الشبكه : مفيش
والعفش : يدوبك كام كرسى
مش شرط نجيب يا حبيبتى
النيش ..
وبقولك آه قبل ما تنسى
إنى معنديش ..
غير عمرى أدفعلك منه المهر
أو ترضى ساعتها بربع جنيه
وأهو من غير ليه ..
الدبله فـ صابعك وفـ صابعى
واديكى فـ إيدى بتتشبك
جه الوقت اللى قصاد الدنيا
أقدر أقولك انى بحبك ..
ولا أبوكى ساعتها يطرقعلك
ان شافك ويايا فـ حته
والبيت الضيق راح نملاه
بعيالنا الحلوين السته
لو كله بنات أنا هرضاها
لو كله ولاد مش فارقه كتير
لو من ده على ده يكون أحسن
الفكره اننا نبقى معاكى
على طول بنعيش !