[msamido]

بسم الله الرحمن الرحيم

ازيكم يا جماعه النهارده إن شاء الله هنبدأ الدرس الجديد أو هنقول الجزء التانى بتاع الدرس اللى فات يلا بينا نبدأ بإذن الله.
هنتكلم النهارده فى حاجه اسمها conditional statements أو الجمل الشرطية ...
فكك يا عم من الترجمة العربى دى ووضح يعنى إيه ؟
حاضر الـ conditional statements يعنى جمله بتتحكم فى مسار البرنامج بردوه يعنى إيه ؟؟
يعنى مثلا لما بنكتب برنامج إحنا قولنا إن البرنامج بيشوف فين الـ main method ويبدأ ينفذ الكود اللى جواها سطر ورا سطر بالترتيب صح ؟؟
الـ conditional statements دى بقى ممكن تخليك تقول للبرنامج لو شرط معين اتحقق تنفذ الكود ده ولو م اتحقق ميتنفذش أو ممكن كمان نقوله لو الشرط ده اتحقق اعمل كذا أو لو مش اتحقق اعمل حاجه تانيه أو كمان فى حاله بنقوله لو الـ variable ده مثلا قيمته كذا اعمل كذا ولو قيمته كذا اعمل حاجه تانيه أو ثالثه وهكذا حد فاهم حاجه ؟؟؟

طيب نبدأ نقول بقى عملى ؟؟ نبدأ نقول
الـ conditional statements أنواع وأول نوع وأبسط نوع منها هو if statement بتعمل ايه ست if دى ؟؟
من معناها واضح إنها بتقول لو الشرط اتحقق نفذ الكود اللى هقولك عليه ده

طيب شكلها بيبقى ازاى طنط if دى ؟؟
طنط if دى ليها شكلين شكل كده

 
if(condition)
{
// do some things
}

ودى بتقول لو الشرط ده اللى طبعا هيبقى حاجه موجودة مش كلمة condition كده اعمل حاجه
وليها شكل تانى بقى هو كده

if(condition)
{
// do some things
}
else
{
// do some thing else
}

ودى بتقول لو الشرط ده اتحقق اعمل حاجه ولو مش اتحقق اعمل حاجه تانيه

مثال يا عمنا وبطل رغى ؟

ماشى شوفوا طيب الكود ده :

#include <iostream> 

int main()                            // Most important part of the program!
{
  int age;
  cout<<"Please input your age: ";
  cin>> age;
  if ( age < 100 ) 
{
     cout<<"You are pretty young!\n"; 
  }
  else 
{
     cout<<"You are old\n";
  }
getch();
  }

بيتهيألى الكود واضح ومش محتاج شرح صح ؟؟؟

طيب هو فى بس حاجه جديدة فى الكود فى السطر بتاع الـ main بعدها فى العلامتين دول // وشوية كلام بعدهم إيه ده يا عمنا ؟؟
العلامتين دول معناهم إن اللى جاى بعدها فى نفس السطر ده comment يعنى مش كود ده مجرد كلام توضيحى وكده يفهم البرنامج إنه مش محتاج يقرأ الكلام ده
طيب دى لازمتها ايه ولازمته ايه الرغى حتى فى وسط الكود
لاأ دى مش مجررد رغى دى شئ مهم جدا فى البرامج الكبيرة وفى الشركات انت مش هتبقى شغال لوحدك وحتى لو شغال لوحدك تخيل انت بتكتب برنامج عباره عن عشر ألاف سطر تفتكر بعد ما تخلص هتقدر تتذكر إنت كنت كاتب كل جزء من الكود ده ليه ؟؟
لا طبعا وهى دى وظيفة الجمل التوضيحية دى بتكتبها علشان تقول كل جزء فى الكود بيعمل ايه وكمان لان فى الشغل بعد كده هتبقى مش بتشتغل لوحدك انت معاك فريق عمل وممكن واحد تانى يكمل مكان شغلك وممكن تكمل مكان شغل حد تانى فتبقى فاهم الكود بتاعه من الجمل التوضيحيه دى اوك ؟؟؟

هوضح بقى كمان الجزء الجديد بتاع الـ if
السطر ده

  if ( age < 100 ) 

بنقول if واللى بين القوسين ده هو الشرط أو الـ condition اللى لو اتحقق الكود اللى بين القوسين اللى بعد كده هيتنفذ
طيب يعنى ايه الشرط اتحقق ؟؟
يعنى كانت نتيجة ما بين القوسين true
طبعا لازم نقول على الـ operators أو معاملات المقارنه وهى كده

>     greater than              5 > 4 is TRUE
<     less than                 4 < 5 is TRUE
>=    greater than or equal     4 >= 4 is TRUE
<=    less than or equal        3 <= 4 is TRUE
==    equal to                  5 == 5 is TRUE
!=    not equal to              5 != 4 is TRUE

يارب تكون وضحت ؟؟

طيب لو الشرط كانت نتيجته false مش هيدخل فى الكود اللى بين القوسين اللى بعد طنط if وهيدخل فى الكود اللى بعد اختها else وينفذه

هيوضح الكلام ده اكتر لما تنفذوا الكود وتجربوه إن شاء الله

ده كده أول نوع ولسه فى تكمله بس مش هنقولها دلوقتى لما نقول باقى الأنواع إن شاء الله أو ممكن نكمل علطول الدرس الجاى ربنا يسهل
بس دلوقتى خلينا نكتفى كده علشان الفجر خلاص هيأذن
بالنسبة للواجب بصراحه مش عارف اديكم واجب دلوقتى يلا سماح المرة دى
بس ياريت تطبقوا وتتمرنوا عليها وتشوفوا النتايج

فى النهاية عايز أقول معلش ممكن يكون شرحى المرة دى مش مظبط بس علشان أنا فعلا نزلت الدرس ده بس علشان حسيت انى اتأخرت عليكم فيه لكن أنا دماغى مش مظبطه شويتين
يلاا بالتوفيق ولو فى أى اسئلة أنا بإذن الله موجود

.
.