طيب بما انى قاعده كدا احكى عن اللى حصل اليوم اللى قبل اولت امبارح لا اللى قبله
_ويلا ادينى طنشت اننا دخلنا كمان فى يوم جديد _
اى يوم الثلاثاء
...
المهم اليوم دا مش صحيت لانى مش نمت اصلا من اليوم اللى قبله وقضيت اليوم كله وانا عامله مره كدا
ومره كدا
جهزت ونزلت
المهم قبل ماانزل اختى المفعوصه الصغيوره قالتلى :"يوح يحاب الحضانه انا يوح الكامعه"
ال يوح يحاب الحضانه ال
ضحكت عليها باى حاجه وزوغت منها
طلعت ع الجامعه ووانا داخله كانو داخلين قبلى بخطوتين بنتين اعرفهم كانو معايا فى درس الالمانى زماااان
كانت كل واحده ماسكه بالطو
المهم السلام كان بالابتسامه بس لانى كنت لسا داخله من الباب وهما عدو
وانا طلعت للراجل ورقة الترشيح مقفوله وهو ولا فتحها وادهالى تانى وقالى اتفضلى
قولت خلاص وانا مش هجيبها تانى
عملالى ازمه فى الشنطه كل مااطلع الجدول اطلعها هى
وصلت لكليتى لقيت البنوتين هناك
انا افتكرتهم فى طب قالولى لا احنا علوم بيولوجى
قولتلهم انتو دخلتو معامل او المشرحه او بداتو شغل عملى يعنى
قالولى لا
طب امال جايين بالبالطو دا ليه
قالولى اهو منظر كدا
قلتلهم طيب ربنا معاكو
اخدت نفسى واستعنت بالله وطلعت جرررررررى على المدرج والمبنى كان فــاضى
وصلت للمدرج رحت للباب الرئيسى لقيته مقفول لفيت ورحت للباب اللى من ورا لقيته بردو مقفول والعيال واقفين وقفت انا كمان
الولاد نازلين رغى مش عاتقين نفسهم ولا عاتقينا
والبنات كانت هاديه ومش طالع منهم لا حس ولا نفس
واانا خلاص دماغى ورمت واتخنقت من العيال دى ومحدش منهم قادر يروح يدور على الراجل عشان يفتحلنا المدرج
كان نفسى اصرخ فيهم واقول لهم اتكتمو وحد يروح يعمله منظر ينادى على الراجل
صبرى نفد ومش لقيت حد اتحرك روحت انامشيت لقيت الراجل قالى عايزين تفتحو المدرج
ايه الغباوه دى ؟؟!! امال هناخد المحاضره فى الطرقه ولا ع السلالم
جه فتحلنا الباب .. دخلنا .. قعدت انا فى البنش التانى عشان متعبش زى امبارح
راح قالى اطلعى قدام عشان الولاد يقعدو هنا
خلاص خفيت الاماكن
محتلين المدرج كله احنا بنقعد فى البنش الاول ياورا خالص
طبعا مش هقاوح .. طلعت قدام وقعدت شويه وجم صحبتينى وبعدها دخل الدكتور بتاع الحاسب وقعد رغى شويه عن مواضيع المنهج بتاعنا وكدا
وكنا فيه حاجات بنكتبها وراه
انا طبعا من بدايتها نزلت راسى ورميت ودانى عند الدكتور
وفى حاجات كنت بسمعها بتكبها وراه
واوقات كان يكتب من غير مايتكلم كنت بغلس على اصحابى واقول لهم ملونى
او انقل منهم بس الاتنين كانو بيكتبو بخط مقرف مش يتقرى اساسا فكنت كل شويه اقولهم ايه دى ايه دى
بس اول مابدا الدكتور شرح النظام الثنائى والعشرى والتحويل من دا لدا وكدا
كنت لازم ابص وانا بعانى
وبردو اتكلم عن حاجه فى جبر رياضه 2 اسمها المصروفات او المصفوفات حاجه زى كدا
ووانا بنقل خطه كان حالته صعبه جدا كنت بقف اوقات عند كلمات واخمن دى عباره عن ايه
واوقات بهيس واخمن تخمينات غريبه واضحك مع نفسى
عدت المحاضره دى بس كانت لذيذه بجد وخفيفه
ومحدش فينا عرف يقعد فى المدرج وكنا كل شويه نروح ونيجى ونروح ونيجى
لحد مادخل الدكتور بتاع الجبر وفى الاول قعد يقول اننا لازم هنراعى واحنا بنشرح الناس اللى مش اخدت رياضه 2 وبعدين راح قال بس مين هنا مش اخد الاعداد المركبه
انا قعدت افتكر مع نفسى الحاجه دى عدت عليا ولا لا
اصله يعنى ماكان قال احسن مين مش اخد رياضه 2 او كان علمى علوم
واقول لصحابى احنا دى اخدناها يقولولى مش فاكرين
والمدرج كله كان بيبص على بعضه ويرمى كلمه يمين وكلمه شمال
راح الراجل قال انا بسال سؤال محدد مين مخدش الاعداد المركبه ؟؟
قولت لصحابى هترفعو ايديكم قالولى يلا
سبتهم يرفعو ايديهم وانا مش رفعت ايديا
لقيت صحبتى رفعت ايدى
والمدرج كله فضل باصص علينا وقعد يرمى كلام
الدكتور قال بسيطه ان شاء الله اصلا الاعداد المركبه دى اخر مواضيعنا فى المنهج
وقعد يتكلم عن المبتدا والخبر
والعيال ورايا نازله تتريق وتهرج
وانا مش مستوعبه احنا فى محاضرة ايه اساسا
احنا فى تربيه ولا علوم
بس فضلت سمعاله وشويه وبدا يتكلم عن المنطق الرياضى وعرفنا يعنى ايه تقرير وبس دلوقتى فهمت هو ليه شرح الكلام دا فى الاول
وطلع دكتور هادى و لذيذ خالص والله وماشى معانا واحده واحده واستمتعت فعلا بمحاضرته
خلص الدكتور واحنا كان علينا بعد كدا تفاضل
ومحدش بردو فينا عرف يقعد فى المدرج وكنا كل شويه نروح ونيجى ونروح ونيجى
فى الاخر نزلنا تحت ورحت انا وواحده صحبتى قعدنا مع بنات اصحابنا من اداب
شويه ورجعنا للكليه ومحدش فينا كان قادر يطلع تانى للمدرج ويشوف ايه النظام
شويه ولقينا ولاد نازله من دفعتنا لقيت صحبتى بتقولهم لو سمحت لو سمحت ولا حد عبرها
راحت قالتهم ياشباااااااااب
كله وقف وكسفتنا الداهيه دى وسالتهم راح واحد قالها لا محدش دخل والناس كلها نازله
مش كلمتها وبصتلها بس
وروحت مع بنات اصحابى وخلاص على كدا
دا كل اللى قدرت افتكره
========================================
ياساااااااتر ياااااارب ... النوعيه دى عندنا بردو معانا فى الدفعه
فى المحاضرات لما يطلع اى حد يستفسر عن نقاط معينه تلاقيهم باصينله ويرمو عليه كلام
ولما جرب واحد يحل حته فى محاضرة الجبر
بالرغم انه حله كان قريب
اتحدف من كل ناحيه بالكلام
الناس دى تلاقيها مركزه معاكى ومع اللى حواليها مش فى المحاضره خاااااااالص
بس فعلا الواحد اوقات كانت بتستفزه اسئله خطيره
كانو بيسالوها ناس كانت معانا فى الدروس
بس فعلا كنا بنحاول نمسك نفسنا ومش نتكلم ولا حاجه
اصل هو فعلا ايه
كما تدين تدان ...
والسنه طويله يعنى مش هنخلص لو فضلنا كدا
يلاربك الهادى