يلا بقى نصيبنا كده هنعمل ايه اهى بردو علوم احسن من غيرها
على العموم يا ستى
بداية طبعا صحيت الساعة 6 ونزلت على 7 بس المره دى خدت نفس طريقى الاولانى فى المواصلات
ووصلت على 7.40
و كان علينا اول حاجة عملى فيزيا فضلنا ندور انا والواد صاحبى محمد على معمل الفيزيا فى الاخر لقيناه
بس المعمل كان مقفول ف استنينا بره على امل ان المعيد يجى ويدينا المحاضرة المهم شوية كده ولقينا بقية قسم الجيوفيزيا جيهم وقعدنا نحكى ونتكلم عن الكلية
المهم طلع معانا واد ساقط وقعد يحبطنا ويقولنا جيوفيزيا دى اكتر قسم متعب وهتاخدواا مواد كتيرة وصعبة وملكمش ايام اجازة غير الجمعة وهيطلعوكم كل فترة للمقطم تدوروا فى الصخور وقعد يقولنا شغل البترول ده قليل فى مصر ومتصدقوش الكلام انكم هتجيلكم عقود عمل وانتوا بتدرسوا وقعد يرغى جاب للواحد اكتئاب المهم انا وصاحبى طبعا نفضناله وحسينا انوا بيقول كده علشان هو ساقط
فضيلنا مستنين وفى الاخر سيبناهم ومشينا لان المعيد ماجاش
و الوقت ده كان عندنا فاضى من بعد العملى 3 ساعات فطبعا لازم نستنى علشان عندنا حقوق انسان على 1.20
المهم الواد صاحبى كان عايز يروح يقابل بنتين وقالى تعالى معايا بس انا نفضتله وقلتله روح انت لوحدك
بس تقريبا كده كان زعل ومشى لوحده بس بعد كده كلمنى عادى
انا بقى بقيت لوحدى قعدت افكر اعمل فى ال 3 ساعات دول
قمت اتصلت بواد صاحبى تانى قالى انا جاى الكلية دلوقتى فا استنيته وقضيناها طبعا كالعاده
صاحبى التانى ده كان بيولوجى وكان عليهم محاضرة الميكروبيولوجى وحاجة تانيه زيها كده مش فاكر اسمها ف قالى تعالى معايا والنبى احضر معايا المحاضرة فرحت معاه لحد ما محاضرة حقوق الانسان تيجى
المهم الراجل الدكتور طلع عنده ضمير وقعد يشرحلهم شوية
وطبعا المدرج كان هينفجر من الناس واللى قاعد برجل واحدة واللى طاير فى الهوا فانا طبعا اتخنقت من الجو ده واستنيت لما المحاضرة الاولانية خلصت وقلت لصاحبى التانى هستناك تحت لما تخلص المحاضرة التانيه رن لى على الموبايل
و قعدت شوية فى ممر علوم لحد ما صاحبى التانى ده خلص ورنلى ورحنا على المدرج نحضر محاضرة حقوق الانسان
وكالعاده الدكتور اتاخر اوى وتقريبا كده مكانش جاى لان الساعة كانت 2.10 ولسه ما جاش والمحاضرة كانت الساعة 1.20 فلقينا الناس بدأت تمشى رحنا مشينا احنا كمان
المهم طلعنا ملقيناش الميكروباص واقف رحنا خدنا تاكسى وقلنا بقى نفكها شوية بدل الميكروباص الخنيق
و روحت على العصر
ولسه حتى قبل ما انام صليت الظهر والعصر وجيت على المنتدى وبس