[Dr.ahmed91]

المشاركة الأصلية كتبت بواسطة د/ ماجدولين

السلام عليكم يا بنات

بصى يا مروة هى دى القصة اللى وعدتكوا بيها انبارح

مبدئيا يا ستى احنا عندنا جهازين

السمبثاوى والباراسمبثاوى

السمبثاوى معناها التعاطفى يعنى لما أكون فى خطر هو اللى بيساعدنى

والبارا سمبثاوى يعنى مش تعاطفى يعنى عكس الأولانى

اية بقى حكاية المقارنة العجيبة اللى فى الكتاب دى

بصوا يا بنات عشان تعرفوا ان الأحياء معتمدة أولا وأخيرا على الحفظ

دلوقتى احنا هنتخيل ان احنا عندنا انسان جبان أووووووووى وبيخاف من الكلاب مثلا وليكن اسمة برعى

دلوقتى برعى فى يوم من الآيام كان ماشى فى شارع ضلمة لوحدة وفجأة طلع علية كلب

طبعا برعى قال يا فكيك وطلع يجرى جااااااااامد جداااااااا

نشوف بقى اية التغيرات اللى بتحصل فى الجسم فى الحالات الطارئة دى اللى زى حالة الأخ برعى

أولا اللى هيشتغل الجهاز المسبثاوى لأننا فى خطر:abdoog8:

دلوقتى برعى عشان يجرى عاوز عضلاتة تنقبض بسرعة وبالتالى نشاط القلب يزيد عشان الدم يروح بكميات كبيرة محمل بالغذاء والأكسجين للعضلات... ماشى

ازاى بقى دة هيحصل؟؟؟!!

القلب هيزود معدل نبضانة وقوتها عشان يدفع أكبر كمية من الدم

طب والأوعية الدموية هتنقبض(يعنى هتبقى ضيقة وبالتالى هيمر فيها كمية قليلة من الدم) بس الأوعية الدموية اللى هتنقبض هى الأوعية اللى رايحة لحاجات أنا مش محتاجاها حاليا زى اللى رايحة للجلد والغدد اللعابية والدماغ والرئة

ملحوظة

أنا محتاجة أتنفس كتير عشان يدخلى أكسجين كتير أغذى بية العضلة يبقى ازاى وعاء الرئة بينقبض؟؟؟

المقصود هنا يابنات الوعاء اللى بيغذى الرئة نفسها لأن الرئة عضو وخلايا ومحتاجة عذاء ودة مش وقت تغذية نسيج الرئة دلوقتى........فهمتونى ؟؟؟؟

طيب نيجى للقناة الهضمية

بقى بالله عليكوا برعى فى الوقت دة المفروض يهضم حاجة

ولا دة وقت هضم؟؟؟؟؟ طبعا لأ

وبالتالى جدار المعدة والأمعاء هتنبسط (طبعا انتوا عارفين ان انقباض المعدة فيما يعرف بالحركة الدودية بيؤدى للهضم) بس دة مش وقت هضم

طيب بالنسبة للقناة التنفسية

تنبسط يا جماعة عشان يدخل أكبر كمية من الأكسجين للجسم وتساعد على انقباض عضلات الأخ برعى

طيب هتقولولى واية حكاية يثبط من افرازاتها دى؟؟؟

يثبط يعنى يقلل ودة عشان الإفرازات مش تاخد حيز من القنة التنفسية فتقلل نسبة الأكسجين اللى داخل.....ماشى يا بنات

طبعا نتيجة لكل النشاط دة والكميات الكبيرة من الدم اللى بتروح للعضلات

أكيييييييد العضلة بتستهلك كل الكلام دة وتطلع نواتج وفضلات تتجمع فى المثانة التى تنبسط لتتسع لهذة الفضلات

طب العين.....طبعا حدقتها تتسع عشان برعى وهو ماشى ميكعبلش والكلب يعضة وخصوصا اننا بالليل

طب بالنسبة للغدد

الغدة العابية والمعدية أفرازها قليل لأنة مش وقت هضم زى ما قولنا

أما الكبد فبيكسر الجلوكوز عشان نسبة السكر فى الدم تزيد وتروح تكفى العضلة

طب والبنكرياس .....بردوا افرازة بيقل

طب نخاع الغدة الكظرية,,,,,,أظن انها سهلة أوى ومعروف ان الأدرنالين هو هرمون الخطر وبيزيد نبضات القلب دة حتى أثناء الأزمة القلبية ممكن الطبيب يلجأ لحقن المريض بالأدرنالين عشان يزود من نبض القلب

دة كلة يا جماعة على الجهاز السمبثاوى

أعكسوها بقى فى الجهاز السمبثاوى

مع ملاحظة أن نخاع الغدة الكظرية لاتصل الية ألياف من الجهاز البارا سمبثاوى

كدة يا بنات دى مقارنة الكتاب

لسة فاضل كام ملحوظة كدة على الجهازين دول هقولهم بعدين عشان مش أطول عليكوا

وان شاء اللة يا مروة هشوفلك الفصل ال11 فى الفيزياء

بس المشكلة انى مش لاقية كتاب الفيزياء بتاعى

هدور علية وعلى بالليل ان شاء الله ربنا يكون يسر

أتمنى أن الأخ برعى يكون ساعدكوا يا بنات

ومش يكون شتتكوا

فى رعاية الله

انا فاكر د/هشام قالنا حاجة زي كده السنة اللي فاتت

قالنا الجهاز البارسمبثاوي ده يبقى شغال لما تبقى قاعد بتتفرج على فيلم في التلفزيون وبتقزقز لب

ودماغك رايقة

انما السمبثاوي ده يشتغل طبعا في حالة برعي زي ما الدكتورة قالت