[To Be Is To Do]

السلام عليكم
انهارده كنت راكب الميكروباص رايح أجيب هدوم العيد
المهم طلعت الميكروباص وقعدت وراح السواق طلع بينا من على البحر
وأنا قاعد وحاطط راسى على الكرسى سرحت وأفتكرت
يوم نتيجه 2 ثانوى يوم ما إتظلمت فى ماده الإنجلش اليوم اللى قعدت أقول ده حرام ده ظلم وبعدها عملت تظلم ومخدتش حاجه وتتوالى عبارات ده ظلم وحسبى الله ونعم الوكيل ولكن بعديها على طول جه فى بالى يوم نتيجه 3 ثانوى وإزاى ربنا عوضنى الظلم ده وإزاى ربنا أدانى أكتر ما تمنيت وأكتر مما أتوقع وإزاى ربنا قدر إنه يبدل يوم حزنت فيه بيوم تانى سعيد سمعت فيه كل عبارات التهنئه والفرح
وفجأه صحيت على صوت " على جنب يا أسطى " ولقيت انى لسه مش حنزل هنا روحت ساند راسى على الشباك ورحت فى دنيا غريبه وإفتكرت
قبل الكليه بأسبوع يوم ما بابا كان بيعمل عمليه فى المستشفى ومن بعدها لما ماما قالتلى خف من الطلبات عليه ومعلش تعالى على نفسك وهات كام تى شيرت كده وكمل باللى عندك وروح الكليه بيهم لغايه لمّا ربنا يصلح الحال وبفّتح عينى وبلاقى نفسى فى الميكروباص رايح أجيب تى شيرتات عشان بابا أدانى فلوس وقالى معلش انا زنقتها عليك فتره بس أهووو ربنا عدّلها من عنده ورحت قايل للسواق على إيدك هنا ياأسطى ونزلت من الميكروباص وحاجه واحده بس فى دماغى
ربنا أكيد حيعوضّك ربنا أكيد حيعوضّك