ساعد طفلك على اعادة سرد المواقف الصعبه اللى بيمر بيها .....كثير من الاباء و الامهات بيحاولوا يخلوا أطفالهم ينسوا التجارب المؤلمه اللى اتعرضوا ليها بيلهوهم ويقولوا بقى بلاش نفكره باللى حصل .....الحقيقه ان مهم اوى انك تذكريه بالموقف وتعيدى سرد الموقف معاه.. ليه بقى مهم عشان لو ماعملتيش كده ياست الكل .... الموقف (الذكرى ) هتتخزن داخل الذاكره الضمنيه (ذاكره الاواعى ) عند ابنك يعنى ايه الكلام ده .....اقولك بصى الذكريات الضمنيه هى اللى بتشكل طريقة ادراكنا للواقع الحالى ....ايه الكلام ده 🤔🤔🤔
تعالى ناخد مثال للتوضيح لو ابنك بيحب يركب العجله بتاعته وفجأة اتعرض لاقدر الله لحادث هتلاقيه بعدها مش عايز يركبها ....يابنى يهديك يرضيك لا ممكن ابدا مش هركبها وممكن يفضل طول عمره مش عايز يركبها ويقولك انا بكره ركوب العجل يابنى في ايه ما انت كنت بتحبها.. بكرها مش هركبها ثانى ..ايه الواد ده 🙆🙆
تعالى بقى ياست الكل اقولك اللى حصل فى مخه بصى ياقمر.... الخلايا العصبيه اللى بتنطلق معا ترتبط معا .....بمعنى ان كل تجربه جديده بنمر بيها بتتسبب في انطلاق خلايا عصبيه معينه ولما بيحصل كده بترتبط و تتصل بالخلايا العصبيه التى تنطلق في نفس ذات الوقت مكونه ذكرى....ايه الكلام الكبير ده ....اه ونبى يا اختى مش كلامى ده كلام علماء الاعصاب 👌👌👌
نشرح اكثر عشان الفكره توصل يعنى مخ ابنك هيربط بين الاحداث كلها مع بعض يعنى مخه اول لما يسمع اسم عجله = حادثه = شعور بالوحده = شعور بالخوف و الالم = فكره سيئه
مش هركب عجل ثانى هيفضل بقى طول عمره رابط مابين ركوب العجله و الحادثه ان لو ركب العجله هيحصل ليه حادثه ....قيسى بقي على اى موقف او اى تجربه جديده هيتعرض ليها ....طيب اساعده ازاى ....اشجعه انه يعيد سرد القصه ازاى طيب اعمله عصف ذهنى brainstorm واستخدام بقى اسئله الفضول ....هقولك ازاى
فاكر لما كنا مع بعض و اتخبط في المطب ووقعت من على العجله
هو ايه اللى حصل بعد كده
ابنك ...وقعت واتعورت
انتى .....اكيد حسيت بمشاعر الخوف و الالم صعب اوى انك فجاءه تقع من العجله
ابنك ....ايوه كانت حاجه تخوف جدا و ماكنتش فاهم ومش عارف اتصرف
انتى ...فعلا دى حاجه مؤلمه اوى
طيب هو ايه اللى حصل بعد كده
نظفنا الجرح بالمايه
انتى ....وانا طمنتمك وحضنتك ورحنا للصيدليه والدكتور حط بلاستر علي الجرح وطمنا انه جرح سطحى
طيب تفتكر ايه سبب اللى حصل ده
الابن عشان مكانتش واخد بالى من المطب وكانت سايق بسرعه ومخدش بالى من اللوحه الارشاديه و المفروض انى اهدى السرعه قبل المطب وماسوقش بسرعه عاليه ...بس انا حاسس انى لسه خايف و مش هعرف اسوق ثانى
انتى....فاكر لما دخلت مسابقه العجل وكسبت فيها
الابن .....اه طبعا فاكر كنت سعيد جدا
وسبقتهم كلهم
انتى ....طيب حسيت بايه لما فكرتك بفوزك بالمسابقه
الابن ...حسيت انى سعيد وفرحان
انتى ...يعنى مش حاسس دلوقتى بالخوف والتوتر
الابن ...لا
انتى ....يبقى سبب خوفك انك مريت بالحادثه ...لكن دلوقتى انت عرفت السبب في حدوث الحادثه ...ومشاعر الخوف مشاعر طبيعيه وكلنا بنشعر اوقات بالخوف بس تعالى نشوف ايه الرساله وراها شوف جايه تقولك ايه انك تاخد بالك وتكون اكثر حذرا المره اللى جيه
الابن ...فعلا هى كانت تجربه وانا دلوقتى هاخد بالى اكثر من اللوحات الارشاديه واهدى سرعه العجله
بالحوار ده انا بقدر اساعد ابنى على اعاده سرد القصه و اساعده انه يتحرر من مشاعر الخوف والعجز.. لو مديناش فرصه لاطفالنا للتعبير عن مشاعرهم و استرجاع الموقف هيفضل الطفل مش فاهم ايه اللى حصل وهتفضل مشاعر الخوف مسيطره عليه ومش هيعرف يسيطر على الفكره ان ركوب العجل هى فكره سيئه وهتؤدى الى حادثه وده طبعا هيتخزن داخل الذاكره الضمنيه(الذاكره اللا واعيه) وهيفضل اسير للفكره دى باقيه عمره .....طيب لو مش عايز يتكلم ويحكى استخدم اللعب الاطفال دايما بتتكلم وتحكى اثناء اللعب ....اشجعه انه يرسم الحادثه واشجعه ان يوصف ليا اللى رسمه ويحكى المشاعر اللى حس بيها وقتها ....ساعد طفلك على دمج ماضيه بحاضره وده هيساعده على تطور ونمو وتكامل مخ طفلك
علم ينتفع به
|