السلام عليكم 
اسمعوا يا ابنائي
انا في الاول كنت مخضوضه كده وخايفه من كل اللي كنت بسمعه عن سجن الثانويه العامه وكاننا داخلين حرب iي بجد والله الموضوع ابسط من كده بكتير
انا كنت حاطه قواعد لنفسي من بدايه السنه والحمدلله فضلت ماشيه عليها وربنا كرمني الحمدلله
بصوا بقا اولا لازم يكون عندك يقين ميه في الميه ان ربنا كاتبلك كليتك من قبل ماتدخل ثانوي اصلا والقدر موجود بس ييتصارع بقي مع الدعاء
واليقين ده بقي مش معناه انك تكسل وخلاص بقا ما ربنا كاتبلي عنده انا هروح فين لا اهم حاجه لازم تعمل اللي عليك وبضمير وتاخذ بالاسباب وبعدها اهم خطوه انك تتوكل علي الله
خلاص انا هعمل اللي عليا ومش هقصر ان شاءالله وهتوكل علي الله يبقي انت كده تحط في بطنك بطيخه صيفي 
انا بجد عن تجربه السنه الي فاتت كنت واثقه في الله بطريقه غير عاديه ومتاكده وماعنديش شك خالص ان ربنا هيفرحني وتعبي مش هيضيع كل ما يبقى عندك ثقه في الله وتبقى متعشم في ربنا وتظن خير تاكد ان ربنا مش هيخذلك ابدا
نيجي بقا للدروس المدرس لازم تكون بتفهم منه كويس جدا هو اللي عليه انه يفهمك وانت طيب ليك 80 في المبه من الموضوع كله لانه اعد معاك ساعتين فهمك وكله تمام انت بقا تروح تذاكر وتخلص حاجتك والاهم انك اوعي تركن درس وتقول بعدين هتلاقي بعد كده وراك ميه حاجه ومش هتعرف تلمهم
وممكن تاخد درسين في اليوم مثلا ويبقى عندك يومين مثلا فاضين تقعد فيهم تركز اكتر في البيت انا عن نفسي كنت بعمل كده وكانت فكره ناجحه جدا وكنت بنجز كتير اوي في اليوم الفاضي
نيجي بقا للاكل طبعا ممكن تاكل في الشارع كتير ده العادي بس نصيحه خليك في الاكل المفيد اللي في البيت عشان صحتك ومايجيش مثلا حد يتعب بسبب اكل بره ويقعد لاقدر الله فتره مايذاكرش ويضيع عليه دروس
وطبعاً اولا واخيرا رضا للوالدين اوعي تزعل مامتك وباباك وخصوصاً ايام الامتحانات طبعا المفروض علي طول بس رضاهم ربنا هيرضي عنك ويدعولك ودعوتهم تكون مستجابه ان شاءالله
في بقا مقوله بتقول ان النجاح مش بتوصله بالاسانسير لا بتاخذ خطوه السلالم خطوه خطوه يعني لازم تتعب عشان توصل لهدفك ودايما خلي حلمك ادامك وشجع انت نفسك انك هتقدر توصل بعون الله لهدفك وماتقلقوش خالص زي ماقولتلكم وهنزلكم بوست تاني بقا عن المواد وايه المواد الرخمه اوي في مذاكرتها وازاي تذكرها وكده ولو اي حد عايز اي حاجه ممكن يقولي وان شاء الله احاول اساعده وبالمناسبه انا كنت علمي علوم ولغات لو حد عايز يسال عن المواد والمدرسين وحاليا في كليه صيدلة ويارب اكون قدرت افيدكم
__________________
قُل للذي اذاك إنّ الله لاينسى ولاتخفّى عليه خافيه♡♡
|