اقتباس:
المشاركة الأصلية كتبت بواسطة raf11111
أنا أقولك بقة قصة الدواجن
بص يا عم ،
بقة الحكومة كانت عاملة جمارك عالية على استيراد الدواجن عشان تشجع الإنتاج المحلي
قوم المنتجين المحليين استغلوا ده و عملوا ممارسات احتكارية و عملوا رباطية مع بعض و بيتحكموا في سعر السوق و بيحطوا نسب أرباح عالية جدا و بيمصوا دمي و دمك ، قوم الدولة قالت لهم ما ينفعش كده ، رخصوا شوية ، اكسبوا بالمعقول ، قالوا لها أصل العلف غالي و جمركه عالي شيلي الجمارك من عالعلف ،
قامت الحكومة قالت لهم حاضر ، يعني لو شيلت الجمرك عالعلف ترخصوا الفراخ للناس قالوا لها طبعا ، أوماااااااااااال بصوت فريد الديب
قوم الدولة شالت الجمارك من على العلف عشان يرخصوا
قوم هم عملوا ايه بقة ؟
استعبطوا ، و صدروا العبيطة ، و قالوا أصل تكاليف الإنتاج عالية
علما بإنهم كمان حرامية دعم ، و بيسرقوا دعم أنابيب البوتاجاز و بيشتروها من المستودعات ـ اللي اصحابها حرامية دعم برضو ـ .
و كل يوم بيغلوا علينا الأسعار حتى من قبل التعويم و من قبل رفع أسعار البنزين
ما هم محتكرين ما عندهومش منافسين
قامت الدولة شالت الجمارك عالدواجن المستوردة عشان يحترموا نفسهم
قاموا لبسوا جاكتة الصناعي الوطني و هيجوا الدنيا عالحكومة سواء بالإعلام أو بالنواب اصحاب المصالح .
آدي يا سيدي قصة الدواجن اللي عاملين عليها الحدوتة
طب هل الحكومة صح و لاغلط ؟
بص يا سيد الناس ، المفروض إن الدولة في النظام الرأسمالي توجه السوق بالسياسات مش باحتكار الإنتاج ، و ده الحل اللي في إيد الدولة لمواجهة المحتكرين ، بمعنى أنا باتحكم في الجمارك و من خلالها أقدر أسيطر عالأسعار في السوق .
فلما يتحول المصنع الوطني اللي أنا دعمته و حمت له صناعته إلى محتكر و مستغل ، وجب على الدولة ردعه
و رفع الحماية عنه لحد ما يرتدع و يتعلم الأدب و يكسب بالمعقول
إذا كانت الفرخة المستوردة " النضيفة " مش "المعفنة " بتتربى في بلدها و تاخد علف بتمنه و تتربى بتكلفة حقيقية من غير دعم و بعدين تتشحن و تيجي و تاجر الجملة يكسب ، و تاجر القطاعي يكسب و تتباع للمستهلك بعشرين و خمسة و عشرين و تلاتين جنيه ، و الفرخة البلدي تتباع لك بـ 45 جنيه ، و المزرعة واخدة كافة أشكال الدعم ، يبقى اصحاب المزارع دول إيه ؟؟
حرامية .. قولا واحدا ..
طب الحل اللي في إيد الدولة إيه ؟
هافتح الاستيراد ، عشان يبقى فيه منافسة ، و ينزل سعره غصب عن المحتكر و بالجزمة ،
حد شايف حل تاني ؟
الموضوع لا فيه تدمير للصناعة الوطنية ، و لا هدم و لا اضطهاد ، بالعكس ، الدولة مش عايزة تستورد حاجة أصلا .. و القرار اتاخد لصالح المواطن اللي بيتعرض لكافة أشكال الاستغلال . يا إعلام نصاب يا ضلالية
منقووووول عن الاستاذ مصطفى العنانى
|
خالص شكرى و تقديرى لحضرتك أستاذنا الفاضل على هذه الاضافة
جزاك الله خيرا و بارك الله فيك