وزن المعادلة يعني تخلي عدد ذرات كل عنصر من المتفاعلات (على شمال السهم)
بيساوي عدد ذرات نفس العنصر في النواتج (يمين السهم)..
💉 مثلا معادلة زي دي:
H₂ + O₂ → H₂O
ع الشمال فيه اتنين H و ع اليمين بردو اتنين H يبقى العنصر دا تمام كدا..
نشوف العنصر اللي بعده الاكسجين فيه ع الشمال في المتفاعلات جزئ اكسجين (فيه ذرتين)
وع اليمين في النواتج فيه ذرة واحدة بس فلازم نساوي عدد الذرات ع الطرفين يعني محتاجين ذرة O كمان في النواتج
عشان يبقى فيه اتنين ع الشمال واتنين ع اليمين وتبقى المعادلة موزونة فهنضرب ال H₂O في 2 كدا:
H₂ + O₂ → 2H₂O
كدا بقى الاكسجين موزون وتمام..
نأكد ع المعادلة تاني
هنلاقي الهيدروجين اللي ظبطناه في الاول مبقاش تمام دلوقتي 
بقى فيه 4H ع اليمين و 2H ع الشمال
فهنخلي اللي ع الشمال توصل ل4 فهنضربها في اتنين:
2H₂ + O₂ → 2H₂O
نعد ذرات كل عنصر بقى عشان نشوفها موزونة ولا لأ:
الهيدروجين: 4 ذرات ع الشمال و4 ع اليمين √ العنصر دا تمام..
الاكسجين: ذرتين ع الشمال وذرتين ع اليمين √ تمام كدا بردو..
كدا بقت المعادلة موزونة خلاص 
كام مثال محلول كدا..
//مثال1//
اوزن المعادلة دي::
HgO → Hg + O₂
(الحل)
فيه ذرتين O ع اليمين وواحدة ع الشمال فهنضرب HgO في اتنين عشان نساويهم:
2HgO → Hg + O₂
كدا بقى فيه اتنين Hg ع الشمال وواحدة بس ع اليمين فنضرب اللي لوحدها ع اليمين دي في 2 عشان نساويهم ببعض..
2HgO → 2Hg + O₂
ودا بقى الوزن النهائي للمعادلة، حتى شوف عدد ذرات ال O و ال Hg ع الطرفين هتلاقيها متساوية.
#السر اننا بنمسك المعادلة عنصر ورا التاني ونشوف عدد ذرات العنصر ع الشمال بيساوي اللي ع اليمين ولا لأ ،
لو مش بيساوي نضرب الصغير في رقم لحد ما نوصله للكبير ويتساووا مع بعض..
//مثال2//
اوزن دي كدا::
Fe + O₂ → Fe₂O₃
(الحل)
نضرب Fe اللي ع الشمال في 2 كدا تبقى اتساوت مع اليمين.
بس ثواني دا فيه ذرتين O ع الشمال و3 ع اليمين.. احنا قولنا نضرب الصغير في اي رقم بحيث نوصله للكبير
يبقى نضرب O₂ اللي ع الشمال دي في 1.5 عشان يبقى عدد الذرات ع الشمال 1.5×2=3 زي اليمين..
2Fe + 1.5 O₂ → Fe₂O₃
هو كدا المعادلة موزونة تمام بس مينفعش نكتب عدد جمبه كسر زي 1.5 كدا،
لازم نخليه عدد صحيح فهنضرب المعادلة كلها في 2 عشان نطير الكسر دا:
4Fe + 3O₂ → 2Fe₂O₃
ودا الوزن النهائي للمعادلة بقى..
//مثال3//
اوزن بقى
Fe + H₂O → Fe₃O₄ + H₂
(الحل)
فيه تلاتة Fe ع اليمين يبقى نضرب Fe اللي ع الشمال في تلاتة
3Fe + H₂O → Fe₃O₄ + H₂
فيه 2H ع الشمال و 2H ع اليمين مظبوط كدا..
الO فيه واحدة بس ع الشمال واربعة ع اليمين فنضرب اللي ع الشمال في اربعة
وطبعا لما نضرب في رقم بنكتب الرقم قبل المركب كله مش قبل الO بس:
3Fe + 4H₂O → Fe₃O₄ + H₂
نتأكد من كل عنصر تاني نلاقي الH مش مزبوط، ع الشمال 4×2=8 ذرات وع اليمين اتنين بس،
نضرب اللي ع اليمين في اربعة عشان نوصلها ل8 ونساوي الطرفين ببعض:
3Fe + 4H₂O → Fe₃O₄ + 4H₂
كدا العناصر كلها متساوية ع الطرفين يعني دا الوزن النهائي للمعادلة.
#ملحوظة مش مهمة اوي..
لما يقابلك في الوزن مجموعات ذرية زي الكربونات CO₃ والكبريتات في الطرفين اتعامل مع المجموعة على
اساس انها عنصر واحد يعني SO₄ مش تعدهم اربعة O وواحدة S لا كلها على بعضها كدا حاجة واحدة
متقسمهاش (دا لو المجموعة موجودة على الطرفين مش طرف واحد بس)..
الرد التاني هسيب فيه اهم المجموعات الذرية اللي ممكن تقابلك..
//مثال4//
اوزن المعادلة
Fe + H₂SO₄ → Fe₂(SO₄)₃ + H₂
نبدأ بالحديد، نضرب Fe اللي ع الشمال في اتنين..
2Fe + H₂SO₄ → Fe₂(SO₄)₃ + H₂
وبعدين فيه اتنين H ع اليمين والشمال تمام كدا..
وفيه SO₄ واحدة ع الشمال وتلاتة ع اليمين نضرب ال H₂SO₄ في تلاتة عشان نساوي طرفين ال SO₄ ببعض.
2Fe + 3H₂SO₄ → Fe₂(SO₄)₃ + H₂
دلوقتي بقى ال H ع الطرف الشمال عدده زاد 3 اضعاف (3×2=6 اتشات) فعاوزين نخلي الطرف اليمين مساوي ليه
يبقى نضرب ال H₂ المتطرفة دي × 3 عشان يبقى عدد الH ع اليمين والشمال ستة..
2Fe + 3H₂SO₄ → Fe₂(SO₄)₃ + 3H₂
كدا عدد ذرات العناصر كلها متساوي على الطرفين ودا الوزن النهائي ليها حتى اتأكد بنفسك..
ودول كام معادلة لو حابب تختبر نفسك في الوزن يعني وهسيب اجاباتهم في اول رد عشان تتأكد من اجابتك..
(1) CH₄ + O₂ → CO₂ + H₂O
(2) Na + H₂O → NaOH + H₂
(3) Ag₂O → Ag + O₂
(4) Al + Fe₃N₂ → AlN + Fe
(5) C₂H₆ + O₂ → CO₂ + H₂O
(6) NH₃ + O₂ → NO + H₂O
(7) BF₃ + Li₂SO₃ → B₂(SO₃)₃ + LiF
خد بالك من SO₃ دي..
(9) HCl + CaCO₃ → CaCl₂ + H₂O + CO₂