[كركركوكو]

عصير فراولة

بقلم على سلامة ٢٨/٤/٢٠٠٨



يا عم أبوس إيدك..

فيه أمل..

ولا حتي احتمالات ضعيفة..

أنا مش بقولك..

ترجع البيضة تاني بتعريفة..

ولا الانتخابات الجاية..

تبقي مية المية نضيفة..

ولا أتقابل أنا والوزير..

ف نفس الطابور..

بدون حرس وأمن وتشريفة..

ولا لما أدخل القسم..

يقولولي ف خدمتك يا مواطن..

ويجيبولي عصير فراولة..

مع ابتسامة لطيفة..

عارف..

هموت وأعرف مين..

بيسرق مني الغطا..

وأنا نايم بالليل..

بجد حركة مش ظريفة..

بس بيني وبينك..

دي غلطتي..

حد يسيب الشباك مفتوح..

ف عز الشتا..

وينام كده بهدوم خفيفة..

حصل خير..