فى أوقات المحن والكوارث الواحد مننا بيحس :
١- بحالة ضيق وكأن فى حاجة كابسة على صدرك
٢- حالة قرف وكأنك كارف على كل حاجة ومفيش حاجة عاجباك
٣- حالة فتور وهزل وضعف عام وانخفاض فى الطاقة (انعدام نشاط).
وطبعا فى أعراض تانية كتير ولكن اعلم الآتى:
١- انت مش لوحدك فخد بالك بلاش تشخصن الأمور بانك تظن انك انت لوحدك ضعيف ومنعدم الإرادة الخ
٢- مفيش حاجة بتفضل على حالها وكله بيعدى أحيانا كل ما هو منتظر منّك هو الصبر الجميل أى تحمّل الوضع وبالذات وضعك وحالتك دون سخط واعتراض.
٣- حاول ما تستسلمش للوضع كليا وكل ما لقيت منفذ تعمل حاجة مفيدة أو مختلفة اعملها لان الأعمال البسيطة دى ممكن تضاف لرصيد ثقتك بنفسك وإحساسك بأنك إنسان قادر على الفعل والتفاعل.وده بيسرّع عملية التعافي.
٤- اتكلم ...... وعبّر عن مشاعرك ومش على السوشيال الميديا ولكن مع ناس حقيقية. الأنس بالآخرين مهم جدا نفسيا ، أى نعم أحيانا الواحد بيكسّل أو بيتردد يحكى بس لما بيعمل ده بيرتاح .
٥- ولما تحس انك أحسن شوية إحمد ربنا بصوت عالى وفكّر نفسك انت كنت عامل ازاى من يومين . راجع دايما الشريط الزمني وان ازاى حالك بيتغيّر. بلاش ذاكرة السمكة دى.
أنا بتكلم بشكل عام وأعلم جيدا ان الكلام ده ممكن انه لا ينطبق على حالتك سواء كانت أسوأ بكتير أو أفضل.
|