[اوركيديا]

بما انى من الرواد الجدد دول
فممكن اختار حاجه

***كتاباته تحاول بإقناعك بآراء لم تفكر فيها من قبل عن أشياء لا تعرفها .. كأنه يقول لك: لا تجادلني يا أحمق .. القنزعور بالصلصة أفضل من الحبشلقاظ ألف مرة !... ويسود عشرات الصفحات في إثبات هذه المقولة التي لا تعنيك في شيء ,,

عجبتنى المقوله دى جدا
يمكن عشان بتلعب على اكتر من وتر

اول حاجه عمليه الجهل نفسها
انك مش تكون عارف اللى قدامك بيتكلم على ايه
و لا عايز يوصل لايه
و دى افه الشباب بالذات
انك مش عارف
فبتفترض ان اللى قدامك كوضع طبيعى صح
و تبدا تقتنع بارءه
و ده اللى احنا شايفينه حاليا فى الجماعات او الاحزاب المتطرفه عامه
بيستغلوا الحماس مع الجهل
و النتاج العبقرى لكده
غسيل كامل للمخ مع انسان لو قولتله اقتل س ص ع حيروح يقتله بدون نقاش

تانى حاجه
فكره اللى بيتكلم عن الكوكب الخامس فى المجره الرابعه
طيب و انا مالى
ده بيقع فى دائره علم لا ينفع و جهل لا يضر
مش عارفه الحكايه دى بتفكرنى بمن سيربح المليون
دلوقتى ايه الفايده من ان المواطن العادى اللى زيي و زيك
انه بعرف ايه هى عاصمه كوستاريكا
حتفرق معاه ايه
بس دلوقتى طبعا بقى قمه الجهل انك مش تعرف ايه هى عاصمه كوستاريكا
و بقى انك مش تعرف تبقى مش انسان و محتاج
تروح بيتك تفتح القاموس و تعرف عاصمه كوستاريكا
و بعد كده تروح تعمل اعاده قيد للانسانيه
بجد حاله لا تطاق
و المصيبه ان الكل اتعود عليها

تالت حاجه بقى
و اللى شايفاها من اهم الحاجات
اللى هو اشباه العلم
الواحد اللى يحطلك كلام علمى ثقيل
من امثال و راى العالم كذا
و عرف العالم كذا
عشان يوصلك فى النهايه لايه
حاجه كده لو اخدتها لوحدها عمرك ما حتقتنع بيها
زى الكتاب العلمى المبجل عن ان الديناصورات لسه موجوده
بس احنا اللى عمى
حاجه زى كده لو قلتلها دلوقتى عادى
حتبتسم كده و تسكت
بس لو قريتها فى كتاب بكلام فصحى كده على موزون
حتقتنع و تامن
ان الديناصورات لسه موجوده

رغيت كتير
بس بتكلم على اللى فكرتنى بيه القصاصه دى
و مستنيه كلامكم

فى رعايه الله