[msamido]

بسم الله الرحمن الرحيم

فى البداية يا جماعة عايز نتفق على شوية اساسيات وعندى سؤال ياريت كل واحد يجاوبنى عليه فى البداية :
إنت(ى) ليه دخلت(ى) حاسبات ؟؟

ومش عايز حد يقولى علشان بحب الكومبيوتر كلنا بنحب الكومبيوتر حتى طلبة الحقوق بيحبوا الكومبيوتر اوك ؟

نبدأ بقى
أولا يعنى إيه برمجة "programming " ؟

كلمة برمجة من معناها الحرفى يعنى بيعمل برامج طيب يعنى ايه بيعمل برامج ويعنى ايه برنامج ؟
البرنامج هو وسيط بين الآلة وبين الإنسان يعنى البرنامج بيكون ليه وظائف اساسية مطلوب من الكومبيوتر ينفذها والإنسان مينفعش يطلبها من الكومبيوتر كده من نفسه مثال بسيط خالص وكلنا بنستخدمه _ الآلة الحاسبة _ هى برنامج بسيط وظيفته الأساسية القيام ببعض العمليات الحسابية فهى تقوم بدور الوسيط بين الحاسب والإنسان للقيام بالعمليات الحسابية " ينفع تيجى كده وانت على الـ desktop مثلا وتروح عامل 5 * 6 وتضغط انتر وتستني النتيجة ؟؟ " خليك مستنى بقى
هو ده البرنامج والبرمجة بقى هى صنع هذه البرامج " كلام حلو لغاية دلوقتى ؟"
نيجى للموضوع علميا شوية
علمياً البرمجة هى وسيط بين لغة الكومبيوتر ولغة الإنسان
لغة الكومبيوتر ؟؟
يا ترى الكومبيوتر بيتكلم بأى لغة بالظبط ؟؟
الكومبيوتر لغتة هى لغة (0 و 1 ) بس هى دى كل الأبجدية بتاعته مش بيفهم غير زيرو وواحد وتسمى binary
مثال بسيط على لغة الكومبيوتر :
0 بلغة الكومبيوتر هى زيرو بلغة الإنسان
1 بلغة الكومبيوتر هى واحد بلغة الإنسان
10 بلغة الكومبيوتر هى اتنين بلغة الإنسان
11 هى ثلاثة بلغة الإنسان
100 بلغة الكومبيوتر هى أربعة بلغة الإنسان

1000 بلغة الكومبيوتر هى ثمانية بلغة الإنسان

حد خد باله من أى حاجه ؟؟
مش مهم

المهم إن دى لغة الكومبيوتر والإنسان علشان يتعامل معاه مفيش حل غير إن حد فيهم يفهم لغة التانى ؟
وطبعا الكومبيوتر قال اشمعنه انا اللى اتعلم لغة الإنسان والإنسان قال اشمعنه أنا اللى أتعلم لغة الكومبيوتر وفى النهاية جابوا حل وسط وهو لغات البرمجة
لغات البرمجة هى لغات وسيطة ليس إنجليزية عادية وبالتأكيد مش زيرو وواحد
هى دى بقى اللى بتقوم بدور الوسيط بين المبرمج والكومبيوتر ومن خلالها يتم تصنيع البرامج
هنختم موضوعنا بقى المرة دى بأشهر أنواع لغات البرمجة
أشهر أنواع لغات البرمجة هى :
(c) وتسمى لغة السى بكل فصايلها بقى من (سى "c" و سى بلس بلس "++c" وفيجول سى "Visual c" وأهمها على الإطلاق فى المرحلة الحالية السى شارب "#c" ) ولغة البرمجة دى بتتبع شركة مايكروسوفت فهى من تتولى تطوير البيئات المختلفة فى استخدامها زى ايه البيئات دى" كلمة البيئات ترجمة حرفية لـenvironment"
زى مثلا Visual Studio. Net ودى حاجه هنتكلم عنها باستفاضة بعدين
(Java) لغة الجافا
وهى لغة برمجة أخرى تتبع شركة SUN
أهم ثالث لغة برمجة هى الفيجوال بيسك "visual basic" ومنها أيضا فيجوال بيسك دوت نت "vb.net"
طبعا مش هى دى بس كل لغات البرمجة لكن اشهرها واكثرها استخداما فى الأسواق
ايه بقى يا عمنا الفرق بين اللغات دى
أهم حاجه لازم نفهمها إن أساسيات البرمجة واحدة بغض النظر عن اللغة المستخدمة فى البرمجة لكن الأساس واحد والفكر واحد لكن تطبيق الفكر بيختلف من لغة لغة والإختلاف بيكون فى أبجدية اللغة أو بلغتها الصحيحة اسمها syntax الفرق بيكون فى الـ syntax
طبعا لسه مش واضحة النقطة دى لكن هتوضح اكتر لما نبدأ برمجة إن شاء الله

فى النهاية عايز أقول إنى مدرس فاشل جدا وأنا اصلا قاعد برتجل الموضوع ده كده ومش ماشى بنظام فى الكورس ده المهم أكون وصلت أى حاجه واللى عايز أي سؤال يسأل إن شاء الله أجاوب ؟

شكرااااااااااا
.
.