[بس مش انا]

بصى ياamal alamir
أولا الله يكون فى عونك على اللى انتى فيه انا حاسس بيكى انك بتفكرى فى حلم حياتك وازاى تفرحى أهلك فى البيت وان ما فيش وقت ومش عارفة تعملى ايه وحاسه انك تايهه وكل اللى بتعمليه انك تعيطى

ثانيا من كلامك معناه انك طيبة جدا ودايما بتفضلى غيرك على نفسك ومش بتعرفى تقولى لأ وبتساعدى كل الناس ومش فى حد بيساعدك ومن كتر طيبتك بيفكروا انك (خبيثة وبتدارى على مذاكرتك) وماحدش حاسس بيكى
وبرضوا معناه انك ذكية ومخك نضيف بس فى إكتئاب واعراضه:
كسل وخمول
عدم وضوح الرؤية والهدف
قلة العزيمة والإرادة
عدم الرغبة فى أى مجهود
مع إن من جواكى بتتقطعى ونفسك تذاكرى وتقعدى على الكتاب
لكن انتى نشيطة فى أى حاجة ماعدا المذاكرة وده غصب عنك
وللأسف انتى سريعة الزعل من أقل كلمة (مرهفة الحس) ودى مشكلة بتفضلى الموود على المجهود يعنى علشان تعملى حاجة لازم تكونى مقتنعة بيها ومزاجك رايق...
طيب دى المشكلة .... ايه هو الحل ؟
بكل بساطة ومن غير تعقيد ومن غير كلام فلسفى
الأول : انا متأكد انك زى أسد بيستريح من معركة كبيرة لكن لو فاق ماحدش يقدر يقف أدامه
ثانياً: لازم تبعدى عن وهم حاجة اسمها الثقة بالنفس
مافيش حاجة اسمها أنا ماعنديش ثقة بنفسى الثقة تكون بربنا بس
ثالثاً: انتى محتاجة حد جنبك يهتم بيكى ويشجعك على طول وللأسف مش لاقيه الحد ده وده يمكن علشان مش بتحبى حد يعرف عنك حاجة ومش لاقية حد يحترم نفسيتك وقدراتك ويكون أعلى من مستوى تفكيرك حد مثل أعلى
لكن ده وقت انك تقومى تقفى على رجليكى وترفعى عينك للسما بشموخ وانتى بتنفضى هدومك من التراب وبتقولى يارب أنا راجعة ساعدنى والناس كلها بتسقفلك وتنادى عليكى
فرحانين بيكى بيفكروكى بمجدك الشخصى وانتصاراتك أيام زمان
السباق لسه مخلصش وخط النهاية لسه ماحدش وصله ماتقفيش سابقى
سيبى كل حاجة ورا ضهرك اجرى ارفعى راسك وحطى عينك على خط النهاية وان شاء الله هتوصلى وهتفوزى
المهم مهما وقعتى قومى واقفى وقولى بأعلى صوتك أنا البطلة أنا اللى هافوز ان شاء الله
ماتخافيش ماتبصيش وراكى حفزى نفسك قومى تانى وتالت ومليون الدنيا لسه مانتهتش وانتى مش ضعيفة وافتكرى لو خاتم ماس وقع فى التراب مابيفقدش قيمته لكن مابيتعرفش الا لما التراب يتشال من عليه
قومى وقولى يارب انت سندى وعليك توكلى وماليش غيرك يارب ماتسبنيش يارب يارب
وابدأى مرة واتنين وتلاتة ومليون وماتقفيش مهما حصل
وان شاء الله أنا معاكى لحد النتيجة كل يوم ,كل لحظة بس ابدأى
قومى رتبى نفسك من الأول وجديد مش الثانوية اللى هاتهزمك مش الثانوية اللى هاتقضى عليكى بالعكس انتى اللى هتديها القاضية
وافتكرى أهم حاجة توفيق ربنا مش المذاكرة والله واسألينى أنا وخلى مامتك تدعيلك

وبالتوفيق