بوستر الغلابة
قالوا عن مبارك أمه اسرائيلية
قالوا عن أبواسماعيل أمه أمريكية
وقالوا عن العوا أبوه سورى
والبقية تأتى
ورغم أنها ألاعيب سياسية
لأول مره أشعر شعور المنتصر
لأن الحاج والحاجة تبعى
رحمة الله عليهما
لم يخرجوا من وطنهم ومسقط رأسهم سوى مرتين
فى المرة الأولى لما راحوا مولد السيد البدوى
فى طنطا على بعد 10كم سيرا على الأقدام
وكانت هدية زواجهم من الجد الكبير الجوهرى باشا رحمة الله عليه
وكان هذا سخاءا عظيما من رجل العطاء
والمرة التانية لما راحوا اسكندرية بدعوه خاصة لزيارة إبنهم الكبير
وكانت زيارة عمل دفعوا فيها كل مايملكوا
من أجل افتتاح وتدشين مشروع شراء شقة لإبنهم الذى تم تعينه هناك
واعتبروه تحديا وانتصارا على قرار الحكومة المصرية بتعين إبنهم على بعد 200كم من بلده
ياترى الزيارتين دول وهذا التحدى الصارخ للحكومة فى زمن السادات
يمنعونى الترشح للرئاسة ؟
أطمع فى كرمكم وتأييدكم ومساندتكم فى ترشحى
لرئاسة مركز شباب بلدنا
اللى وعدونا بيه من نصف قرن ولم يأتى بعد
والغريبة كل دروس القراءة والنحومن الابتدائى للثانوى تنصح بعدم اللعب فى الشوارع
طب نعمل إيه ونرد على الأولاد نقول لهم إيه ؟
لما ولد مفعوص مش باين من الأرض يحرج معلمه ويسأله
أمال نلعب كوره فين يا أستاذ ؟؟
وهابقى أبوتريكه إزاى ولا شيكابالا إزاى ؟
شفتم مقالب الحكومات مع المعلمين والمعلمات
نطَّقوا الأسد والديب والتعلب وخلوهم يتكلموا عربى لبلب
وفشلوا فى توفير ملعب للى بينطق وبيتكلم عربى مكسَّر
__________________
الحمد لله
|