[To Be Is To Do]

أولا : شكرا لمارك على النصايح الجامده دى فعلا كلام سليم 100%

ثانيا : أخبار الرياضه معاكم إيه يا بتوع ثانوى
أعتقد إن الناس خلصت أغلب الفروع وأعتقد إللى ناقص هى الديناميكا و الفراغيه لأغلب الناس يعنى

طيب إيه الأخبار ... طبعا أسهل فرعين تكامل وجبر واستاتيكا نوعا ما كويسه
ممكن إللى يكون مغلس هى الديناميكا
بس على فكره الديناميكا مش حتبقى سهله غير لما تفنشوا المنهج خالص لغايه ما تأخدوا طاقه الوضع والحركه وكده يبقى باى باى ديناميكا وساعتها حتحسوا بمتعه الديناميكا فعلا

ثالثا : فيه حاجات مهمه كده كنت بعملها
_ الميكانيكا ( إستاتيكا + ديناميكا ) :: كتاب المدرسه ثم كتاب المدرسه ثم كتاب المدرسه ثم الدليل (( مهم جدا )) ثم الإمتحانات ثم ال 20 إن شاء الله

_ التفاضل والتكامل :: كتاب المدرسه ثم كتاب المدرسه ثم كتاب المدرسه ثم الدليل بس فيه ملاحظه : كتاب الدليل حلو فى النهايات والاشتقاق ومعادله المماس و العمودى والقيم العظمى والصغرى المحليه والمطلقه نيجى بقى لـ ( تطبيقات القيم العظمى والصغرى المحليه والمعدلات الزمنيه المرتبطه ) دول فى كتاب الدليل مسائلهم صعبه جدا يعنى او تحس انها مفتلعه زياده عن اللزوم (( نظام تعقيد )) نوعا ما
التكامل من الدليل كان حلو جدا ثم الإمتحانات ثم ال 15 إن شاء الله

_ الجبر وىالفراغيه :: الجبر : ملهوش أى لازمه من كتاب المدرسه مسائل مش بتيجى خالص فى الامتحانات وكذلك فى الدليل إنما الفراغيه : كتاب المدرسه جميل جدا فيها والدليل برده فيه بعض المسائل الجميله وخصوصا المسأله الاخيره فى الامتحان غالبا ما بتيجى من الدليل ثم الإمتحانات ثم ال 15 إن شاء الله

فيه بقى بعض الامتحانات فى اخر كتب المدرسه فى ال فروع كلها دول حلوهم فيهم افكار حلوه نوعا وكويسه يا ريت تبقوا تحلوهم وبرده فى الدليل فيه امتحانات من ورا كويسين جدا برده

إللى برده عايز أوصله هو إن : كتاب المدرسه مينفعش يتساب فى بعض الفروع وكذلك الامتحانات مهمه جدا جدا جدا لان فيه افكار مش حتقابلوها غير وانتوا بتحلوا امتحانات (( دور أول ودور تانى )) وخاصه من 2006 لــ 2012

*** فيه برده كتاب اسمه 100% ده بيحل اسئله كتاب المدرسه كلها على كل درس فى كل الفروع وبيحل المسائل الصعبه اللى فى الدليل . بس فيه عيب : ساعات كتير بيحل غلط يعنى يتلغبط فى رقم يكتب رقم غلط من المسأله وكده يعنى لكن حالل كل المسائل من المدرسه وبعض الافكار الصعبه من الدليل ***

أحيانا كتاب الدليل بيبقى فيه غلطات فى الاجابات من ورا ... فعشان متعانوش نفس معاناتى وكنت بشد فى شعرى لما احل مسائل سهله ويطلع هما إللى غلطانين فى الحل مش أنا فدى كانت من أكتر الحاجات إللى بعانى منها فانتوا بتحلوا طلع الناتج مش هو إتأكد من المستر أو من أى حد بيحل عشان الحاله النفسيه والثقه فى النفس متقلش وبنكون إحنا الصح إن شاء الله

وآسف على الإطاله