[LA STELLA]

المشاركة الأصلية كتبت بواسطة pooh2006

عايزة اعرف الاسئلة اللي بتيجي في اختبار القدرات بتاع فنون تطبيقية

هو بيسألك فى 3 حاجات
اولا : المنظور الهندسى
ثانيا : المنظور الحر
ثالثا : التصميم الابتكارى

المنظور الهندسى مثلا يقول لك صمم تلاجة او غسالة او بوتاجاز او سرير فردى او سرير لفردين او كرسى فوتيه او دولاب ملابس او مكتب او مكتبة كتب او ترابيزة اكل مثلااو غسالة اوتوماتيك

اما المنظور الحر
فدا بقى ممنوع فيه استخدام المسطرة خالص خالص وبنعمل تكوينات هندسية من اسطوانات ومكعبات واهرام ومخاريط او هرم ناقص او مخروط ناقص ومناشير وخلافه
ولما بتيجى عند التظليل ،، له اسس طبعا فى الحتة دى غير اللى خدتيه فى عمارة فنون جميلة نوعا ما
من اول لما تقرر تظلل
تشيل الاستيكة وما شابهها لا بايدك ولا حتى بمناديل ولا اى حاجة اطلاقا،، ممنوعة فعلا

بعدين التصميم الابتكارى
حاجة لازم نعرفها انواع الزخارف واشكالها ومينفعش مثلا ندخل زخارف فرعونية على زخارف اسلامية على زخارف شعبية مثلا
ممكن ييجى يقول لك ،، اعمل تصميم لسجادة
او لستارة - ملصق اعلانى - غف كتاب- لوجو او شعار - ميدالية - علبة عصير - شهادة تقدير

ودا بقى النوعية الوحيدة اللى ممكن تستخدمى فيها الالوان ،، لا دا لازم اصلا فيها الالوان ، وخشب كمان

دول ال3 حاجات اللى بيطلبهم منك فى الامتحان واديتك فكرة شاملة كاملة عنها زى ما اخدنا فى الكورس تمام

بالتوفيق ان شاء الله


ملاحظة مبشرة جدا : الدكتور قال لى انهاردة ان نسبة اللى بيجيبوا "غير لائق" فى اختبار الفنون التطبيقية لا تتعدى ال3% كل عام غالبا