وجايلك وبيقولك الجوالة ويقعد يشرحلك بقى المميزات والانشطة وانك هاتبقى عضو فى نادي الكشافة البحرية وحاجات كتيرة كدا
والاشتراك السنوي بتاعها 2 جنيه تقريبا وتديهم صورة عشان يعملولك الكارنيه
والغريب فى الموضوع انك مش بتلاقي بتوع الجوالة دول الا في اول السنة بس .. وطول السنة مابتشوفش وش حد فيهم
فعموما اذا كنت مهتم خش معاهم .. مش مهتم يبقى فكك
وانا لو فتحت موال على موضوع الجوالة دا مش هاخلص وهاقعد اتكلم للصبح .. فانتا عندك جوجل عيش حياتك فيه وهايديك معلومات كتيرة عنه
طبعا فيه نقطة كدا صغيرة لازم اقولها عشان فيه ناس بتتلخبط
فيه فرق مابين انك تبقى عضو فى اتحاد الطلبة او انك مشارك فيه
العضو دا بيبقى جاي بالانتخاب
وطبعا قبل الثورة كان كلهم بييجو بالتزوير
بس بعد الثورة بقى تلات تربعهم اخوان ان ماكانش كلهم كمان !
ودا مش عيب على فكرة .. لان الاخوان ليهم نشاط ملحوظ جداااا فى الكلية وناس في قمة الاحترام
واللى عايز يشترك معاهم يشترك مافيش مشكلة
بس هما مشكلتهم انهم عايشين الدور شوية بس اني واي هما ناس ميه ميه بصراحة يعنى
بس عليهم تصرفات تفقع .. زي يبقى الوقت اللى بين المحاضرة والتانية المفروض الواحد مابيصدق الدكتور يخرج عشان يرغى مع اللى جنبه او يفك شوية من جو الخنقة دا
تلاقي واحد يقوم داخل المدرج وعمال يزعق ويقول واذا قرأ القرآن فاستمعو له وانصتو وتلاقي واحد تانى يوم طالع ع الاستيدج بتاع الدكتور وقاري كام آية كدا وبعد مايخلص يقول كلمتين ويخلع
فابتبقى حاجة مملة جدااا يعنى .. انا مش بعيب على قراية القرآن طبعا .. بس انا بتكلم على مبدأ انك تسمعنى غصب عنى وغير كدا انك بتقرا في مدرج موجود فيه مسيحيين مالهومش ذنب انهم يسمعو القرآن
المهم نرجع لمرجعونا تانى
اما بالنسبة للمشارك فدا بيبقى طالب عادي جدا وراغب في الاشتراك في احد انشطة اللجان داخل اتحاد الطلبة
وبكدا اكون خلصت الجزئية بتاعة اتحــاد الطلبة
نخش بقى على جزئية جديدة
اثناء مانتا ماشي في الكلية وخاصة عند تجارة انجليش كدا بتلاقى حاجات اشبه بأكشاك او ترابيزة طويلة ووراها حائط خشبي ومكتوب عليه شوية كلام بالانجليش وشكله نضيف كدا
وبتتلاقي ناس واقفة عنده ولابسين اي ديهات في رقبتهم وشكلهم ناس قديمة في الجامعة
الحاجات دي بيبقى اسمها Models
ودماغك ماتروحش لبعيد وتفكر في موديلز الكليبات يا وحش :P
الموديلز اللى انا اقصدها يعنى نموذج محاكى للواقع
ومسماه فى الانجليش Simulation
يعنى ايه بقى نموذج محاكي للواقع ؟
يعنى فيه حاجة موجودة في الحياة فعلا واحنا عايزين نعمل حاجة زيها بس على قدنا
زي مثلا جامعة الدول العربية دي موجودة في الواقع .. فاحنا في الجامعة بنقوم عاملين موديل لجامعة الدول العربية بتبقى حاجة شبهه وبيبقى فيها كل حاجة موجودة في جامعة الدول العربية الحقيقية بالظبط
فانتا تلاقي مثلا جامعة الدول ليها امين عام وامين مساعد ولجان فرعية وممثلين دبلوماسيين عن كل دولة من الدول الـ 22
كل الكلام دا هاتلاقيه موجود في الموديل
وكذلك برده نفس النظام هاتلاقيه في موديل الكونجرس الامريكي
الكونجرس الحقيقي بيبقى فيه حاجتين
الـ house والـ senate
الـ house بيبقى عدد اعضاؤه 435 سيناتور
والـ senate عدد اعضاؤه 100
وكل واحد منهم بيبقى متقسم عدده على الحزبين الجمهوري والديمقراطي
ومجلس الـ senate بيبقى فيه 16 لجنة اسمها committees
وكل لجنة منهم بيبقى ليها رئيس اسمه chairperson
وكذلك فيه حاجة اسمها الجراوند .. والجراوند دا بيتم فيه التصويت على حاجة اسمها Bill .. البيل دي هيا اللى بيتم فيها اقرار القوانين واللى واحد زي اوباما بيبقى هايموت عليه عشان يتعمل
ودا حصل قبل كدا في اقرار مشروع التأمين الصحى وعلاج ازمة الرهن العقاري ومؤخراً مشكلة رفع سقف الديون
وكل الكلام دا موجود فعلا وهاتلاقيه في الموديل بتاع الكونجرس الامريكي
طبعا الشرح اللى انا قولته دا انا مش بقوله عشان اتمنظر عليكو واعرفكو ان انا فاهم
بس انا بقوله عشان اعرفكو قد ايه الاشتراك في الموديلز دي بتبقى مفيدة جدا وبتفتح ليك ابواب انك تعرف حاجات جديدة عمرك ماكنت تفكر انك تعرف عنها حاجة
اذن الاصل فى كلمة model هو انشاء نموذج محاكي للواقع
والنماذج دي 99% هاتلاقيها موجودة في كلية سياسة واقتصاد
والـ 1% هاتلاقيه موجود في كلية تجارة وبيتمثل فى موديلين بس هايفيدك كويس
الموديلز اللى موجودة في كلية سياسة زي :
الكونجرس الامريكي
(Model American Congress)MAC
مجلس الشعب المصري
MEPA
(Model Egyptian People's Assembly)
– مجلس العموم البريطاني
MBHC (Model of British House of Commons)
- جامعة الدول العربية والامم المتحدة
ALMUN (Arab League Model United Nations)
وبالمناسبة نموذج الامم المتحدة اللى هوا اخر واحد دا جامد وحلو اوي
ودورو عليه في كلية سياسة او اسألو عليه هايفيدكو اوي
بس هوا مشكلته انه ضامم جامعة الدول العربية والامم المتحدة في موديل واحد ودا عيب فيه
على العكس .. الجامعة الامريكية كانت عاملة موديل برده للامم المتحدة واسمه CIMUN وكان نموذج الامم المتحدة فقط بكل تفاصيله وخد جايزة التميز في مسابقة النموذج الوطنى للامم المتحدة في نيويورك مرتين ورا بعض
فاتمنى انهم في جامعة القاهرة يفصلو جامعة الدول عن الامم المتحدة عشان كل واحد فيهم ياخد حقه صح
وطبعا الموديلز اللى انا قولتها دي على سبيل المثال لا الحصر لان فيه موديلز تانية موجودة في سياسة واقتصاد
اما الـ 1 % اللى كنا بنقول عليه موجود في كلية تجارة فدا بيمثل موديلين
الاول اسمه SMS ودا اختصار لكلمة
Stock Market Simulation
ودا جامد جدااااا ومالوش حل بجد
بقيلهم 5 سنين شغالين فيه وكل سنة بيثبت نجاح اكتر من السنة اللى قبلها
الموديل بيمثل البورصة المصرية بكل التفاصيل اللى موجودة فيها
سماسرة هاتلاقي .. مستثمرين هاتلاقي .. مضاربين هاتلاقي .. شركات سمسرة هاتلاقي .. سيستم البورصة ذات نفسه هاتلاقي
كل حاجة تتخيلها هاتلاقيها
فانتا كأنك بتعيش حياة البورصة الحقيقية
الموديل التانى اسمه MAEU ودا اختصار لكلمة
Model of Arab Economic Unity
يعنى مجلس الوحدة الاقتصادية العربية
المجلس دا تاريخيا تابع لجامعة الدول العربية وهدفه تحقيق وحدة اقتصادية بين الدول الاعضاء اللى هما 22 دولة
وطبعا كلام فكسان ومالوش لازمة لان لا فيه وحدة ولا فيه زفت
فعشان كدا تم انشاء نموذج الـ MAEUدا وبدأ في سنة 2010
عشان يناقش القضايا الاقتصادية العربية من وجهة نظر الشباب ومحاولة ايجاد حلول ليها
الموديل دا متقسم لتلات مجالس او تلات لجان
مجلس التجارة الحرة ومجلس الشرق الأوسط ومجلس الأوبك العالمي
وطبعا موديل مفيد جدا لانه هايديك فيد باك جامدة اوي عن المتغيرات الاقتصادية اللى بيعيشها المجتمع العربى دا زائد ان هايزود المعلومات العامة عندك وهاتحس ان دماغك بقت عالية
وفيه حاجة ظريفة اوي عملوها وعجبتنى جدا
وهوا انهم اخترعو شعار اسمه "سجل انا عربى"
ومعناه ان لغة الكلام داخل النموذج بتبقى عربى وبس وغير مسموح باستخدام اي لغة تانية خالص حتى ولو كانت كلمة واحده
واللى يستخدم اي لغة تانية عقوبته انه يبحث عن الحاجة اللى اتكلم عنها دي بعشر لغات ويعمل عنها بحث ويقدمه خلال مدة محددة !!
وفيه موديل تالت اسمه WTO اختصارا لكلمة
World Trade Organization
اللى هيا منظمة التجارة العالمية .. بس اعتقد انهم مالقوش تمويل كافى فالموديل اتلغى .. بس مش شور من الموضوع دا
ــــــــــــــــــــــــــــــــــــــــــــــــــ ــــــــــــــــــــــــ
في كلية تجارة بقى مفهوم الموديل كنموذج محاكي للواقع اختلف شويتين
ازاى ؟؟
ان فيه نماذج موجودة وبنفس التنظيم والاسلوب المتبع في ادارة نماذج المحاكاة اللى موجودة في سياسة واقتصاد
(وهانعرف كمان شوية ازاى بيتم ادارة النماذج دي)
بس النموذج مش شرط يكون نموذج محاكي للواقع
النموذج بيبقى فكرة معينة وبيقوم على اساسها النموذج ككل
بس معظم الموديلز اللى موجودة في الكلية هاتلاقيها بتركز على انهم يدو زي برامج تدريبية للطلبة في الانشطة الاقتصادية والادارية بوجه عام .. واللى بتشمل بقى بورصة واسواق مال وتسويق .. الخ الخ
طيب احنا عندنا كام موديل فى الكلية ؟؟؟
فيه كتير .. بس مين الأشهر ؟؟
واللى بعتبره حاجة جامدة جدا وكان نفسي اخشه بجد
بس للأسف عرفته متأخر
ويكفى انى اقول ان كل سنة بيتعمل مسابقة دولية ليها اسمها
SIFE World Cup
بمشاركة جامعات كتيرة من كل دول العالم
واللى بيحصل ان كل دولة بتعمل تصفيات للجامعات جواها واللى بيكسب التصفيات المحلية دي بيمثل الدولة في بطولة العالم
وفي سنة 2009 و 2010 الجامعة الفرنسية كسبت التصفيات المحلية وفي السنتين كان كل مرة جامعة القاهرة توصل للنهائى وتخسر قدامها
لغاية 2011 اخيراً جامعة القاهرة كسبت وفكت النحس وبقت تمثل مصر في بطولة العالم
الجدير بالذكر ان الجامعة الفرنسية كسبت بطولة العالم في 2009 و 2010 باكتسااااااح !!
بالنسبة لنشاط SIFE عموما هوا نشاط طلابى جامعى بيركز على الانشطة الخيرية والتنموية .. اشبه بجمعية رسالة كدا بس على اجمد
متهيألي كدا احنا اخدنا فكرة شاملة وكبيرة اوي عن نشاط الموديل في الجامعة ككل وخاصة تجارة وسياسة واقتصاد باعتبارهم اكبر كليتين بيعملو الموديلز في جامعة القاهرة كلها
ودا مايمنعش ان فيه موديلز في كليات تانية زي حقوق وهندسة
بس مش موضوعنا ومش هايهمنا في حاجة
نيجي بقى للمهم .. شوفت موديل من الموديلز دول وعجبك واحد فيهم وعايز تقدم
الاول لازم تعرف ازاى الموديل بيتم ادارته
أى موديل موجود في اى حتة في الدنيا بيبقى متقسم لتلات حاجات
OC و AC و Delegates
الـ OC اختصار لكلمة
Organizational Committee
والـ AC اختصار لكلمة Academic Committee
(وخد بالك ان الكلمتين دول لازم هاتسمعهم لما تروح تقدم في اي موديل فانا بشرحلك اهو عشان ماتبقاش رايح على عماك)
الـ OC دول اللي هيا اللجنة التنظيمية .. ودي مسئولة عن ادارة الموديل ككل .. طبعا الاستراكتشر بتاعتها بيختلف من موديل
لموديل تانى على حسب التقسيم وعلى حسب التمويل وكمان على حسب اعداد اعضاء اللجنة ذات نفسها
بس عموما اي OC بتتكون من الـ president اللى هوا رئيس الموديل
وبعديه الـ vice president ودا النائب بتاعه وفي بعض الاحيان بيبقى اسمه assistant
والاتنين دول بيبقو الادارة العليا للموديل ككل
بعد كدا بيتم تقسيم الـ OC للجان فرعية
عددها ومسمياتها بتختلف من موديل لموديل زي ماقولنا من شوية
بس غاااالبا بيبقى فيها الآتى :
HR – Public Relations – Coordination – IT – Media – Financial
وكل لجنة من دول بيبقى ليها مهام محددة ومعروفة
اما بالنسبة للـ AC فدي بتبقى اللجنة الاكاديمية .. ودي بتبقى مسئولة عن تدريس الماتيريال والموديولز داخل الموديل لما بيبدأ
بمعنى اصح الـ AC دول بمثابة مدرسين او انستراكتورز
في بعض الاحيان بيكون الـ AC دول من الطلبة بس بيكونو دارسين المواضيع كويس اوي اوي وبيبقى ماشاء الله عليهم
وفي احيان تانية بيكونو من شركات بره او مندوبين عن شركات
اما الـ Delegates فدول بيبقو الطلبة العاديين اللى عايزين ياخدو يحضرو البرامج التدريبية دي ودول بيبقو كتير طبعا بس طبعا مش بياخدو غير الاعداد اللى هما عايزينها ودا معناه ان فيه عملية تصفية بتتم بين المتقدمين .. يعنى فيه انترفيوهات وهانعرف الكلام دا كمان شوية
أى حد يقدر يقدم سواء في الـ OC او في الـ Delegates
اما الـ AC فدا لازم تكون عضو في الـ OC عشان ساعتها بيبقى بيتعمل حاجة اسمها internal recruitment وبتبقى انستراكتور
سواء بقى تقدم في الاو سي او الديليجيتس .. لازم تمر بعملية انترفيو عشان يشوفو انت تستاهل تخش معاهم الموديل ولا لاء
بس طبعا بيبقى انترفيو الاو سي ارخم واغبى لانك لو نجحت انت بتبقى عضو في لجنة ادارة الموديل ككل .. يعنى ليك نشاط وليك كلمة ولو ماكنتش على قد المستوي المطلوب يبقى انت كدا هاتبقى عبئ عليهم ومالكش لازمة وهاتضرهم
طب انا عندي فكرة وعايز اعمل موديل زي العالم دي .. ازاى ؟؟
أولاً لازم تكون فكرتك جديدة ومحترمة ومش اي هبل
ثانياً لازم تحصل على موافقة حاجتين :
مركز البحوث التجارية – وكيل الكلية لشئون الطلبة
ثالثاً هاتجيب فلوس منين يا حلو عشان تصرف على الموديل ؟؟
لازم يكونلك مصدر تمويل .. ودا اهم حاجة في الموديل ككل
عشان كدا دايما اخطر ناس واهم ناس تلاقيهم في اي OC محترم هما لجنة الـ Financialوبيبقى اسمها Fundraisers
عشان هما دول اللى بيبقو مسئولين عن انهم يجيبو تمويل من اي حتة خلقها ربنا
طب التمويل ممكن ييجي منين ؟
التمويل المبدئى هايجي من مركز البحوث التجارية
يعنى لو انت خدت موافقة من مركز البحوث اعرف انك كدا هاتاخد تمويل منهم كمان
بس هل تمويل البحوث التجارية دا كافى ؟
لاء مش كافى .. فعشان كدا لازم تسعى بره الجامعة وتشوف اي شركات او بنوك تبقى راعية للموديل دا عشان تديك فلوس تقدر تشتغل بيها وتصرف بيها ع الموديل بتاعك
وانت وشطارتك بقى يا معلم
وعموماً دا فايل كامل كان نواة لانشاء موديل جديد
كان اسمه XYZ
وفكرته مبنية على اساس ان احنا عايزين ندرب ونعلم ناس تكون عارفه معلومات عن مواضيع معينة ومهمتنا ان احنا نكملهم الحتت الناقصة اللى هما مش عارفينها في المعلومات دي
وعشان كدا احنا سميناه XYZ .. عشان احنا بنبتدي من الآخر مش من الاول
بس للأسف حصل مشاكل بين الـ model creators والموضوع فشل بسبب الخلاف اللى حصل مش اكتر
الفايل اهو .. اللى عايز يداونلود يتفضل
بعد ماتقرو الفايل دا هاتكونو فهمتو كل حاجة عن الموديلز وبكدا دي تكون نهاية موضوع الموديلز
نخش بقى على الملاعب الجامعة
دلوقتى انت راجل رياضى .. وبنت رشيقة
وعايز تظبط نفسك بقى في الرياضة ويبقى ليك نشاط كدا وتبقى جامد
في جميع الاحوال انت مضطر انك تعمل كارنيه صغير كدا عشان الملاعب .. بتطلع لرعاية الشباب في الدور التانى مدرج جـ و د
وتقولهم عايز اعمل كارنيه عشان ادخل ملاعب الجامعة
فابيدوك اذن دفع .. مش فاكر بالظبط كام بس تقريبا 2 جنيه
بتدفعهم في الخزنة .. واظن انت عارف السكة كويس
بعد كدا بيدوك استمارة بيتحط عليها صورتك وتملي بياناتك وتروح تختمها من شئون الطلبة وبعد كدا بيطلعلك الكارنيه في ساعتها
من خلال الكارنيه دا بقى تقدر تعيش حياتك في الملاعب
لو كنت من هواة كرة القدم او الباسكت .. تأجير الساعة بـ 5 جنيه
بس هاتبقى الملاعب الخماسية
لان الملعب الكبير اللى فيه النجيلة دا خاص بمنتخب الجامعة فقط لا غير
اما لو كنت من هواة التنس الارضى زيي كدا .. تأجير الساعة بـ 2 جنيه بس المضارب والكور عليك انت يا اما بتدفع عليهم فلوس تأجير بس مش عارف بكام بقى
ولو كنت راجل لياقة بقى .. عندك جيم محترم هناك الساعة فيه بجنيه واحد بس .. وانت كدا كدا آخرك في الجيم ساعة كفاية اوي انك تلعب على عضلتين الا اذا كنت بتريح كتير بقى بين التمرين والتمرين !!
ولو كنت بتحب السباحة فيه بسين ميه ميه الجامعة عاملاه باشتراك سنوي 60 جنيه بالاضافة لمدربين هايعلموك لو ماكنتش بتعرف تعوم
يعنى من الاخر هاتعيش حياتك عيشة تمام وزي الفل
بكدا اكون خلصت خلاص ودي نهاية الانشطة الطلابية ككل
يارب تستفيدو كويس اوي من الكلية وتستمتعو بحياتكو الجامعية
ناخد ريست بقى شوية كدا
لان مش باقى في الموضوع الكبير دا غير 5 حاجات
- الامتحان
- النتيجة
- ازاى اختار التخصص ؟
- خلصت الكلية وعايز اخلص ورقى واطلع شهادة التخرج
والبوست الاهم .. الكورســات والتريننج
واي حد عايزنى اضيف حاجة او اتكلم عن حاجة زيادة عن دول يبعتلى
ربنا يوفقكو ان شاء الله