرها ماحصلت ، وازى هربت منه ؟
امير / ياعم والله هو الله غبى انا لسه بقوله البوكس ومكملتش الكلمه لقيته جرى وسبنى
المعلم / وعملت ايه بعدها
امير / رفعته قبل ما يقع
المعلم / هو ايه ده ؟
امير / البوكسر ياعم ، اصله من كتر الضرب كان هيقع
المعلم واله ياخشبه امسكلى الواد ده ، شكله ايامه سوده معايه وحضرلى برميل فيه مايه
امير / ربنا يخليك ياكبير والله لسه مستحمى

فينظر المعلم الى خشبه ويقوله ، خد البلوله دى من قصاده وارميه جمب زميله لحد ما اتصل بالمعلم سنجه وهو يجى يشوف هيعمل فى ايه
امير / مابلاش سنجه يامعلم ، ده ايده تقيله ، واخر مرة بصراحه كان بيضربنى فى حتت غريبه ، فين ضرب زمان وشلليط زمان ، ولا شتيمه زمان اللى كانت بتاخد حقه ، فين زمن الضرب الجميل
ينظر المعلم اللى خشبه ويقوله
المعلم / معاك مطوة ياخشبه
خشبه / ايوة ياكبير اهيه
المعلم / خلص على الحيوان ده ، وريحنا منه

ولسه خشبه هيضربى يالمطوة اغمى عليا و

صحيت من النوم الصبح