مولود وعمره ألف عام
ليه تتولد فينا الدموع
قبل الفرح
حتي الفرح ليه ينجرح
ونخاف نبوح
علشان كلامنا
ملوش طريق
وسط الهتاف!!!!!!!!!
والزحمة والدوامة
بتلف ف عقول الناس
تلخبط فكرهم
ووشوش عليها خطوط
بيحفرها الزمن
من غير تمن
والمصطبة بتجمع الكدب
اللي قاله الكدابين
وليه حارتنا اتلونت
بألف خيبة من الزمن
والحب أصبح خيط رفيع
وسط حبل المشنقة
وأيد أخويه في أيد شيطان
أما الضمير أصبح جبان
دوامة واخدة الكل فيها
بدون خيار
إللي يخالفها تدوس علية
وفين يروح عود الدرا
وسط الكافور
والضلمة داست كل نور
الكدب خيبة
قالتها أمي لإبن عمي بدون
حرج
طاب ليه بنكدب كل يوم
هيقول هموم
والتاني هيقول الزمن
طاب إحنا ليه كدا
ملفوفين من وسطنا
الوش باصص للأمام
والرجل ماشية للوره
والفشخرة والمنظرة
عنوان كبير عمال بيكبر كل يوم
هيسد فينا بذرة الحب
اللي طالعة منورة
الطفل تاه العمر منه
والطفولة اتشوهت
والشيخ بيبكي على الزمن
اتصغرت فيه الساعات
وكل شيئ أصبح مهوش
غير( الماني)mony
أمسح دموع عمرك
وقوم ارسم لإبنك سكته
أصل الرحاية هتاخده وسط اللخبطة
ويدووور مع الزمن الحزين
وف ثانيه واحدة
العمر يصبح
ألف عام.
***
يارب أطلع من السجن
بيعاملوني معاملة وحشه