أنا عملت ده فى بوست لوحده عشان ده مهم جداً جداً
3-وقتك من ذهب
أحنا اتفقنا أن أنت غير أى حد وبالتالى وقتك غير وقت أى حدّ
بمعنى
خليك بخيل بوقتك لأقصى درجة ممكنة يعنى ما فيش تضييع وقت
ما فيش قعدات رجالة لأ خلاص أنت مش فاضى
ولا تليفزيون ولا نت إلا بمواعيد معينة تحطها لنفسك
يا أخى خليك مشغول فى حاجة مهمة ولو مرة فى حياتك
هاتعيش برنس كده طول عمرك
خلى شعارك زيى النبى صلى الله عليه وسلم لما
أُمر بالدعوة وقالت له السيدة خديجة
يا رسول الله أفلا تنام
فقال لها
مضى زمن النوم يا خديجة
تعرف تبقى بالهمة دى كده
طيب نتكلم عن حبة نصايح جميلة أوى تفيدك فى موضوع تنظيم الوقت
أولاً
إذا لم تكن لك خطة واضحة كنت جزء من خطط الاخرين
حد فاهم حاجة
يعنى ببساطة كده لو أنت مش مخطط ليومك ازاى يمشى وحاطط لكل حاجة وقتها
هتلاقى وقتك بيتسرق منك
واحد خدك فى مشوار ما أنتاش عارف ليه
رغم انك مش فاضى
أو واحد فاضى مش وراه حاجة خرجّك معاه وضيع وقتك وأنت مزنوق
أصلا
من الاخر هتبقى زبون جامد أوى
أى حد عاوزك فى أى وقت وأى حاجة هيلاقيك فاضى لأنك مش مخطط ليومك
أوعى حد يفهم من كده
أنك ما تساعدش حد وخليك أنانى
لأ مش ده قصدى اخدم وساعد الناس وكل حاجة بس تكون حاطط ده فى جدولك
وعندك أولويات
وعارف أنت بتعمل ايه مش سايب الأمور تمشى بظروفها كده
يعنى واحد صاحبى فى تجارة مثلا عاوزنى اخرج معاه
وانا هسقط السنة يبقى طبعا اعتذر له
واروح ذاكر
وابقوا اشبعوا من بعض فى الاجازة
ثانياً
استغل الأوقات البينية
لو بصيت على يومك هتلاقى ضايع منه جزأ كبير أوى فى حاجات مالهاش لزمة
زيى ساعتين مواصلات
ومش عارف ساعة قاعد مستنى الغدا
وساعة قاعد ما باعملش حاجة
ونصف ساعة رغى فى التليفون
وساعة مع صحابى بعد الصلاة واقفين بنحكى
أو قاعد فاضى لأن محاضرة اتلغت
كل الأوقات دى لو جمعتها واستغليتها صح
هتلاقى عمر جديد اتضاف لعمرك تنجز فيه حاجات كتير
طب استغل الأوقات دى ازاى
خد معاك محاضرات من المتأخر عليك اقرأها فى المواصلات مثلاً
عارف مش مذاكرة بس قراءة كده بتركيز عشان تدخلك فى الموضوع
ولما تروح تعرف تذاكرها أسهل كتير
أو ممكن تستغل محاضرة فاضية أو فى البريك حد يشرح لك اللى فايتك
أو تسأل معيد وهكذا
تذكر
أنت مش زيى أى حدّ ووقتك ضيق جداً فلازم تتصرف وتخلق لنفسك وقت تذاكر فيه
زيادة عن الناس كلها
واحد بيقوللى ده مستحيل أنا كده هحس أنى عامل زيى الماكينة
أولا
أنت اللى جيبته لنفسك فما تعترضش واشتغل من سكات
ثانيا
لو استغليت وقتك كويس هتلاقى وقت ترفه عن نفسك وتعمل اللى نفسك فيه رغم
كونك مزنوق بس أنت جرب
ثالثاً
غيرك عرف وانت مش أقل منهم
هاحكيلكم عن واحد صاحبى كان معقدنى فى موضوع الوقت ده
ده واحد اتخرج من قسم اتصالات من سنتين كده
اسمه أحمد الشوربجى
الراجل ده كان مندوب دفعة 3 اتصالات ومن المواقف الطريفة
أن الدفعة اختارته الطالب المثالى
والعميد سمير شاهين كان بيكرمه عشان هو الطالب المثالى وفى نفس الوقت كان
حارمه من دخول امتحان عشان تيار اسلامى وكده
يعنى بيكرمه مرة وبيعاقبه مرة
المهم أحمد ده كان مشكلة بكل المقاييس
ليه
1
كان طالب فى اتصالات قسم المذاكرة واتخرج جيد جداً مع مرتبة الشرف
رغم كونه
2
شايل شغل فى أسرة المنار للصبح وكل يوم كان يروح بالليل من الكلية
3
كان أصلا مش حابب يخش هندسة لانه بيحب التجارة فكان عامل مشاريع وهو طالب
ومنهم مشروع مزرعة فراخ
وخسر جامد لما حصل موضوع انفلونزا الطيور خسر فيه فى حدود
18000 جنيه
4
ده غير انه كان مندوب دفعته
أنا كنت باتعقد منه واقوله يا أحمد مش لاقى وقت فيقوللى
استغل الاوقات البينية ويقوللى مثلا أنه هو قرب يختم سلسلة كتب
فى ظلال القران
اللى هم قرب 4000 صفحة
ما بين الاذان والاقامة يوميا بيقرأ حبة من الكتاب
وكان يتفق مع ناس على مواعيد
الساعة
مثلا
3:23
بالدقايق
لأ والأدهى من كده اصبروا بس
يقوللى استغل وقت المواصلات واقرأ الورد القرآنى بتاعك فى المواصلات
اقوله لأ ده مستحيل لأنى ببقى تعبان
ومش مركز ثم ببقى واقف وزحمة وحر وقرف
تخيلوا قاللى ايه
قاللى بتبقى واقف كده ورافع ايدك لفوق وماسك فى حاجة فى المواصلات صح
قلتله اه
قاللى خلاص شدّ جسمك وأنت واقف ومرن عضلاتك وبكده
تبقى عملت الورد الرياضى بتاع يومك
أنا ذهلت وبصيت له كده
وقلتله أنت أكيد بتهزر صح
والله حسسنى أنى ولا حاجة فعلاً هو مش حسسنى ده هى دى الحقيقة
اهدى بس أنا مش باقولك ابقى زيه
بس حاول تبقى بعض منه على قد ما تقدر