[upstairs]

عارفين الناس اصحاب المقولة الشهيرة بتوع : "الصين وسنغافورة والهند والبرازيل بدأوا كلهم معانا فى الستينات والسبعينات وشوف هما تقدموا وبقو فين واحنا تخلفنا وبقينا فين!!! "

اهى الناس دى هى هى الناس اللى وقفت ضد الحكومة لما حاولت تبقة زي الدول دى وعارضوا الاصلاحات سنة 77 اللى كان هدفها اطلاق العنان للقدرات الحقيقية الهائلة للاقتصاد المصري ليحتل مكانته المستحقة بعد انتهاء الحرب فى 73

ومن 77 واحنا خايفين ناخد قرار شجاع وبنعتمد علي حلول مؤقتة لارضاء الناس وترحيل المشاكل للحكومة اللاحقة لمدة 40 سنة بنأجل فى القرار دة

وكأن التقدم والاصلاح ملوش تمن وكأننا فى المدينة الفاضلة
هنبقة دولة عظمي بدون ما نجتهد ونتعب !!! منطق مجنون لكنه نتاج طبيعي لمستوي الوعي

وساعتها مكنش فيه صندوق نقد ولا حاجة , هى هى القرارات من 40 سنة

لان الناس متخيلة ان فيه شروط واجبار وتدخل خارجي
برنامج الاصلاح دة معروف بنوده من زمان وبدا من 2014

صندوق النقد فقط بيحاول يساعدنا علي ضمان نجاح الاصلاح مش اكتر

لحد ما اتصدم اقتصادنا بثورتين فى 5 سنين وانهيار الشرطة وبالتبعية الأمن والاستقرار والسياحة والاستثمارات كلهم مع بعض مرة واحدة

مبقاش ينفع نكمل حلول مؤقتة , مفيش رصيد يسمح بكدة ولا احتياطي ولا مستويات دين وعجز تسمح بكدة

ال9 حكومات الثورية بعد يناير 2011 خافوا من الناس بسبب حالة الفوضي واسهال التظاهر والتخريب والهيجان

خافوا يتخذوا القرارات الضرورية المؤلمة

لحد ما وصلنا للمرحلة دى اللى اتفرض علينا ندفع تمن تراكم 40 سنة غباء وجبن و5 سنين فوضي وثورات وتخريب وتعطيل انتاج وانهيار احتياطات

انا قولت امبارح الصبح بعد التعويم وقولت من شهور ان متوقع جدا مع برنامج الاصلاح يحصل زيادات فى الاسعار ودة طبيعي وسهل توقعه

لكن فى اللحظة التاريخية دى واللى مش بتتكرر فى تاريخ الدول الا مرة او اتنين

بنبقة اودام اختيارين , يا نفضل زي ماحنا ومحدش يرجع يشتكي ويقول ليه مبقناش زي الصين او اليابان , او نتحمل الاصلاح والتعديل الضروري فى الاقتصاد عشان نبقة فى مصاف الاقتصادات المتحولة الtransition economies اللى هى الاقتصادات اللى بتسعي وبتجتهد انها تتحول من المستوي المنخفض اللى هى فيه وتنتقل لمستوي افضل منه من حيث دخل الفرد ومعيشة الناس والخدمات وجودة الحياة والاستثمار والنمو والتنمية

اللحظة دى مر بيها كل الاقتصادات المتقدمة زي المانيا واليابان او المتحولة زي الصين والهند وجنوب افريقيا والبرازيل والمكسيك وروسيا وتركيا

اللى وصلوا للعظمة والتقدم وجودة الحياة دفعوا التمن غالي وصبروا واجتهدوا

من حق الناس تضايق وتعلن انزعاجها من غلاء الاسعار بس فى نفس الوقت لازم يعرفوا انه علمياَ مفيش حل بديل غير كدة , النهاردة كل واحد حر يقرر اللى هو عايزه

نفضل مصر الدولة ذات مستويات الدخول المحدودة وشكل المعيشة وجودة الخدمات السيئة لمعظم سكانها مع قدرات وفرص غير مستغلة ولا توزيع عادل للثروة ونظام ضريبي مختل وعجز موازنة ودين عام وبرنامج دعم غير سوي واستثمارات اقل من استحقاقنا بكتير وجهاز إداري مستنقع للفساد والقذارة ...الخ

او ننتقل لمصر اخري تماما زي ما العالم كله بينتظر وبينظر لينا وشايفنا دولة عظيمة تملك امكانيات تنين اقتصادي لكن لا تملك ارادة التغيير والاصلاح

مصر بيطلق عليها فى المؤسسات المالية وبين الخبراء فى الخارج انها CHINA of the MENA

يعني "صين الشرق الاوسط والشمال الافريقي"

كل الدول اللى بدات قبلنا عانت من نفس المشاكل ونفس التجربة بالحرف

- تركيا التضخم فيها كان 70% قبل ما تستلم الشريحة الاولي من قرض النقد الدولي سنة 2001 وتبدا برنامج الاصلاح الناجح واللى عاد بنتايجه الايجابية علي كل الناس

- الصين فى التمانينات فى بداية الاصلاح التضخم وصل ل30%

- اليابان 25% فى السبعينات

- البرازيل 7000 (سبعتلاف) % تضخم فى بداية التسعينات

- كوريا 35% اوائل التمانينات
- المكسيك 170% بنفس الفترة
- اندونيسيا 85% اخر التسعينات

** مصدر البيانات فى اول تعليق

احنا التضخم عندنا الرسمي 14% ولو افترضنا الحكومة بتكذب يبقة 20% ومش قادرين نتحمل

حق الناس تقول انا مش قادر اتحمل انا استسلمت انا مش عايز اصلاحات ولا عايز تطوير وراضي باللي احنا فيه

بس خلينا نفكر بعض وننتبه : من الناحية العلمية لو توقفنا عن الاصلاحات , فعلا انت هترتاح مؤقتا لكن النتيجة كارثية علي المدي المتوسط
وعلميا مفيش مؤسسة ولا خبير ولا تقرير ليهم سمعة عالمية وذو كفاءة قال ان فيه بديل للاصلاحات دى والقرارات دى , الكل اجمع علي صحتها وضرورتها ولا بديل لها

عشان محدش يفتي مع اسهال الافكار / الحلول الغير واقعية والغير قابلة للتطبيق اصلا اللى شغالة من امبارح

كل اللى تحولوا او تقدموا مروا بنفس تجربتنا

خفضوا الدعم
حصل تضخم فى الاسعار
عوموا او خفضوا العملة
قللوا النفقات الحكومية وضغطوها
بعدها ضغطوا علي الناس والكل تقشف وقلل مصاريفه وتحمل

لكن بعد كدة كل المجتمع استريح وبدا يستشعر قيمة صبره وتحمله وانطلقوا لافاق وارقام ومستوي دخل افضل بكتير مما كانوا عليه

المانيا المدمرة بعد الحرب العالمية التانية واللى بشبهها بالفوضي اللى كانت عندنا فى مصر اخر 5 سنين ... موصلتش لالمانيا اللى نعرفها حاليا الا بتقشف اضعاف تقشفنا وتضخم اضعاف تضخمنا
السلع الاساسية مكنتش متوفرة اصلا , مش بس سعرها عالي
وكانت عايشة علي معونات ودعم امريكي ودول صديقة اخري

لحد ما نجح برنامج الاصلاح واعادة الاعمار , كذلك اليابان

وكذلك الصين والهند والبرازيل وتركيا كانت اقتصادات نامية تملك امكانيات لكن مفيش ارادة ,,,
قرروا يمتلكوا ارادتهم ويتحملوا , شعوب اخري استسلمت ويأست وقررت انها متتحملش

كل واحد حر , بس المهم نتحمل مسئولية قرارنا ومنشتكيش بعد كدة

كمان كل اساتذة الاقتصاد حول العالم قالوا وانا نقلت عنهم ضرورة تقوية ودعم شبكات الحماية الاجتماعية لمساندة غير القادرين كجزء من عوامل نجاح البرنامج

فين دة ! 3 جنيه زيادة فى التموين مش كفاية نهائيا دي بتمن نص كيس سكر تمويني!!!
لازم اجراءات اقوي من كدة واسرع

ولازم نتكلم مع الناس , دة اهم وقت لازم يحصل فيه كلام مع الناس وشغل علاقات عامة حقيقي

حسس الناس بمجهودك وكن صادق معاهم هيقفوا معاك , قولناها مية مرة
حتي لو طلعت قولت انا مش قادر اعمل كذة , الناس لو صدقتك هتعذرك وهتساندك
ولو عملت حاجة ايجابية قولها واعلن عنها بقوة ... لان مش ضروري كل الناس تحس بالحاجة دى لاننا بلد كبيرة و90 مليون ومشاكلهم ضخمة ومتراكمة واي نجاح هياخد وقت