[sayed badr]

المشاركة الأصلية كتبت بواسطة lally adel

بصو يا شباب عشان نقطة التزام المدرس بكتاب المدرسة دى ملخبطاكو شوية ..
انا بقولوكو كدة ليه ؟؟؟!!!
عشان انا ف تانية ثانوى كنت باخد مع مدرس .. هو يعتبر صغير عنده بتاع 40 سنة كدة و لا حاجة .. ف كل الناس قعدت تقولى بلاش و خليكي مع المدرس اللى عنده خيرة .. دة فلان بقاله 40 سنة ف التدريس يعنى قبل ما مدرسك ده يتولد و مش عارف ايه .. كلام كدة كتير .. بس انا صممت اخد معاه عشان كان بيدينى ف المدرسة فاولى ثانوى و كنت مرتاحة جدااا معاه ..
طبعا تانية ثانوى بالنسبة لى كانت اول مرة اخد دروس و اول مرة مدرس هو اللى يشغلنى و هو اللى يقولى اعملى و سوى .. انا طول عمرى انا اللى بحدد لنفسي ايه اللى يتعمل و ايه اللى مايتعملش .. ف النقطة دى كانت عاملالى ازمة شوية ..
المهم لما اخدت معاه اول كام فصل كيميا اللى انت درستوهم السنة اللى فاتت زى ما انتو عارفين كلهم نظرى و دش ممل و رخخخم جداااااا .. و تاريخ الذرة و مين اكتشف ايه و مين عمل ايه .. ف انا بقى كنت بذاكره باسلوبى .. و لما جه يعملى امتحان على الفصل الاول تقريبا اللى هو كله رغى ده نقصنى فيه بتاع 5 او 6 درجات على النظرى بس ..
طبعا انا جاتلى صدمة عصبيه .. انه ليه كل دة يعنى ... كانت واحدة من الجمل اللى مش هنساها عمرى .. لما كنت كاتبة " لان الكوانتم غير قابل للتجزئة " .. قام عاملى عليها غلط .. قلتله ليه كدة .. قالى افتحى الكتاب كدة .. فتحته و شاورلى على الاجابة اللى هى كانت " لان الكوانتم لا يتجزأ " .. قلتله طب فرقت ايه قالى فرقت ان ده كلام كتاب المدرسة .. لكن دة كلام علياء عادل
انا كنت هتشل اول ما عمل معايا كدة و على مدار اول 3 فصول كنت بنقص ف امتحاناته بالهبل بسبب الحاجات دى .. لحد ما الدنيا بدات تحلو شوية من الفصل 4 عشان كان فيه معادلات و كدة ..
لدرجة انه هو بقى يعملى امتحان نظرى و مابقاش يعملى امتحان معادلات زى ما كان بيعمل لباقى المجموعات من بعد نهاية الفصل 5 عشان بيكون كم المعادلات كبير زى ما انتو عارفين
المهم ان انا جيت ف اخر السنة لامة المادة جداااا .. دة رقم واحد .. بكتب باسلوب كتاب المدرسة بمنتهى السهولة .. لانى ماتدربتش على انى اكتب باى طريقة تانية من اول السنة ..و الدنيا كانت زى الفل الحمدلله .. بفضل ربنا ثم فضل المستر دة ..لانه كان بيتابع معايا من امتحان لامتحان .. مثلا ايوة كدة التعليلات اتظبطت .. لا اتكى على تعريفات الفصل ده .. لا اظبطيلي مقارنات الجزء دة .. ف كان مريحنى جدااااا ..و بفضل ربنا جبت 50 ف الكيميا بالرغم ان امتحانا كان واحد من عجائب الدنيا السبعه .. الحمد لله

على النقيض بقى الفيزيا السنة اللى بعدها .. اخدت مع مدرس برضه كان بيدينى ف الفصل ف اولى ثانوى .. و دة بقى عنده بتاع 58 سنة.. يعنى كلها سنتين و لا حاجة و يطلع معاش .. و بقاله سنين طويييلة ف التدريس و كل الكلام الحلو دة .. طلع عينى و الله يا جمااعه .. لانه و لا كان ملتزم بكتاب المدرسة ف شرحه و لا ف ملزمته .. و انا كنت زى الهبله بذاكر من الملزمة لان كتاب المدرسة هو كان واخده منى و مرجعهوليش غير على شهر 3 باين .. اول ما جابهولى بقى و ابتديت اعمل اللى بقولوكو عليه ده ف انى اقارن كلام الملزمة بكلام كتاب المدرسة .. لانى كنت قلقانة من كلام ملزمته عشان كنت ساعات بلاقى اسئلة ف كتاب الامتحان على معلومات هو مش جااااايب سيرتها ف الملزمة من بعيد و لا من قريب .. و لما كنت اسأله .. كان يقولى دة كتاب الامتحان بيزودحاجات من عنده سيبك منه .. اول ما جبتكتاب المدرسة بقى و بدات اقارن جاتلى صدمة عصبيه .. على كم المعلومات اللى انا حافظاها بشكل غير الموجود ف كتاب المدرسة .. و كم المعلومات اللى هو ملمحلهاش حتى ف ملزمته .. هى اه حاجات صغيرة عشان الامانه .. مش حاجات كبيرة يعنى .. بس موضع اسئلة من نوعيه " اختار .. اذكر وظيفه " و الكلام ده .. بقيت ف فترة المراجعه دى عاملة زى ما اكون بذاكر من اول و جدييييييد .. قعدت حوالى شهرين بس اراجع فيزيا .. او يمكن قولو بذاكر فيزيا من اول و جديد .. اللى هو الوقت اللى انا المفروض كنت اقعد اخلص فيه امتحانات الثانوية العامة .. بس كنت كل ما افتح امتحان اقعد اعيط لما اقارن اجاباتى باجابات النموذج الرسمى بتاع الوزارة .. طبعا المستر دة و لا كان متابع حلى .. و لا بيشوف انا بحل ايه و لا مابحلش ايه .. و لا عمره قالى هاتى كدة وريني اسلوب كتابتك للاجابات .. ف كان محملنى حمل زياده اللى هو ان اناادور بنفسي ايه هى الطريقة الصح للاجابه .. طب اكتب ازاى طب اعمل ايه و الكلام ده كله .. كنت شايلة همه فوق حمل المذاكرة .. و كانت النتيجة انى جبت ف الفيزيا 49

عشان كدة انا عماله انبهكو للنقطة دى اووووووى عشان ماتغلطوش غلطتى دى .. لانى لو رجع بيا الزمن استحاااالى اخد معاه تانى

انا رغاية اووووى انا عارفة .. انا بس حبيت اوضحلكو اهمية النقطة دى عشان تخلو بالكو منها

ربنا معاكو

نفس مشكلتى من دلوقت ان المدرس بيدينا ملزمة الشرح عبارة عن س و جـ من امتحانات الثانوية العامة اللى فاتت بس بنموذج اجابته هو مش كتاب المدرسة فانا بدأت اذاكر من كتاب المدرسة بس والمذاكرة اما احب احل اسئلة ثانوية عامة سابقه بس بحلها بأسلوب كتاب المدرسة وعامل كتاب ااالامتحان للحل بس اه بيبقى فى معلومات فى كتاب الامتحان مش فى كتاب المدرسة اصلا بخدها ع انها معلومة عامة كدة استطلاع مش اكتر