فضلت أحب بيني وبيني ما حد يعرف ايه اللي بيا
كان الطوفان محبوس ولكن كان له علامة ما بين عنيا
كنت اضحك من قلبي أضحك لما اكون وياها ثانية
وهي برضه كانت بتضحك زي وردة روتها مية
*********
جرت الساعات أيام كتيرة وعقدها في الشغل قرب
أيام قليلة خلاص وتبعد تقعد في بيتها والفرحة تهرب
يعني خلاص مش هشوفها شهرين تلاتة ؟
طب فين هلاقي لحزني همي لدمعي مهرب
خلاص خلاص يا (حياة) طب اعمل ايه .. لو يوم عطشت وعزت اشرب؟
*********
خدت القرار يمكن يكون قرار عبيط جداً وهايف
قلتها ينفع اكلمك .. يعني مرة .. مرتين ... ؟ ساعتها كان القلب خايف
بصتلي بصة .. دش ساقع .. على راسي نازل .. قالتلي انت فاكرني ايه ؟
الزم حدودك .. ولا انت ايه شايف؟
ولا كلمة طبعاً غير ذهول وسكوت رهيب سكن الشفايف
***********
وخدت بعضي كعادتي دايماً للبحر اداري كسفتي
ياما جتلك يا بحري ارمي عليك حمولي شكوتي
غصب عني طلبت منها .. غصب عني ..انت عارف هي بالنسبة لي ايه؟
دنيتي
اعمل ايه متنيل رومانسي .. بحتاج .. إحساس .. عيون .. والاحتياج دا بلوتي
***********
والغريبة تاني يوم رحت عادي وشوفتها
قلتلها آسف قالتلي انسى كل حاجة قلتها
ولا كأني سمعتها
وبساطة اتصافينا .. وخلاص معدش غير النهاردة .. وبكرة .. بكرة هبعد آآآآه عنها
**********
وبسرعة بكرة بنفسه شرف سيفه جاي يقسم لقانا
لمت كراريسها وحاجتها وابتدى الملعون فراق يعكس خطانا
ومعدتش لينا غير بس نظرة بشوق ورانا
مع السلامة .. مع الف راحة وضحكة صافية .. مع ألف دمعة ..
مع ألف حلم هنصحى منه نلقى بعده الآه معانا
***********
إلى اللقاء مع حلقة قادمة من أنا وحياتي