[عبد المقصود مصطفى]

المشاركة الأصلية كتبت بواسطة asmaa232

بالنسبة للحاجات اللى انا شيفاها أكيد تساعدكوا فى موضوع المزاكرة

أول حاجة لو كنت عايز ربنا يرزقك بمجموع حلو وتركيز فى المزاكرة وتفوق دا كله مش هييجى غير بإنك تكون قريب من ربنا جدا ..
بما يشمل (( الصلاة ثم الصلاة ثم الصلاة ))
وتبر والديك كل شوية تقولهم ادعولى صدقونى دعوة الوالدين بتكون مستجابة جدا احرص على ارضائهم فى كل شئ

تانى حاجة اختار صحابك كويس اوى أوى يعنى لو عايز تتفوق متروحش تمشى مع واحد المزاكرة مش ف دماغه أصلا لازم تختار الناس الكويسة اللى تشجعك ع المزاكرة والصلاة

وإيااااكم والخباثة إوعى تكدب على حد وتقوله انا لسا مزاكرتش أو مش بعرف ازاكر .. وتأكد ان مفيش حاجة تستاهل انك تكدب ودا مش هيخليك تتقدم على صاحبك اللى بتخابث عليه !!

بعد كدا المدرسين اختار مدرسين كويسين واسأل الناس الاكبر منك اللى دخلوا كليات قمة هيقلولك على احسن المدرسين روح عندهم واختار لمدرس اللى بيحل كتير فى اى مادة

لازم تعرف ان الحل مهم جدا جدا أهم من المزاكرة نفسها..

ومتروحش درسين فى اى مادة بلاش تشتت نفسك ع الفاضى

حاول تجيب اكتر من كتاب خارجى فى كل مادة "" خاص لسنة تالتة ""

مثلا العربى عندك الأضواء او الامتحان فى سنة تانية اختار واحد بس عشان تلحق تحل حاجة
الإنجليزى عندك توب ستيودنت وسربرايز وذا بست
الفرنساوى ممكن ملزمة الدرس وعندك برافو انا مجربتهوش بس بيقولوا انو كويس
الرياضة المعاصر ممتاز فيها هى والميكانيكا
الأحياء الامتحان وفى كتاب اسمه الفائز دا مستواه اعلى شوية
الكيميا الامتحان بردو ومندليف دا تحفة مستواه بردو عالى شويتين
الفيزيا الامتحان وفيه الوسام دا جامد جدا

أوقات المزاكرة زى ما قولت قبل كدا صلى الفجر وابدا زاكر دا وقت كويس جدا جدا
وقبل المغرب

ولازم تزاكر اول بأول ولازم تفهم الحاجة على اصولها لان المواد المنتهية دى هتكملها فى سنة تالتة يعنى هتكون السنة دى هى الاساس لسنة تالتة .. متاجلش حاجة لان السنة قصيرة أصلا

وفى الأخر بقولكوا مش لازم تحرصوا ع المجموع قد ما لازم تحرصوا على غنها تكون تجربة لسنة تالتة وتفهموا كويس اوى


انا كلامى مش مترتب شوية بس دا اللى جه فى بالى
ولما يجى ف دماغى حاجة تانية هدخل واكتبهالكوا علطول

والله المستعان

بجد شكرا ويا ريت علطول نستفاد منكم