[Hanoda]

انا انهارده يومي كان حلو وخلاص

محصلش فيه حاجة الحمد لله

انا كان عندي محاضرة محاسبة (د\ حلمي البشبيشي) الساعة 3,30 عصرا

اول ماوصلت لقيت الجروب بتاعي واقفين ومستنين المحاضرة وفجاءة سمعت ان الجدول اتغير وبقي فيه محاضرة قبل المحاسبة (رياضة واداها د\ علي الديب وكان نفسي احضر للدكتور ده جدا يمكن افهم حاجة في الرياضة) طبعا اللي راحوا بدري هما اللي حضروا
المهم كل ماندخل كلاس نخرج منه تاني اصل د\ البشبيشي مالوش مكان معين هو اللي بيحدد المكان ولفينا كل الكلاسات

المهم انه دخل المحاضرة متأخر حوالي الساعة 4,15 وشرح لنا تطبيقات علي طرق القيد في الدفاتر وادانا حوالي 20 مثال وحوالي 30 مثال واجب
وكمل المحاضرة وهو بتكلم عن المجموعة المميزة وشروطها ومميزاتها شجعنا كتييير جدا علي المذاكرة وبجد الدكتور ده ملوش حل جامد جدا شخصية محترمة جدا والحمد لله هو بيعاملنا زى ولاده لسه ماشوفاش اذا كان ليه وش وحش ولا هو كدا علي طول (بس بياخد الغياب ولو حد غاب 3 محاضرات يحرم من دخول المحاضرات )شرحه اكتر من رائع علي فكرة دي اول مادة استوعبها عن طريق الدكتور وقبل ما اذاكر المهم انه قال ان العشرة الاوائل في المجموعة المميزة هو المسؤل عن توظيفهم (هيشغل اول اتنين معيدين في الكلية وال8 الباقين هيشغلهم في اكبر الشركات واول مرتب لا يقل عن 3000 جنيه مصري)

اوعدنا يارب

بس والله المحاضرة كانت لذيذة جدا والمحاسبة كمادة كويسة

بس الرياضة د\ناشد عبد السلام بدأ بالمصفوفات وانا مش فاهمة اي حاجة خالص ( علي فكرة انا كنت دايما بجيب الدرجات النهائية في الرياضة وبحبها جدا )لكن بطريقة د\ناشد انا مستحيل اني افهم اي حاجة بيشرح بسرعة جدا وبيدي امثلة كتير ومابيعدش شرح مثال من اللي قاله

اما بقي عن الموارد والادارة معرفش عنهم حاجة (ربنا يستر)

والسلوكية تشبه علم النفس بتاع سنوي والواحد ممكن يمشى فيها


ربنا يوفقنا كلنا يارب