تجارة انجليش
FCES
اولا أأسف على التأخير الشديد اللى حصل فى تنزيل البوست دا بس فيه ظروف حصلت كدا خلتنى اتأخر فى كتابته
شد حزامك وافتحلي بلوتوث دماغك
احنا وصلنا دلوقتى لانك خلاص اسمك متسجل ضمن المقبولين في تجارة انجليش الحمد لله وطبعاً سيادتك دفعت المصاريف والحياة بيس
تماااااام اوي كدا
اول يوم فى الدراسة لاااازم تنزل الكلية
ليـــه ؟
عشان تعرف اسمك متسجل فى انهى جروب
يعنى ايه جروب ؟؟
شعبة انجليش كتيرة شوية
حوالى 400 او 500 طالب
فايستحيل ان البشرية دي كلها تاخد مع بعض
الا فى حالة واحده وهيا المواد "الغير تجارية" زي ماهتعرف بعدين
فالكلية بتضطر انها تقسمهم لجروبات
كل جروب بيبقى فيه حوالى 80 طالب
والجروبات دي مالهاش توزيع معين للحروف زي تجارة عربى كدا
وعشان كدا انا مش هاقدر اقولك انت في انهي جروب بالظبط
لازم تنزل بنفسك وتشوف اسمك
هاتتلاقيه فيــــن ؟
متعلق قدام الباب المراية بتاع مبنى تجارة انجليش
حددت اسمك في انهى جروب خلاص ؟
الحمد لله
باقي حاجة واحده بس وهيا انك تعرف جدول محاضراتك
هاتسيب الباب المرايه خلاص وتخش المبنى جوا في الارضى
هاتسأل اي حد تقوله لو سمحت الاقي الجداول فين
غاااالبا هاتلاقي زحمة مهولة وساعتها اعرف ان الزحمة دي على جداول سنة اولي
هاتخش وسط الزحمة دي وتحاول تنقل الجدول بتاعك
انهى جدول ماهو فيه جداول كتيرة ؟؟
هاتنقل الجدول بتاع الجروب اللى انت تبعه يا ذكى
وعشان خاطري بلاش حَوَل واتأكد ان الجدول دا بتاع سنة اولي مش بتاع سنة رابعة !!
عرفت جروبك ؟ ونقلت جدولك ؟
شااااااااطر
وقفت في نص المبنى كدا وتايه ومش عارف اي حاجة في اي بتنجان
بص يا حج .. المبنى اللى انت واقف فيه دا بيتكون من 3 ادوار + الارضى
الدور الارضى
اول مابتخش من باب الكلية بتلاقى على شمالك الحمام وعلى يمينك السلم
وفي وشك الساحة بتاعة المبنى
هاتمشي شوية قدام هاتلاقى على شمالك مدرج الكلية (Audit.) وعلى يمينك شئون الطلبة وشئون الخريجين
هاتمشي قدام شوية هاتلاقى الاصانصير وحصيرة صغيرة كدا عشان الصلاة :D
من اول الدور الاول للدور التالت هاتلاقي فيه 28 رووم
الروومز دي هيا اللى حضرتك هاتاخد فيها المحاضرات
بس خد بالك اللى يخصك من الروومز دي هيا من اول رووم لغاية رووم 24 (اسوأ رووم فى المبنى بجد)
لان بدءا من رووم 25 لغاية رووم 28 دي تبع
برنامج جورجيا
"وهاعرفك ايه برنامج جورجيا دا بس في بوست منفصل"
المهم دلوقتى انك عرفت المبنى بتاعك دا في ايه وتمام كدا
لانك هاتقعد فيه اربع سنين فلازم تكون عارفه كويس
طب دلوقتى انت عرفت ان الروومز دي اللى هايتاخد فيها المحاضرات
ودا شكل الرووم اللى انت هاتحضر فيها
امال المدرج (الاوديت) وظيفته ايه في الحياه ؟؟
الاوديت دا ياسيدي اللى بيتجمع فيه كل الجروبات عشان يحضرو المحاضرات اللي مش تجارية
يعنى ايه مش تجارية ؟؟
يعنى المادة ذات نفسها بيقوم بتدرسيها دكاترة من بره الكلية
زي الـ economics فى الترم الاول والـ economy والـ law فى الترم التاني
الـ economic اصلا مادة تبع كلية آداب
والـ economy مادة تبع سياسة واقتصاد
والـ law تبع حقوق
طب اشمعنه المواد الغير تجارية هيا بتتاخد في الاوديت ؟؟
عشان يجمع كل الشعبة وتتاخد في محاضرة واحده
لانه ليس من المعقول خالص ان 6 دكاترة يسيبو شغلهم الاساسي وييجو لتجارة عشان يدرسو مادة لكل جروب من الجروبات !!
لكن الانسب ان دكتور واحد او دكتورين بالكتير اوي يدرسو هما المادة لدفعة الشعبة كلها مرة واحده
فهمت ؟؟؟
ودا شكل المدرج
نرجع بقى لمرجوعنا تانى
تبص لجدولك تشوف عندك محاضرات امتى
والوقت اللى يبقى فيه عندك المحاضرة تطلع على طول على الرووم بتاعتك او شوف انت هاتاخدها فين وتخشها
وكل روم بتكون مجهزة بكذا تكييف وبروجيكتور ووايت بورد زي ماشوفت في الصورة قبل كدا
طبعاً نظام المدرسة دا اتلغى وتفرمته من درايف السي في مخك نهائى
بمعنى نظام انك تخش الرووم وتجري ع المكان واللى يلحق الاول ودا يبقى مكانه طول السنة دا نظام مالوش مكان في الكلية خلاص
انت اه يستحسن تخش بدري عشان تعرف تاخد مكان كويس قدام تعرف تتابع فيه الدكتور كويس وتبقى مستوعب الكلام
لكن دا مايمنعش انك لو قعدت ورا هاتبقى فاهم برده
هاتفضل قاعد مستني لغاية ماتتلاقي واحد محترم كدا داخل الرووم ببدلة وشكله باين عليه انه نضيف .. هوا دا الدكتور
طبعا هايبتدي يرحب بيكو ويديكو نبذة عن الكلية ويرغى شوية
وماتستعجبش لو بدأ الكلام بالانجليش .. عاااااااادي جدا جدا
هاتتعود بعد كدا وهاتاخد على كدا
طبعاً خلال الاسبوع الاول من الدراسة غاالبا مابيبقاش فيه غياب
ليـــه ؟؟
عشان الـ IDs بتاعتكو لسه ماتوزعتش
حد يقولي يعنى ايه ID ؟
اقوله الـ ID دا عبارة عن رقم ظريف كدا حضرتك بتاخده في اول السنة
والرقم دا هوا بيكون الرقم التعريفي بتاعك وهوا اللى بتكتبه على اي كويز وفي امتحان الميد تيرم وكذلك في امتحان الفاينال برده
وهاعرفك يعنى ايه كل الكلام دا كمان شوية
اول ما الـ IDs بتاعتكو بتنزل هاتلاقيها متعلقة في كشوفات قدام الباب المرايه بتاع مبنى الشعبة تحت فى الدور الارضى
هاتعرف رقمك ايه وتحفظه كويس اوي
واول ما الارقام دي بتنزل يبقى كدا الغياب ابتدي يتحسب
بيتاخد ازاااااااى بقى الغياب ؟؟
كل دكتور يا عم الحج بيبقى معاه كشف فيه كل اسماء الجروب
يعنى انت مثلا جروب A .. يبقى كل دكتور هايخشلك هايبقى معاه صورة من الكشف بتاع اسماء الناس اللى فى جروب A .. فهمت ؟؟
والكشف دا بيمر على الطلبة جوا الكلاس .. وكل طالب يحط علامة صح قدام الاسم بتاعه وبعد ماتخلصو خاالص بيقوم الدكتور واخد الكشف
فيه بقى دكاترة بترخم وبتنده الاسماء بس بطريقة عشوائية طبعا عشان يشوفو فيه حد بينصب فى الغياب ولا لاء .. وفيه دكاترة بتنفض
بعد ما الـ attendance بيتاخد هايبتدي الدكتور يخش فى الشرح مباشرة
تقوم مطلع كشكولك وشغال كتابة .. لو مافهمتش مش مشكلة اوي
بس بعد فترة حوالي اسبوع او اسبوعين كدا هاتبتدي تلاقي نفسك بدأت تقرا الجو من حواليك والعملية بيس يعنى
المهم دلوقتى انت ماعندكش اي ماتيريال تذاكر منها لان سيادتك لسه ماستلمتش الكتب
كتب تجارة انجليش عموما مابتنزلش فى اول السنة زي ايام المدرسة كدا
لا بتقعدلها بتاع اسبوعين ولا حاجة وتنزل
وعموما اول ما الكتب بتنزل بيكون الخبر منتشر فى الكلية
طب لو نزلت بتستلمها ازاااااااى ؟؟
سيادتك لما بتدفع المصاريف .. المصاريف دي بتبقى شاملة مصاريف الكلية اللى هما 3000 جنيه + مصاريف الكتب اللى هما 1500 جنيه
لما بتدفع اسمك بيتكتب فى كشف كدا مخصوص للناس اللى دفعت مصاريف الكتب .. عشان انت ممكن ماتدفعش الكتب عادي وتوفر الـ 1500
فانتا يوم استلام الكتب بتروح لمقر الاستلام فى الدور الارضى لمدرج هـ وبتدي للراجل البطاقة بتاعتك بيقوم باصص فى الكشف ويشوف انت دافع ولا لاء وساعتها يقوم مسلمك الكتب ومعلم قدام اسمك علامة صح
ومعلومة تهمك برده
ان يوم استلام الكتب دا بيبقى يوم خنيق جدااااا
لان كتب تجارة انجليش كلها بتبقى كتب مستوردة
يعنى مش دكاترة الكلية هما اللى مألفينها
لا خاالص .. ابسلوتلي :D
كل الكتب بيبقى ناس اجانب هما اللى مألفينها فيما عدا كام كتاب كدا
زي الـ governmental فى سنة تانية والـ law فى سنة اولى على سبيل المثال لا الحصر
اللى بيخلي يوم استلام الكتب خنيق ان الكتب دي بتبقى تقيلة جدا
يعنى كتاب مثلا زي كتاب الـ accounting بتاع سنة اولي دا تلاقيه زايد عن الـ 1200 صفحة !
بس ماتتخضش اوي كدا
الكتاب دا هايقعد معاك 3 تيرمات
الترم الاول والتانى بتاع سنة اولي والترم الاول بتاع سنة تانية
دا زائد انك مش هاتدرسه كله يعنى
على حسب .. الدكتور بيمسك الكتاب ينقى منه كام شابتر ويبقى هوا دا المنهج بتاعك
المهم
دلوقتى انت استلمت الكتب والدراسة دخلت معاك في تالت اسبوع
لازم تبقى عارف كذا معلومة مهمة هاقولهوملك دلوقتى عشان تبقى على نور من اولها كدا :
صحصح وماتنامش 
- معلومة رقم 1
احنا خلاص قبل كدا عرفنا ان احنا عندنا 5 مواد في الترم الواحد
كل مادة منهم بتتحسب من 20 درجة
يعنى الترم الواحد 20 درجة ×5 مواد = 100 درجة
يعنى السنة كلها 100 درجة × 2 ترم = 200 درجة
بس فى تجارة انجليش الوضع بيبقى مختلف شوية
لان الـ 20 درجة بتاعة كل مادة بتتوزع على 6 حاجات
- 1 درجة للـ Assignment
- 1 درجة للـ Quiz
- 1 درجة للـ Attendance
- 3 درجات لامتحان الـ Mid-term
- 14 درجة لامتحان الـ Final
-معلومة رقم 2
يعنى ايه assighment ؟
كلمة assighment يعنى واجب .. حاجة كدا زي هوم وورك بس على مستوي اعلى شوية
كل اللى بيحصل ان الدكتور بيكلفك تعمل حاجة وليكن مثلا تحل مسألة (problem) .. بتقوم انت حالل المسألة في ورقة او كشكول وفي المحاضرة اللى بعدها تقوم مديهاله وهوا يصححهالك
ونظام الـ assignments دا بيضمن للدكتور ان كل الطلبة تكون بتذاكر اول بأول وعشان كدا تجارة انجليش بتبقى مقرفة شوية فى الحوارات دي
- معلومة رقم 3
يعنى ايه Quiz ؟؟
Quiz فى اللغة يعنى امتحان مصغر .. او امتحان مفاجئ
الطبيعي اللى بيحصل انك تبقى قاعد في المحاضرة وتلاقي الدكتور في اخر المحاضرة يقولكو يا شباب فيه كويز المحاضرة اللى جايه ذاكرو كويس
واللى مش طبيعي ان الدكتور تضرب في دماغه يعمل كويز في التو واللحظة وفي تلك الحالة بيبقى موضوع رخم شوية
والجدير بالذكر ان في الترم كله ممكن تاخد 4 او 5 كويزات فى المادة الواحده
ودا معناه ان الكويز الواحد ممكن يقف عليك بـربع درجة من الدرجة الكلية للمادة
- معلومة رقم 4
يعنى ايه attendance ؟؟
كلمة attendance يعنى كشف الحضور والغياب
كل جروب من الجروبات بيبقى ليه كشف فيه اسماء الناس اللى متسجلة في الجروب دا
وكل دكتور من الدكاترة اللى بيدرسولك في الجروب بتاعك بيبقى معاه صورة من الكشف دا وبيفضل محتفظ بيه طول الترم
وكل محاضرة بيخشها بياخد فيها الغياب دا
وعرفنا قبل كدا الغياب بيتاخد ازاى
حد يسألنى سؤال ذكي ومحوري ولولبي
لازمته ايه الـ attendance ؟ مانا ممكن انفض وفي ستين داهية الكلية ع اللى فيها وفي اخر السنة اروح امتحان الفاينال وبنااااقص الدرجة الحقيرة بتاعة الغياب دي !
بص ياعم الحج
ناس كتيرة كانت داخلة زيك كدا فى الاول في السنين اللى فاتت وبيقولو نفس الكلام اللى انت بتقوله دلوقتى
لغاية مابيتصدمو بالحقيقة المرة الا وهى ....
ان في قبل امتحان الفاينال
(وهانعرف كمان شوية ايه الفرق بين الفاينال والميد تيرم)
الدكتور بيعمل احصا سريعة لكشف الغياب اللى عنده فى المكتب
ولو لاقى ان فيه طالب من الطلبة نسبة الغياب بتاعته تعدت الـ 30%
ساعتها مش بيبقى للطالب دا الحق فى دخول امتحان الفاينال
وبينزل اسمه فى كشف المحرومين من دخول الامتحان
ودا معناه ان فيه 14 درجة كاملين طارو منك
يعنى نسبة سقوطك فى المادة ممكن تتعدي الـ 85% !!
حاجة اخيرة بس احب اضيفها
ان الـ attendance بيتعمل فقط فى المواد اللى تبع الكلية
واظن انا شرحت قبل كدا يعنى ايه مواد تبع الكلية ومواد بره الكلية
يعنى مادة زي الـ economic دي مش هايبقى عليها غياب
ليه ؟ لانك هاتاخدها في الاوديت اللى هايبقى اصلا متجمع فيه كل الجروبات فايستحيل ان الغياب يتاخد لكل العدد دا
ونستنتج من دا استنتاج حلو اوي .. ان اي محاضرة بتبقى عليك فى الاوديت اعرف ان مش عليها غياب
- معلومة رقم 5
يعنى ايه امتحان الـ mid-term ؟؟
امتحان الميد تيرم دا بيتعمل بعد مرور
6 اسابيع على بدأ الدراسة
يعنى حضرتك ابتديت دراسة مثلا فى 15 سبتمبر
يبقى امتحان الميد تيرم بتاعك هايبقى على اول شهر 11 (نوفمبر)
طبعاً دا العادي اللى بيحصل كل سنة .. بس لازم تتابع الكلية عندك وتشوف امتحان الميد تيرم امتى عشان ماتلبسش في الحيطة
والمعلومة دي مهمة جدا بالنسبالك ولازم تبقى عارفها كويس اوي عشان ماتلاقيش الوقت بيجري منك وانت لسه ماذاكرتش حاجة وساعتها تتسوح تسويحة السنين !
امتحانات الميد تيرم بتتعمل فى مبنى قاعات الامتحانات
ومدة كل امتحان ساعة واحده فقط لا غير
وعشان تحضر الامتحان لازم يبقى معاك رقم الجلوس بتاعك اللى انت استلمته وعرفته في اول السنة
- معلومة رقم 6
يعنى ايه امتحان الـ Final ؟؟
امتحان الفاينال هو اخر امتحان بيتعمل فى التيرم كله
ودا بيستحوذ بالنصيب الاكبر من الدرجة الكلية للمادة اللى هيا 14 درجة .. يعنى بتمثل 70% من الدرجة الكلية للمادة
الامتحان دا هو امتحان الترم اللى بعده بتاخد الاجازة وبيكون مدته ساعتين
ومكان الانعقاد بتاعه على حسب الكلية ماتتحددلك
فيه ناس بتاخد في قاعات الامتحانات وناس تانية بتاخد في مبنى الشعبة ذات نفسه وناس تالته بتاخد في مدرج العيوطى
وزي ماعرفنا قبل كدا ان الحاجة الوحيدة اللى تمنعك من دخول الامتحان دا هو انك تغيب بنسبة تزيد عن المسموح ليك بيها وهى 30% من جملة عدد ايام المحاضرات
- معلومة رقم 7
أذاكر منيـــــــن يا بنى آدمين ؟؟
مذاكرتك هاتكون من 4 مصادر
المحاضرات – السكاشن – ورق الشرح
طب احنا عرفنا المحاضرات
ايه بقى حوار السكاشن وورق الشرح دا ؟؟
1-السكاشن
اطلع على البوست اللى قبل البوست دا على طول واقرا الجزء بتاع السكاشن فى تجارة عربى .. هوا هوا
2 – ورق الشرح
ورق الشرح دا عبارة عن ورق بيتباع في المكتبات اللى بره الكلية وبيبقى فيه شرح تمام وزي الفل وهايظبطك
والورق دا بينزل فى كل المواد
ميزة الشرح دا انه بيلم المادة كويس اوي
زائد ان كل جزئية بيبقى عليها امثلة واسئلة من امتحانات سابقة
طب بتجيب الورق دا منيـــن ؟؟؟
فيه مكتبتين بيعملو ورق الشرح بتاع تجارة انجليش
مكتبة مى – مكتبة نور
مكتبة نور ناس كتيرة مابتحبهاش وبيقولو شرحها مش تمام
والمعظم بيجيب من مكتبة مى
مكانهم فين المكتبات دول ؟؟
هاتطلع من باب تجارة وهاتعدي الشارع الناحية التانية واسأل اى حد على اي مكتبة فيهم وألف من يدلك
كدا تقريبا انا خلاص خلصت بوست تجارة انجليش
فيه حاجتين متعلقين بتجارة انجليش
1- قسم اكتواري
(ودا مهم جدا جدا جداااا ولازم تقروه كويس اوي)
2- شعبة جورجيا
(ودا للناس اللى الانجليش بتاعهم جامد وناويين يدفعو كتير)
والاتنين دول هانزلهم فى بوست منفصل ان شاء الله
البوست الجاي دا بقى هايبقى عن الامتحانات والنتيجة وما يتصل بهم من مواضيع