[عاشق الأقمار]

شرعي أيوه واحترمنا الصندوق ورأي قضاء مصر الشامخ لما قالوا النتيجة فوز المرشح محمد مرسي العياط بنسبة أصوات أكتر من المرشح الآخر وسكتنا وقلنا الله يعينه على التركة التقيلة والبلد اللي وقع اقتصادها ومؤسساتها قبل ماييجي وفترة رئاسة 4 سنين على العين والراس معاه للآخر ونشوف لكن اول الغيث كدبة المائة يوم حصل فيهم ايه؟ دستور صنع بليل بعد انسحاب معظم أعضاء اللجنة انطبخ بالشكل ده ازاى؟ ومستشارى الرئيس هربوا او انسحبوا او استقالوا وتركوا الشرعي يشرع مع جماعته ما كلفش خطره حتى يرجعهم أو يجيب نفس العدد بدل اللي انسحب ليه؟ اهانة في القضاء هو هو اللي جابه لسدة الحكم بعد إشراف على الانتخابات البرلمانية والرئاسية وماسمعناش وقتها من بنى آدم واحد جملة تطهير القضاء ولا سمعنا ان الضاء المصرى فاسد والنائب العام يقال بأي حق يا شرعي؟ والغاز مش موجود ولما رجع بالسلامة سعره زاد واتكتمنا قلنا اخواننا في اسرائيل برضو ليهم نصيب فى الغاز بتاعنا حسب العقود المبرمة ومفيش داعي نعطل الشرعى كل شوية بس سعره زاد ليه لما هو موجود ومتوفر وبيكفينا وزيادة؟وبعد كده الكهرباء انقطعت عننا وعن ولادنا ومذاكرتهم علشان الأحمال ووقت الذروة والحر والهجص ده وقلنا برضو مش مهم المهم سيادته ما يزعلش مع العلم ان الكهربا لم تقطع في بيوتنا من يوم 30 يونيو حتى الآن ياترى ليه؟ وبنزين وسولار طوابير لمسافة 2 كيلو متر واخواننا يقولوا اصل اصحاب محطات البنزين بيرموا البنزين في الترع والمصارف وبرضو هو شرعى على راسنا من فوق طيب حد يقول لي النهارده انا عديت في طريقى على 4 محطات بنزين بعد الشرعى ما اختفى من الساحة السياسية والحمد لله كل محطة شفت فيها عدد من السيارات لا يتجاوز 6 او 7 بس ياترى الامارات لحقت تبعت البنزين بالسرعة دي لمصر؟ محدش مننا اعطى لسيادته شيك على بياض يحكمنا ويتحكم ويغلى الاسعار ويفرض ضريبة دخل على المعلمين اللي مرتبهم زاد عن كذا جنيه مع العلم ان الحارس الواحد بتاع سيادته في القصر الجمهورى مرتبه يفوق مرتب اي معلم فيكي يا مصر بمراحل وقلنا زي بعضه علشان الشرعى عايز كده، لكن ييجي الشرعى فى الاستاد يؤمن على دعاء واحد اسمه محمد عبدالمقصود كان بيدعى على القوم الكافرين المعارضين للشرعى ويطلع بعد كده الشرعى في خطاب اطول من مسرحيات عادل امام ما فهمتش منه جملة واحدة مفيدة واخواننا كل شوية تصفيق منقطع النظير للشرعي ................ الحمد لله أنى عشت وشاركت مع الشعب اللي هو مش شرعى في التحرير والاتحادية والمحافظاات كلها وامام الحرس الجمهورى وعزلنا الشرعى حتى نجئ برئيس قائد لكل المصرين لايؤمن على دعاء من يعتبرنا كفرة وفينا من هو أحفظ للقرآن وأقرأ له من الشرعى الذي أسقط عن نفسه صفة شرعى من أول 100 يوم ولا حول ولا قوة الا بالله................... عاشت مصر لأبنائها وبأبنائها فى عزة وكرامة