بسم الله الرحمن الرحيم
اسمح لي اتكلم و اطول شويه
بص انا قصتي دي بدأت من أكتر من 4 سنين , انا حبيت واحد جارنا من كل قلبي , و اتعلقت بيه اوي بطريقه محدش يقدر يتخيلها , اخويا يبقى صاحبه اوي يعني , المهم انا كتمت الحب ده جوايا كتير اوي , و اتعذبت بيه كتير اوي , و الحب ده الحمد لله مش عطلني لا عن دراستي ولا عن شغلي , بالعكس الحب ده كان بيحفزني للمذاكره و للشغل , بحس دايماً باللي بحبه ده و هو معايا او مش معايا , المهم وصلت لدرجة اني مش بقيت قادره اكتم جوايا اكتر من كده , فرحت -بكل غباء- و صارحته بمشاعري دي , فقالي ان اخويا صاحبه و هو مش يقدر يخون صاحبه , مش فهمت هو قصده ايه , يعني هو الحب ده من طرف واحد ولا هو كمان بيحبني بس مش عايز يخون اخويا و صاحبه !! , انهرت بعدها اوي اوي و دخلت المستشفى و اهملت في نفسي اوي , فواحده صاحبتي من اللي بيكلموا ولاد و كده راحت و كلمته و عملت نفسها هي اللي بتحبه قالها انا بحب واحده و مش راح اقدر اقولك مين دي , مع العلم انه هو عارف انها صاحبتي , لإنها كلمته من رقم موبايلي و قالت لي اني معاها
هتقولي طب المشكله فين يعني؟
المشكله اني بجد متعلقه بيه اوي , و دايماً بتمنى انه يكون معايا و نعيش مع بعض باقي عمرنا , انا مش عارفه انساه و مش متصوره حياتي من غيره , و مش عارفه هو بيحبني ولا لأ , انا مش عايزه اروح اكلمه تاني , لاني بجد عارفه اني اغضبت ربنا بكده , و انا كان نفسي الحب الجميل ده يكمل بس للأسف بيس كل مايتمناه المرء يدركه , انا حاسه اني حكايتي معاه دي هتنتهي بالموت .. مش قادره بجد , انا حاسه اني بموت من غيره في اليوم ألف مره , و هو عمره ما حس بيا ولا هيحس بيا , انا فقدت الأمل في الحب ده , و انا مش عارفه ازاي افقد الأمل و انا اللي شغلتي اني احيي الأمل في قلوب الناس , لإني بشتغل في مجال مكافحة المخدرات مع عمرو خالد (حملة حمايه - حماة المستقبل) , بحاول عشان انساه اني بكتر من شغلي , و بروح احضر دروس في المساجد و مشتركه في انشطه رياضيه , بس برضو مش عارفه انساه , تفتكر اعمل ايه , انا بشتاق له بطريقه غريبه اوي , بستغرب منها انا ساعات ! , انا عايزه انساه لإنه مش ليا , صعب احب واحد مش ليا و المشكله اني عارفه كده و مستمره في حبي ليه , و حبي ليه بيزيد يوم بعد التاني
انا حاسه اني في دوامه و محتاجه اي حد يساعدني و بسرعه , انا حاسه ان الموت اقرب لي منه .. !!!