محمد الجمل يكتب: أساليب رخيصة بيتحدد بيها مصير بلد !!!
للأسف كتيير من الشعب المصرى ضحية نظام كان دايس عليه كويس أوى .. نظام ضرب بلد فى مقـتـل .. التعليم .. تضرب التعليم يعنى عملت شعب بلا وعى .. أغلب الشعب تقدر تضحك عليه بأساليب معروفة واُستخدمت فيه قبل كده كتيييير .. بس بتعجبه وبيروحلها وبيقتنع بيها وبيمشى وراها زى المسحوور .. “ عايز احكم مصر” !! بسيطة.
همسك عالشعب ذلة .. وهقنعه انى صاحب فضل عليه وإن هو مُدان ليا بأى حاجة حتى بروحه .. وهملى الميادين بصورى وأنا ببص عالزرع وعامل فيها عمييق وفى الخلفية علم مصر .. هنتشر عالقنوات وهزرع رجالى فى كل قناة عايزة تاكل عيش وتبقي من المقربين .
وطبعا أغلبهم من النوعية دى !! مذيعين ومذيعات يشرشحولنا عالتليفزيون ويستضيفوا ناس على مزاجهم .. فنانين وفنانات يطلعوا يقنعوا الشعب .. أغنية ترقصوا عليها وتشغلوها فى أفراحكم وفى العربيات وجسمكم يقشعر لما تسمعوها ..
وأحدث صيحات التثبيت الرئاسى “التسبييل” .
أنا حنين وبحبكوا يا جماعة .. وتتفاجئ ان كل الهرى ده بيجيب نتيجة مع الناس !! يعنى أنا اسمع أغنية انتخب رئيس بلد ؟!
ممثل يكلمنى وهو قافش وبيشخط وعنيه مليانة شجن وحب للوطن اقتنع أنا مثلآ ؟!!
مذيع يعمل شو كويس ويجيب حد جمبه يقوله كلامك عظييم على كام زغروطة فى كام مداخلة نقوم نصدق احنا !!!!! طب واصلا المعايير الأساسية الى هنسلم على اساسها البلد للراجل ده ما أخدناش بالنا منها ؟! برنامجه الإنتخابى .. تاريخه ومواقفه فى حياته مثلاً السيرة الذاتية بتاعته يعنى .
كل ده مالوش اعتبار !! ده انتوا ناس عاملين ثورة والمفروض تتنكوا على اللى هيمسك البلد مش تجروا وراه بتلهثوا وتفخموا فيه من قبل حتى مايمسك البلد .. مش عيب عليكوا بجد ؟! للأسف ممكن يكون الشخص ده نفسه كويس وممكن يقلب علينا المواجع وحكم مبارك الأسود .. بس الطريقة نفسها فيها استهانة بالشعب وبقيمته .. وللأسف مافيش فرعون بيتفرعن غير بالعبيد .
الكلام عام مش على حد معين ومش معمم الكلام خوف من حد لكن بجد دى طريقة ممكن أى حد يعملها مع شعب سطحى مشاعره الساذجة هى اللى سايقاه .. سلامو عليكوا .
http://yanair.net/archives/54094