عارفه يامه
أنا حاسس إن الموت
ماخدش منك غير الطرحة
والجلابية السودة
ما أنا كل ما عدي جنب الأوضة
أسمع صوتك
وانتي بتضحكي ع الدنيا
وبتدعي لي
روح
ربنا معاك
هاتسافر
وهاترجع مجبور الخاطر
وهاستناك
طب إسندي علي كتفي
بكره تقومي
بكره تخفي
عارف مين يا ابني بيقع ويقوم
أوعي تدور ع الدفا
في فلوس وهدوم
ومتنساش تحوش شوية أصحاب
وافرح أوي لما يدق الباب
وتلاقي حد بيحضنك
لوجه الله
ياه
فاكره يامه لما كنتي
تعملي البصارة
وتدي منها لأبلة سارة
يرجع الطبق رز بلبن
يروح لأم حسن
يرجع صنية بسيسة
تدي منها لخالتي بيسة
ويرجع الطبق مليان حب
معقول كل ده قلب
عارفة يامه
النهارده بقيت بخاف بجد
بخاف من أي حاجة
ومن أي حد
بخاف غصب عني
اتخبط ف حد
لحسن يعملي محضر
ويطلب تعويض
مشيت كتير يامه
بس الفرح لسه بعيد
ياتري لسه بتدعي لي