انا هقول مثال اقرب واحد ليا بابايا ربنا يخليه يارب لينا وميحرمناش منه ابدا بابا كان بيشرب سجاير عرف هو السجاير ازاي واحد صاحبه لما كان صغير قاله خد جربها رفض في الاول تاني مره رفض تالت مره بابا قال وفيها ايه دي مره واحده شرب واحده عجبته في يوم تاني اديني واحده بقي بابا هو اللي يجيب السجاير بعد كده وبيعزم علي صاحبه لغايه ما جه يوم النكسه اليوم اللي فعلا كنا خايفين منه كنا خايفين لبابا يروح مننا الصراحه موش هنقدر نعيش من غيره فعلا ودي الحقيقه تعب اه اه قلبي واجعني وكان يوم اجازه والمستشفي العام كانت قافله ما بتستقبلش حالات ازاي معرفش حاولنا نتصل باي دكتور كان الفجر العيادات قافله بس ربنا رزقنا بدكتور ربنا يبارك فيه يارب هو اللي انقذ بابا بعد مشيئه ربنا شوف بقي بابا دلقتي اه عايش معانا بس مشوار بسيط بس يرقده يومين ورا بعض شوف بقاله كام سنه الازمه دي عنده اكتر من سبع سنين واحنا عايشين ع لي الحال دا ما بنشوفش بابا غير نادر موش زي الاول يعني ينزل معانا يتفسح موش زي الاول ووقت ما نحتاجه ماما تقول محدش يصحيه عشان تعبان ليه يعني نعمل في نفسنا كده ان مكنش عشان خاطر اللي بيدخن عشان خاطر اولاده واسرته والله بابا جه عليه فتره بيتمني انه يموت لانه موش عارف يعيش كل شويه قلبي واجعني تعبان عيشه ايه دي واحنا تعبنا بجد انا قصدي من الكلام دا ان الشباب اللي جاي بعد كده اللي بيدخن دا مصيرك بعد كده هتتعب هتتمني الموت عشان تستريح طب ليه بقي ميستريحوش خالص من الاول وبلاش تدخين خالص اللي كان بيدخن سيبك منه موش هتاخد غير تعب القلب والهم والغم والله فعلا انا واخواتي كل يوم مقبل ما ننام ندعي ربنا ان بابا يقوم من النوم تاني يوم سليم الحقوا نفسكم بجد فيه بالتاكيد ناس كتير هنا في المنتدي بيشربوا سجاير ان مكانش سجاير هيبقي شيشه ان مكانش هيبقي حاجات تانيه كتير احنا في غني عنها يا شباب فكروا في مستقبلكم فكروا في اخرتكم ازاي هتقابل ربنا وانت بالمنظر دا ولما ربنا يسالك هترد تقول ايه لما فمك يشهد هتبقي عامل ازاي وبتفكر في ايه ندم انسي يا جميل اللي فات فات الواحد بيفكر في اخرته بيشوف ايه الحلو اللي يعمله في دنيته عشان اخرته ربنا يهديكم ويهدينا جميعا للطريق الصح
|