[rana rory]

المشاركة الأصلية كتبت بواسطة Yes We Can

تنبيـه : مش انـا اللى كـاتب الكلام ده .. عشان انـا ادبـى

بس لقيـت ممكـن تكون مفيده ليكـم

بالتوفيق . . .

نبدأ . .





الفيزياء

أولا لو مش هاتعرف تاخد دروس فى بقيه المواد لظروف عندك حاول انك تاخد درس فى الفيزياء
الفيزياء الدرس فيها مهم وهتلاحظه بعدين

الفيزياء بيسموها فزاعه الثانويه العامه
وكونك تسمع ان عندك الفيزياء 15 فصل فى خمس أبواب
ولما تمسك الباب الأول الى فى المذكره الأولى والأستاذ يقولك دا لسه أربع مذكرات زى دى
هاتخاف منها
لكنى بصراحه كنت بحبها أكتر من الكيميا مش عارف ليه
الفيزيا ماده من خمسين يمكن كتير يقولك أصعب ماده تقفل فيها الخمسين
لكن صدقنى لو ذاكرتها من الأول هاتقفل الخمسين وادى وقت أكبر لمذاكره الفيزيا عن أى وقت تانى لأى ماده تانيه
لأن الفيزيا طويله ومافيهاش توقعات كتير يعنى أبدأ مع مدرسك فى الدرس
أول بأول وراجع معاه وحاول تخلص كل جزأ هوا بيخلصه وانت فى الأخر أقسملك بالله
هاتستريح جدا فيها
وهاترجعها بكل سهوله
فاكر لما قلت فى النصائح الأولى ان لو الفرصه رجعت ليا كنت هاعمل ايه
وقلت كنت هذاكر طول السنه من مذكره واحده للشرح ومذكره واحده للمراجعه وواحده للامتحانات
طبعا أنا أقصد لكل المواد
لكن فى نفس الوقت كان السبب هوا ماده الفيزياء فعشان ماده الفيزيا طويله وماده عايزه فهم مش حفظ
انت هاتحس بقيمه الكلام دا فى الأخر ان شاء الله لما تذاكر من مذكره واحده لكن تكون مذكره تعرض الموضوع بطريقه سهله وكمان تكون بتحتوى على كل الى انت محتاجه سواء بقى مذكره الأستاذ فى الدرس أو مذكره من المذكرات الى هنا
وأنا برشحلك مذكره أوميجا وأنا جايبهالك هنا
فلما تذاكر من مذكره واحده طول السنه هاتلاقى ان المدرس بيراجع كتير فلما تخلصوا الفصل الأول أو الباب الأول يقولك هانراجع عليه فتقراه من المذكره تانى حتى لو كانت أول مره حاسس انها صعبه
والتانيه بتكون سهله وهكذا لحد ماهتوصل لمرحله صدقنى هاتحس فيها انك واكل الكتاب والمذكره كلها وحافظها كويس بعد الفهم
ودا عشان
فى الامتحان لما يجيلك السؤال وتيجى تجاوب عليه لازم تفتكر أولا هوا فى أى باب يعنى مثلا هوا فى الكهربيه ولا الحديثه ولا الباب الأول ولا أى باب ولما تحدد الباب تلغى الأبواب التانيه من عقلك فى السؤال دا
وتبدأ تدور فى مذكره الباب الأول الى انت مذاكر منها وبردو تحدد فى الباب دا السؤال دا بينتمى لأى جزه فيه
فتعرف مكانه فى المذكره وهتلاقى عقلك بيجيب الحل من المذكره
دا لو انت نسيت حبه الى انت مذاكره أو نسيت اجابه السؤال فاتخرج الاجابه بالطريقه دى
لكنك ان شاء الله هاتجاوب عليه من أول مره
يمكن حد من الى بيقرأ يقول ياعم هوا أنا إيه عشان أعمل كدا إنت محسسنى إنى سوبر مان علشان تقولى واكل الكتاب أكل..
صدقنى انت هاتقول كدا كتير فى أول السنه لكن لو معملتش كدا هاتحس بالندم فى أخر السنه وهاتحس ان دا هوا الأصح ليك والى كان المفروض انك تعمله
ولو عملت كدا ان شاء الله فى الأخر هاتعمل زى ما أنا بقولك كدا
لأنى وربنا هوا دا الى أنا كنت بغلط فيه وهوا الى أنا كنت بحس بيه فعلا لما بذاكر أى جزء بالطريقه دى
الفيزيا سهله لو انت عايزها سهله وصعبه لو انت متكدر منها فخدها على انها ماده سهله وبسيطه
ومراجعتها من الأول هايفيدك جدا





الباب الأول

هوا 3 فصول الموجه والصوت والضوء وتطبيقات
اعرف ان فى الامتحان لازم يجيبلك منه أسئله فالامتحان بيكون متقسم بحيث ان كل فصل يجى منه حاجه فى الامتحان يعنى عشان يكون الامتحان شامل المنهج
وهوا باب أكتر فيه تعريفات وكدا
اعرفها وافهمها وبعدين احفظها
وان شاء الله هتلاقيه سهل




الباب الثانى

الى هوا خواص الموائع المتحركه والساكنه
هوا باب ركز فيه حبه على المسائل الى فيه وبعض التجارب







الباب التالت

قوانين الغازات
وأنا لو وصفت الباب دا هاوصفه بباب التجارب فلو لاحظت انه فيه تجارب تقريبا أربعه زى معامل التمدد الحجمى وجهاز وجولى وكدا
فعشان كدا انت تذاكر كويس جدا التجارب دى لأنه فى الامتحان بيجيب واحده منها وبيعتبرها سؤال للطالب الفوق متوسط أو المتفوق وبيكون جزء كامل من سؤال غالبا عليه 3 درجات فانت حاول تضمنها بمعرفتك للتجارب دى وهيا تعتبر ثوابت عندك فى المنهج







الباب الرابع

وهوا الكهربيه
الكهربيه دا باب مهم وكبير هوا باب أكتر للفهم عنه الحفظ يمكن من الأول هاتلاحظ انه مليان قوانين وتعريفات فطريقه مذاكرته الأفضل من وجهه نظرى هيا انك تعرف القانون تفهمه وتحفظه ولو فهمته وحفظته تعرف تخرج منه كل الأسئله المتعلقه بيه من تعريفات ومسائل وأى حاجه
فمثلا قانون زى شده التيار الى هوا i = Q / T
بس مجرد إنك تفهم القانون دا i = Q / T تقدر وبكل سهوله تطلع منه إجابه لخمس أسئله ع الأقل
فكونك تعرف ان ال i هيا شده التيار وال Q هيا كميه الكهربيه وال T هوا الزمن
وان شده التيار بتقاس بالأمبير والكميه الكهربيه بالكولوم والزمن بالثانيه
تقدر من فهمك لدا انك تستخرج تعريف لشدت التيار
فتقول ان شدت التيار بتساوى كميه الكهربيه على الزمن
اذا شده التيار هى كميه الكهربيه التى تمر فى موصل خلال الثانيه الواحده
كمان تقدر تجيب تعريف للأمبير
فتقول ان الأمبير هوا وحده قياس لشدت التيار
اذا الأمبير هوا شدت التيار الكهربى
وترجع بقى لقانون شدت التيار الكهربى فتقول
ان الأمبير هوا شده التيار الكهربى الماره فى موصل عندما تمر فى موصل كميه من الكهربيه مقدارها 1 كولوم فى 1 ثانيه
نفس الكلام أقدر استخرج تعريف للكولوم
فتقول ان الكولوم وحده لقياس كميه الكهربيه
وهكذا لكل القوانين الى تقابلك ان شاء الله وبالطريقه دى ماتحاولشى انك تحفظ لكن حاول انك تفهم فالفهم هايساعدك على عدم النسيان وكمان هايساعدك على انك تكون مرن مع المسائل الى بتجيلك فى الامتحان مهما حاول واضع الامتحان انه يضحك عليك


كمان يمكن هايلفت انتباهك فى الباب دا أو الوحده دى قواعد تحديد الاتجاه زى البريمه اليمنى وفلمنج لليمنى واليسرى ولينز وأمبير لليد اليمنى كلها سهله ان شاء الله ولها طريقه فهم بردو مش حفظ طريقه سهله تخليك تجمعهم كلهم بسهوله وتعرف تعريفاتهم واستخدامهم
وفيه كمان أجهزه القياس زى الجلفانوميتر والأميتر والفولتميتر والأوميتر
اجمعهم فى جدول واعرف استخدامات كل منهم وطريقه التعديل والتوصيل مع الجلفانوميتر ومع الدائره وكدا






الباب الخامس

وهيا الفيزياء الحديثه
الباب بيحاول يقولك ان كل الى انت بتدسه فى الأول دا بيتسمى فيزياء كلاسيكيه أو قديمه يعنى
وفى فيزياء حديثه بتتعامل مع الالكترونيات والمستوى الذرى وكدا
يمكن الباب أربع فصول
أهم مافيهم التعليلات والتجارب والبوابات المنطقيه والليزر طبعا ودا مهم تقريبا الامتحان مش بيخلى منه
خليك مع مدرسك فى الشرح والمراجعه واهتم شيويه بالفيزيا وانت هاتحصل درجتها كلها ان شاء الله




المراجعات والامتحانات

المراجعه فى الفيزيا مهمه جدا والمراجعه للفيزيا ماينفعشى تكون اخر السنه بس المفروض انك بتراجع من أول السنه
أول بأول مع المدرس ومع الشرح سواء فى الدرس أو المدرسه ولكن نفترض انى خلصت الامتحان الى كان عليه الدور وبعده امتحان الفيزيا فهما هايدوك قبل الفيزيا مش أقل من 6 أيام نفترض انهم فعلا 6 أيام أولا خصص خمسه لمراجعه كل وحده فى يوم لوحده
ولكن مراجعه وحده فى يوم هتلاقيك ان شاء الله حافظها من مذاكرتك ليها
وتراجعها بردو من المذكره الى انت بتذاكر منها طول السنه
وتحاول تخلص فى اليوم بتاع كل وحده دا كل ما يتعلق بالوحده من شرح وتلخيصات وتعريفات وأسئله ومقارنات واستنتاجات
وكل دا الحمد لله موجود فى التحميلات فى المراجعه وبعد ماتخلص الخمس أيام للخمس وحدات اليومين التانين حل أكبر عدد من الامتحانات واحد يقولى هما يومين هايقضوا؟... أقله طبعا هايقضوا وهاتحل فيهم امتحانت كتيره جدا ان شاء الله لأنك فيها بتحل وانت عارف الاجابات مش لسه هاتعرف الأسئله وتشوف اجابتها وتحاول تتوقع وتقول الامتحان دا جاى أو لأ
لكنك ان شاء الله هتحل امتحانات كتير فى اليومين دول وبكل سهوله عشان تنام وتصبح يوم الامتحان وانت متطمن .


ربنــا يوفقنــا جميعـــا . . .

شكرا ع النصايح يا مارك والله انا ما خايفه غير من الفيزياء
انا بنام احلم بيها
شكرا مره تانيه