رسالة لكل شاب -
صحصح يابنى انت وهوا وركز معايا
الجزئية المتعلقة بتعاملاتك مع زمايلك دي انا مش هاقدر اكلمك فيها نهائى
لان دي بتاعتك انت وانت اللى تتعامل وكل واحد وشخصيته
انت خلاص بقيت راجل وليك كيانك
لكن خلينا صرحاء مع بعض برده
الشاب بيبقى خارج من الثانوية العامة زهقان وطالع عنيه وياما اهله خنقو عليه في البيت في المذاكرة والدروس ووجع الدماغ
واول مابيخش الجامعة مابيصدق يلاقي متنفس يعوض بيه كل الزهق والكبت اللى كان فيه ايام الثانوية العامة
وبيستغرب اوي لما يشوف الجامعة ابوابها مفتوحة ومافيش حاجة اسمها نكوت ونهرب من فوق السور !!
كل المتغيرات اللى بيشوفها قدامه دي بتخليه يبص للجامعة بنظرة ان
جامعة القاهرة = الازهر بارك
انا بروح الجامعة عشان اقضيها مع صحابي لف في طول الجامعة وعرضها
ونقضيها اكل وساندوتشات وبيبسي وعصاير
وياسلام بقى لو اتعرفنا على شلة بنات تبقى العيشة زي الفل
وبالا محاضرات بالا بتاع
ويظل الوضع على ما هو عليه لغاية ماتيجي في اخر الترم وتلبس يا معلم
!!!!
وتيجي نتيجة الترم الاول وتلاقي نفسك شايل مادة او مادتين
وتقعد تقول ياريت اللى جري ما كان
الكلام اللى انا قولتهولك دا سيناريو تفصيلي هاتلاقيه مع شباب كتير جدا في الجامعة مش بس في تجارة ولكن في كل كليات الجامعة
عشان كدا احنا بنعتبر ان اول سنة ولنكن اكثر تحديد "اول ترم" بيكون اغبي ترم لان هوا النقطة الفاصلة بين حياة الثانوية العامة الخنيقة وبين حياة الجامعة الحرة
(بالرغم من انه اسهل ترم دراسياً)
عامل زي المسجون اللى ساجنه بقيله سنتين ومرة واحده قومت فاكك منه الكلابشات وسيبته ينطلق !
وبالتالى دي نصايح اخ ليك :
1- عيش حياتك في الجامعة زي مانتا عايز بس راعي ربنا في تصرفاتك .. انا مش هاعملك فيها شيخ وواحد بدقن بقى والكلام دا بس صدقنى هوا دا الصح
2- اثناء الكام يوم اللى في الاول وانت بتحضر محاضرات بتبقى لسه شنكوت
وماتزعلش دي حقيقة لانك لما بتوصل لسنة رابعة وبتفتكر ايام سنة اولي بتقعد تضحك على نفسك وتقول يااااه كانت ايام
3- لتجنب ظاهرة الشنكته دي خلي بالك بقى من الكلام الجاي دا
أ- تخليك راسى كدا وراجل .. وبلاش هبل
ب- لو شوفت بنت حتى لو كانت قمر وعايز تتعرف اوعى تريل عليها لانها هاتفكسلك تماماً
ج- عايز تتعرف على بنات اتعرف بس بلاش افورة في التصرفات وثق تماما ان اول خطوة في التعارف بتبقى في كيفية اختيار المكان الصح اللى تقعد فيه فى المدرج
ودي ليها تيكنيك معين بس مش هاقولهولك :P
د- لما تيجي تتعرف على بنت وتمشي معاها ماتعيش في الدور وتبقى ماشى جنبها وانت ولا كأنك ماشى جنب انجلينا جولي لان بيبان عليك وبيبقى شكلك وحش وبيتقال عليك شنكوت اصلي
د- ماتأخدش بنت عليك بحجة انك عايز تكسر
الحاجز وتبقو فريندز جامدين بسرعة
لان الجو دا فاكس درجة اولي وبدل ماهتبقو فريندز هاتبقى انت الخبوء بتاعها
وحط في دماغك ان الصداقة بين البنت والشاب مش بتيجي غير بالاحترام الكامل والمتبادل بينك وبينها واللى بيتمثل فى المواقف والتصرفات وعمره مابييجي بهزار الايد والكلام الاوفر
هـ- ممكن وانت اثناء مانتا بتلف في الجامعة تشوف عينات من بنات وشباب بيهزرو بالايد وهايبقى بينك وبين نفسك تبقى عايز تعمل كدا بس صدقنى انت كدا بتحقر من نفسك وخد بالك ان فيه ناس بتتفرج عليك واللى بيتصرف تصرف ممكن ماياخدش باله لكن اللى حواليك هما اللي بياخدو بالهم
4- حط في دماغك ان دي اسمها جامعة القاهرة مش جنينة الاورمان
يعنى غرضك الاساسي هو التعلم وممارسة الانشطة واكتساب مهارات جديدة
بجانب الكلام دا تعيش حياتك بقى بس في المعقول زي مانبهتك
بس استووووووووب بقى لغاية هنا واخلع يا برنس عشان اللى جاي دا مايخصكش الا اذا كان شعرك طويل وبتعمل ضفيرة :D
- رسالة لكل فتاة -
طبعاً انا متاكد ان كل واحده قاعدة دلوقتى هاتلاقيها مفنجلة عنيها
وبتقول ياتري عايز يقولنا ايه الراجل دا ؟ وهوا ايش فهمه اصلا في البنات .. دا فرويد بجلالة قدره ماعرفش يحلل شخصية المرأة !!
انا مش دكتور نفسي ولا خبير في العلاقات النسائية عشان ماتجيش واحده تقولي شكلك مقطع السمكة وديلها !
اولاً انتى خارجة من مرحلة ما يعلم بيها الا ربنا الا وهى الثانوية العامة
مذاكرة ودروس ومشاوير كل يوم للسنتر او المجموعة وات ايفر يعنى
ضغط من الاهل عشان تجيبي مجموع
والحمدلله ماجيبتيش مجموع زي ماهما عايزين بس ربنا قدرلك انك تخشي تجارة القاهرة .. الف مبروك
:D
كبت - زهق - خنقة - عايزة تنطلقى ومش عارفه
وطبعاً الجامعة هى السبيل الوحيد ليكي للانطلاق لحياة جديدة فيها حرية نوعا ما بعيدا عن خنقة الثانوية العامة
قربت الدراسة .. وشئ اساسي طبعا لازم تنزلي تجيبي اللبس اللى هاتلبسيه في الجامعة
الشياكة حلوة طبعا بس بعد اذنك خليكي في المعقول واظن انتى فاهمة قصدى كويس
شئ طبيعي انك تغيري لما تلاقي بنت لابسه لبس جذاب اكتر منك بس حطي في دماغك ان قصاد الجاذبية ونظرات الاعجاب اللى هيا بتاخدها من نص شباب الكلية بيبقى عداد السيئات شغال الله ينور
دخلتى الكلية وحضرتى اول يوم محاضرات
وعشان تبقى عاملة حسابك من دلوقتى ان المدرج هايبقى سايح على بعضه .. يعنى البنات جنب الشباب ومابيبقاش فيه فواصل
طبعا انتى مش مجبرة انك تقعدي جنب شاب غصب عنك
بس في نفس الوقت حتى لو قعدتي جنب شاب هوا مش هايعضك
فلو انتى من النوع اللى عنده حساسية عالية ضد الشباب يبقى دائما لما تيجي تقعدي اختاري المكان السليم بلجوئك للبينش المليان اللى على حرفه في مكان يسيع شخص او اتنين بالكتير اوي ويكون ع الحرف فيه بنات قاعدة
ساعتها انتى تقومي قاعدة جنب البنات دي وتبقى انتى ع الحرف وكدا يبقى منعتى اي شاب انه ييجي يقعد جنبك لان بكل بساطة البينش اتملي خلاص
او ان انتى يبقى معاكي صحابك البنات وساعتها انتى تقومي مختارة اي بينش وتقعدي وسطيهم بحيث ان يبقى على شمالك ويمينك صاحباتك البنات وبكدا برده تكوني تجنبتى القعدة المحتملة جنب اي شاب
اما اذا كنتى من النوع اللى هوا ايزي وواثقة من نفسك والقعدة جنب الشباب بالنسبالك شئ عادي فاتس اوكي مافيش اي مشكلة
نيجي بقى للجزئية اللى كتير من البنات بيخافو منها
التعامل مع الشباب هايبقى ازاى ؟؟؟؟
1- حطى في دماغك ان الشاب دا كائن حي زيه زيك بالظبط يعنى لا هايعضك ولا هايمسكك ويشدك من ايدك
2- لو لاقيتي شاب جيه يتعرف عليكي ويفتح معاكي اي حوار وبيبقى غالبا متعلق بالمحاضرة اللى فاتت اللى ياعيني مالحقش يكتبها او بالدكتور الخنيق اللى ماعرفش يفهم حاجة منه وعايزك تشرحيهاله باعتبارك عبقرينو زمانك فدا مش معناه ان هوا معجب بيكي او هايموت عليكي وبناءا عليه بلاش تعيشي في دور الاميرة ديانا وتبقى مناخيرك فوق وتعتبري نفسك ملكة جمال المدرج
معلش ماتزعليش مني بس الكلام دا بيحصل فعلا وفيه نوعيات من البنات بتبقى كدا ودا حقيقي
فاذا كنتى عايزة تتعرفي يبقى جاريه في الكلام وبيس .. اما لو مخنوقة ومش طايقاه يبقى بكل شياكة كدا تقوليله انا مضطره امشى واوعي تقوليله اسمك لان لو قولتيله اسمك يبقى كدا هوا هايعتبر انه خلاص اتعرف عليكي رسميا ولو شافك في المدرج لازم هايسلم عليكي
3- بمناسبة السلام برده .. لو انتى بتسلمي بالايد دا شئ يرجعلك (مع انه مكروه دينياً) اما لو ماكنتيش بتسلمي ولاقيتي شاب اتعرفتي عليه وجيه يسلم عليكي يبقى اوعي تمدي ايدك وسيبيه يتحرج مش مهم عشان يتعلم بعد كدا
او فيه حركة شيك ظريفة وهوا لو هوا مد ايده عشان ماتكسيفهوش ممكن لو معاكي كتاب مثلا او اي حاجة تتمسك في الايد تسلمي بيها بحيث ان ايدك مش تلمس ايده
4- احترامك لنفسك ولذاتك فوق اي شئ ..
يعنى ايه ؟؟
يعنى علاقتك بالشاب تبقى في اطار الزمالة ويوم ماتتطور اوي تبقى صداقة بس صداقة مقننة ومحترمة
لانك هاتلاقي نوعيات بنات غريبة بنظام مدام رشا وآنسة حنان اللى طلعو مع التهامي في ميلودي كامبين
5- انتى اللى بتحددي شكل العلاقة الاساسي بينك وبين الشاب من اول لحظة تعارف
يعنى لو انتى اللى ابتديتي تمدي ايدك هاتلاقيه هوا كمان مد ايده والعملية بقت مش تمام
وكذلك لو هوا بدأ ومد ايده وانتى ماديتيش اي كومينت او ابديتي ردة فعل يبقى انتى كدا بتوصلي رسالة للشاب ان انا بنت ايزي خالص وساعتها ماتزعليش بعد كدا
فعشان كدا لازم يبقى في خطوط حمرا بينك وبين الشاب
والخطوط دي انتى اللى تحدديها بنفسك
6- اي تصرف خارج – اي كومينت ماخدتيش بالك وانتى بتقوليه – طريقة كلامك – لبسك .. كل الكلام دا بيبقى موضع نقاش ونقد من قبل الشباب فخلي بالك وماتسيبيش فرصة لواحد مالوش فيها يقول عليكي كلمة مش تمام
الرسالتين دول كانو لازم يتقالو قبل ما ابتدي اخش في تعريفك بجو الجامعة لانك لازم تبقى عارف طبيعة العلاقات جوا الكلية ماشية ازاى عشان ماتبقاش مصدوم بالبنات او مصدومة بالشباب
البوست الجاي باذن الله هابتدي اخش بقى في جو الجامعة الاكاديمي وازاى تقدر تستفيد منه بقدر الامكان
وبجد هايبقى بوست مفيد جدا جدا جدا ولازم تقراه
لان فيه زمايل ليك اتخرجو ومايعرفوش الكلام دا وفيه زمايل ليك عرفو الكلام دا متأخر للاسف وكانو بيقولو ياريتنا كنا عرفناه من سنة اولي كان الواحد استمتع فعلا